Read Sumi Naga 2 KORINTHIAMI 7 Bible Online

2 KORINTHIAMI 7 - Sumi Naga bible

2 KORINTHIAMI 7

¹Nikusamiqo, piqhipuakeu hipaqo ye nisala ghenguno aphiashi eno angu gha kitiqeve mono thwokhalo akimthe kupukulu shinike Alhou sukumsa lono xuni nolo.

²Nongu mlo ningu lau khaqhi tsulo. Ninguye milakhi shou mu pimi puamoe, ninguye khuumu shipusa puamoe momu khuumu pishiqhi puamoke.

³Niye nongu peveniaye hipatsa piamoke, kughengu ino puzuu piveke toi nino xuana thive namu nimlolo nongu kumsulu acheni.

⁴Niye nongu shou amlo tsuqhiyi bepe acheni, nongu jupe ikijivilo achenike. Niye amlolo alokughuno chhitoi acheni; nino akijikusa sholukeu kumtsulo niye alokivino chhitoi acheni.

⁵Ninguno Makedonia lo ighive kethiu ghi ningu shiaji pelo kitilamu akulho qhilu pemoke. Aqha kumtsulo kupunakeu aghive, ashouno kutami sasu mutokeu eno nimlolo akumsa ake.

⁶Ikemu amlo hauveno akemi shikumtotsu chekeu Lhou no Tito no ighilupekeu vechewo ningu mlo shikumto tsuke.

⁷Pano ighi keu likhino kumoe, ikemu nonguno kiu toikeu lokughuno pesu pa lokughunotsu keno tipau sutsa ghengu ghike. Nonguye kiutoi isasu kushonishi ani, nonguye ilau amlo ghime shiakeu, nonguno isaphu akeu pano ivilo pike, ikehu niye itehiye alovi kithe ani.

⁸Kughengu iwu yesu lakhiu huno nongu mlo kusapu shivetsue pinamu tiye imloghime shiamoe. Kughou yesu tipauno nongu mlo ghimevekeu ino ithulu keno, ado hitohi likhi kemu tiye imlo ghimeveni cheke.

⁹Itehi niye alovi ani, tiye ino nongu mlo ghimeqhitsu keghenguno kumoe, ikemu nongu mlo kusa huno nongu pelo akuxu xakidelu peke, kughengu amlo ghimeqhikeu tipau huye Alhou launo peithaluveke, ikehu nighenguno nonguno kumu puhapiyighive keu shipuamoe.

¹⁰Kughengu Alhou launo amlo ghime peithaluvekeu huye akuxu xakidelukeu sughitsu cheni, tino xakulupu lau sawu cheni eno tipau loye amlo ghimepu kuhake. Ikemu ayeghilo gholauno amlo ghime shikeu huye akithi sughi cheni.

¹¹Alhou launo nongu mlo ghime kishi peithaluve akeno julo: hino nongu pelo amlo tsushekeu shiveapeke, nonguye kiumu pimi puamokeu mutsuqheyive nike khekulho shipeke. Achipikumomi ghime alo nongu pelo axuidepe, thughuyilupe. kumsulupe, amlo tsulupe eno kutolupeke! Hipau vehulo nonguye pimi puamo kepi alaghi thwokha lono nonguno mutsuqheyi piyevae.

¹²Ikehu niye nongu lau yesu yevea kemu ino yekeuye khuno pimivekeno timi tipau ghenguno kumoe momu khuu shou pimikeno tipau ghenguno kumoe, ikemu Alhou zulo nonguye nilau kishi amlo tsu achenikeno nongu lau pephepeniyeke.

¹³Tighenguno ningu mlo shikumtove tsuae. Ningu mlo shikumtotsuke likhi kumo puzu Tito lokivi ithulu puzu ninguye alaushi alovivae, kughengu nongu kumtsuno pa mlo kiqipu shitsuke.

¹⁴Ino nongu ghili pa vilo ikijivilo ghi pikeulo nonguye kujovekepu shitsumoke. Ninguno thwokhalo nongu vilo kuchou picheke toi Tito zulo nikijivilo tsa pikeu hughi kuchou shi aghiveke.

¹⁵Nonguno msa khokhoshi puzu pa ikhilukeu ngo nongu kumtsuno aghokulushi keu pano kumsuchilelu puzu paye nongu shou kimiyeqhiyi keu shishe alau auvae.

¹⁶Ino nongu shou pukhubekulu shiluniake ghenguno niye alovi auvae.