Read Sumi Naga 2 KORINTHIAMI 3 Bible Online

2 KORINTHIAMI 3 - Sumi Naga bible

2 KORINTHIAMI 3

¹Ninguye itaghi nilikhi ni sheqhe thuve akesha? Timi khami toi, nongu launo momu nongu kudau ninguye sheqhekeu yesu avehupu shi ani kesha?

²Nongu ampino niwu sheqhekepu yesuke, nimlolo yepe puani eno timi kumtsuno ti ithi peni eno phipeniyeke.

³Nonguye mutsuqheyino Khristo launo ighikeu, ninguno ikhiphe sughi keu yesu lakhike. Hiye akiyezu pesu atu luphaqo shou yepuku keu kumono Alhou Ghungu pesu timi mlolo yesupukukeu ke.

⁴Ninguno hipatsa pilu akeuye Khristo vechewo Alhou lau ningu kupukhu akeu ghenguno ke.

⁵Nilikhi niloloye hipau kumla shikulupu kiumu phukulupu kuhae. Nino shikulupu shikeuye Alhou launo ighike,

⁶kughengu pano ningu pelo puloshoqhi akitheu huthukemi shilupeke, tiye yepuakeu-yeh lakhi ke kumoe ikemu Aghungu lonoke. Yepe puakeu yezah no akithi sughi cheni ikemu Aghungu no akuxupu tsu cheni.

⁷Ayezah huye atu pha shou chhitha puzu yepukuke eno tipau tsukelo Alhou kimthe jukuvu ipeghike. Ti mlapuyikeu jukuvu shishe akehu tiye hauvekemu Israilmi ye Muse gilo jupuku mlave. Akithipu sughikeu yezah tsukelo tikithipu kimthe jukuvu ighiaye.

⁸Aghungu no peithatsukeu loye tinguno alau mlapuyikeu jukuvu gholono ighimoni kesha?

⁹Kughengu timi pevekepu kughuthalo akimthe jukuvupu shiaye, timi pesu achipiu shitsukeu kughuthaye tinguno alau akimthe jukuvupu shikepue!

¹⁰Ninguno pikulupushi akeuno itehi akimthe jukuvupu akeu huye shishe mlapuyi kehu puzuu akimthe jukuvupu shisheno akeu huye hauvae.

¹¹Kughengu ado ikhonhei anikeu loghi akimthe jukuvupu anapiaye, pulhapuju achenikeu loye akimthe jukuvupu shishe ani putsae.

¹²Ninguye lajupu hipau anike ghenguno ningu mlo ithamono achenike.

¹³Ninguye Muse toimoke, paye agikusho phi pesu pa gi kuzuluve keuye Israilmi pelo mulapuyikeu jukuvu ashekha shi hailokeu ithulu pemoniyeke.

¹⁴Panongu kukumsuye kuchouno xukhomoke kughengu ishi kutolo kughono panonguno puloshoqhi aqau kaku phini keno agikusho phi tipau huno panongu nhethi kuzupe ani. Timi lakhino kughono Khristo sasu xukimelu kelo likhino agikusho phi hu ikhivelu cheni.

¹⁵Kuchouno ishi kutolo, kughokughomu panonguno Muse yezah phisuni keno agi kusho phino panongu kukumsu kuzupe acheni.

¹⁶Ikeghi kuchoyesulo Muse no kiu shikeno tipau ishi pipuani, “Kughokughomu pano Ampeu lau tsughu idewo nikeno agi kusho phi hiye ikhive che.”

¹⁷Ike “Ampeu” ipi puakeu huye Aghungu ke; eno khilehi Ampeu Ghungu ani keno tilehi amlo ililayikeu anie.

¹⁸Ningu kumtsuno agi kuzupumono Ampeu kimthe jukuvu yebide achenipe, eno tipau kimthe jukuvu huno pa kimihi kuchoulo akimthe jukuvu alau lono ningu pesu miviu tsu acheni; kughengu hiye Ampeu khuu Aghungu keno pa launo ighikeuke.