Read Sumi Naga 2 KORINTHIAMI 12 Bible Online

2 KORINTHIAMI 12 - Sumi Naga bible

2 KORINTHIAMI 12

¹Qhezakeu lono kiumu ala shimla kemu itehi niye Ampeu no kungunhetsu ngo piyekusu qo ghili pini cheni.

²Ino ithi ani, ike ampe chighi-bidi shiveake Khristo timi lakhiye kungugha jolha akuthuulo sasu ikuveke, tiye aphimpino iku keo aphimpi pumono iku keno niye mthae, Alhou likhino ithi ani.

³Ino ithi akeuno timi tipauye kungugha lo sasu ikuve, tiye aphimpino iku keo aphimpi pumono iku keno niye mthae, Alhou likhino ithi ani,

⁴eno tilauno timi kichi lono pimlakepu tsa eno timi kichi no pimlakepu pano pilu eno chiluke.

⁵Timi tipau ghenguno ino qhezanike, ikemu ilikhi ighengunoye iwu tomo chhimokeqo kumo aye niye qhezamo nani.

⁶Ino qheza nishi aye, niye kughuzumi shivemo nani, kughengu niye kuchou tsa pini chenike; ikemu niye qhezamo nani, kughengu ino mlaitha aghike lono ni ithulu eno piake lono chilukeu nguno alauye kutami pelo niye kiu keno akumo akukuhau alau kumsupu aghipenishi moke.

⁷Piyekusu akumzapu jeli ipiyekeu pesu ino qhezauve nosake launo iphi ashilo akusupu lakhi supuatsue, tino Satan ghinimi lakhike eno tino iheqhipeniye eno ipelo ihulo qheza pemoniyeke.

⁸Ino ghuthu kuthu kutolo Ampeu vilo hipau ikhisuwuvetsu lopi qhuinijuke.

⁹Ikemu pano ivilo ishipi, “Iwu kupukiniye oghenguno lukumkha; kughengu ikukaye tomo chhimokeu lono akumto kije shilucheni.” Tishiaye niye ino tomo chhimono akeulo qhezani cheni, tishianguno Khristo kuka igholo achepe niyeke.

¹⁰Tishikehu Khristo ghenguno tomo chhimokeu, phimo gihumokeu, ghichhe ghime, akijipusakeu eno amlo kighishi sholu kelo niye amlo qiqhiyi cheni; kughengu kughou ino tomo chhimono ani keno tilehino ino mutotoilu cheni.

¹¹Niye kughuzumi lakhi shiauvae! Nonguye ikughape peqhepuku akepu kelauye nonguno anguka lono ipelo aghuzuu shi anipeke. Kughengu niye kiumu kumokemu, niye kiu laghi lonomu ti “Apostolmi” akhotomi ipichekeqo nguno aqhokigheu kumoe.

¹²Niye apostolmi lakhike ipikeu michi nongu gholo shishe kutuo kutuu keu lono amchipu ngo akumzapu eno akichiqhipu kumla pesu mla puanike.

¹³Nongu vilo ikuphulo ipimovekeu ghenguno kumo aye, niye kiu lono akukuhou kutau nguno alhoksau shi nongu peitha puani kya? Hino achipikumove ake ikipimi pevetsulo.

¹⁴Hi ghuthu akuthuu niye nongu putsa ighinike kutope ani; niye nongu ghimeqhini chemoe, kughengu niye nongu kuakini phuchemoe ikemu nongu phuchenike, kughengu apuazano atianuli ghenguno pekikepe qhitsu cheni kethono atianulino apuaza ghenguno pekikepe qhitsu chemoe.

¹⁵Ino kiu aghi keno eno ikuxu kumtsu pesu nongu kuxupu ghenguno pevetsuni keuno ilokivi ke. Ino shishe nongu kimiyeke ghenguno nonguye akimkheu shi ikimiyeni kesha?

¹⁶Niye nongu punaqhi puamokepi nongu ghi pulo kuqhatsu aghiluvi. Ikemu nonguno niye amqu kinike eno akimiki lono nongu meluve ipike.

¹⁷Kiu lono tishi pikepu anikya? Ino nongu lau aghinikishimi puwukeqo vechewo nongu shou akumou shive kesha?

¹⁸Ino Tito vilo wulopi inijuke eno ino athikuzumi hu pa gholo puwuke. Tito no nongu shou akumou shive kesha? Ikujoye akukumsu akimiji aphiphi lono mlaitha eno apukhu nepa lakhi shi acheni ke kumo kesha?

¹⁹Ishiake, itehi kutolo nonguno kumsukeuye ninguye nongu zulo nilikhi ningu shokhaniye pukaputsa ani kughashi ani kesha? Tishiamoe! Alhou zulono ke ninguye Khristo no ningu pelo kishi pipenishi keno titoi pianike, ino kimiyechekeqo ninguno mla ithakeu kumtsu nongu kuphunikeu ghengunoke.

²⁰Kughengu kughou ino ighini keno nonguye kiu toikemi shipenishi anikeno tipau nguno kutau shiaghivekeu musa ani eno nonguno niye kiutoi kemi shipenishi anikeno tipau nguno kutau shiaghivekeu musa anike. Ishiake, anhekushu, mutokeu, axukighide, aghukha shikeu, thaighakeu, timi ghili kughakeu, lahilazakeu eno kuthamlakeu aghi nani keniake.

²¹Ino tilau ighikelo itaghi iLhou no nongu zulono ishikukujokeu musa anike, eno timi kutomo ghenguno niye qa-mloni chenike, wovekeulo khunoqomi axine shive ti mithemokeu jeli ngo kipti toti dolo xine ngo ghasu hasumlakeu panonguno shipuani eno xukithe lumono anike.