Read Sumi Naga 2 KORINTHIAMI 9 Bible Online

2 KORINTHIAMI 9 - Sumi Naga bible

2 KORINTHIAMI 9

¹Judia lo Alhou wu timiqo kuphu tsupuwuni keu ghenguno niye nongu lau yeakepu kuhae.

²Kughengu nonguno kuphunishi kutu akeu ino ithi ani, eno niye Makedoniami vilo, “Athikuzumi Akhaya lo kuamiqoye wovekeu mipe lono kuphuniye kutope anike” ipi nongu ghenguno ikijivilo acheni. Nongu zukinino panongu kutomo hakutholuvae.

³Ike ino athikuzumi hipaqo puwu ani, tishi anguno nongu jupesu nino akijivilo chekeu pe adou shivetsu kevilo; ino pivekeu toi nongu kukuphu kutope aghilo.

⁴Tishimo aye, Makedonia mi khamino igholo ighikelo nonguno kutope aghimokeu ithulu aye, ninguno mtsuqheyi pukhubepe akehu nongu nguno alauno ningu shishe kujoniake.

⁵Ike nonguno agho tsunike piqhipuakeu kutope aghipeniyeke, tishianguno nonguno tiye anguka lono lekholukeu kumono puloniqhiyi tsukeugho shighi kutope aghipeniye ino athikuzumi hakite puzu izuuno cheghi penikeu shi ani.

⁶Hi ithilo: khuno aghulo xusuni keno aghulo likhi xolu cheni, eno khunono kutomo xusuni keno kutomo xolu cheni.

⁷Tishiaye milakhi khino suchilemono momu tsulepikeu ghenguno kumono pano kumsulu keu lono pesu tsulo, kughengu amlo qiqhiyi tsukemi Alhou no kimiye cheni.

⁸Alhou ye nonguno avehupu shi akeu eno tinguno alau ghi tsukulupu anike tishianguno nonguno kiu avehupu shinikeno tipau thwokha aghilupe eno akumla kivipu ghenguno lukumkhashi tsupeniyeke.

⁹Kuchoyesulo pipuake toi: “Pano leqhi puwutsu, pano kumlhomi tsuke, Pa kimiyekiniye ashekha kuha ache nani.”

¹⁰Apiti yisukemi tsuchekeu eno chukepushi achuqupu tsuchekeu Lhou no nonguno apiti avehupu shiakeu tsupuzu tipau thuwulupe, nongu kimiyekini lono kinikulu shi ghile hulupe kepu shi nani.

¹¹Pano nongu pelo kinikulu shilupe nani, tishianguno ala thwokhalo nonguno pofushi tsupeniyeke, eno ni vechewo hipau shikeu ghenguno timi kutomono Alhou shikimthilu nani.

¹²Kughengu nonguno akumla hipau shikeu lono Alhou timiqo vehupushi akeulo tsuluke likhi kumono Alhou shikimthikeu kutomo qole ipeghilu peke.

¹³Nonguno hipakumla shikeu huno nongu kupulu mutsumisheyi shitsu ani kehu nonguno Khristo tsakiviu gholu keu ghenguno eno kumtsu sasu pofushi kusajekeu ghenguno timi kutomono Alhou lau akimthe jukuvupu tsu nani.

¹⁴Ikehu Alhou kupukini pa-kutakeu shi nongu lolo akeu panonguno ithiluno shishe nongu qhuivulai ghi nongu ghenguno inikhu anani.

¹⁵Alhou no paw pikhakumlapu gho tsukeu ghenguno pa shikimthi ani nolo!