Read Sumi Naga 2 KORINTHIAMI 13 Bible Online

2 KORINTHIAMI 13 - Sumi Naga bible

2 KORINTHIAMI 13

¹Hi ghuthu akuthu-u niye nongu putsa ighini cheni. “Kiukiu ngukukile keu aghinamu thopimi kini momu kuthuno mutsumishei ashepe shikeu lono xatha kepuke.”

²Khunoqomi puzuu axine shivekeno eno kutamiqo kumtsu lau ino kutughuve ani; puzuu ghi ino ghuthu akiniu nongu putsa ighi kelono pivae, ikemu itehi niye putosupe akelono itaghi pini; ino ighi aye niye panoqo ghime niputsake.

³Hipau lono Khristo no ivechewo piani kepi nonguno mutsuqheyi shivenishi akeuke. Kughou pano nongu peithaju akeno paye tomo chhimokeu kumoe, ikemu paye nongu gholo pa kuka piyeke.

⁴Kughengu tomo chhimo keu shighi kros shouno pa pithive pinamu Alhou kuka lono paye xuani. Kughengu pa gholo ninguye tomo chhimoke, ikemu nino nongu peithakeu loye Alhou kuka lono ninguno pa gholo xu nani.

⁵Nonguye nongu kupulu mutupe anikemo keno juke pushi nongu likhi nongu chhe julo eno kughathajulo. Nonguye thwokha pheve aghinike kumo aye Jisu Khristo ye nongu lolo aniepi kumsumla kesha?

⁶Ino puluakeuno nonguno ithi anike ninguye tomovekemiqo kumoe.

⁷Nonguye akumou shipemo nike ghenguno nino Alhou vilo inikhu ani, ninguye pejukeulo toluvea kepi piyenike ghenguno kumoe, ninguye tomovekemi hutoi shi aghie pinamu kiuno achipi keno tipau nongu pelo shipeniyeke.

⁸Kughengu ninguye kuchou shou kiumu shimlae ikemu tipau ghengu likhi shiluke.

⁹Kughono ninguno tomo chhimomu nonguno mutotoi aghi aye tino ningu lokivike. Ikehu ninguno inikhu akeuye nongu pelo kupukulu shilupeniyeke.

¹⁰Ino nongu launo putou akelono hipau yelu akeuye ino ighini kelo Ampeu no akuka yeh itsukeu peitha puzu mghachhoi nongu peithamoniyeke. Akuka yeh tsukeu huye kutsaleve peniyeke kumo puzu shiqhepuku peniyeke.

¹¹Ashekhalo ghi athikuzumiqo, ileno alo! Kupukulu shinikeu kohakishilo; ino pikeu inilo; lakhino lakhi sasu kumtsa pulo kuqhalo, eno alokiqi shi xulo. Kimiyekini eno alokiqi Lhou no nongu gholo anani.

¹²Akimtheshi mumakeu pesu nongu lakhino lakhi ikhilukilelo.

¹³Hilau Alhou wu timi kumtsuno petha nongu tsupuwu ani.

¹⁴Ampeu Jisu Khristo wu kupukini, Alhou kimiyekini eno Aghungu Kimthe kuposhukulu nongu kumtsu gholo apeniu. Amen.