Read Sumi Naga GALATIAMI 1 Bible Online

GALATIAMI 1 - Sumi Naga bible

GALATIAMI 1

¹Paul no apostolmi shilukeuye timi vechewono shiluke kumoe, ikemu Apu Alhou no Jisu Khristo akithi lono xuputhuvekeu vechewo shiluke,

²hilau ithikuzumi akeqo kumtsuno Galatia lo akukuhouqo lau petha tsu ani:

³Ni Puh Alhou eno Ampeu Jisu Khristo launo kupukini ngo alokiqipu nongu tsupeniu.

⁴Khristo no kixikila tiqheli xine lono ningu xapheluniaye pa mpi pesu tsuve, tiye ningu Lhou eno Apu pulou lonoke.

⁵Alhokupuju lono alhokupuju kutolo Alhou lau akimthe jekipipu shilo! Amen.

⁶Kushuwa kumphi puzu nonguye Khristo wu kupukinilo nongu kulukeu Alhou pheveno kutau tsalo ilove anike ghenguno niye shishe akichiqhivae!

⁷Kuchouno kutau tsakiviuye kuhake, ikemu timi khamino nongu xukutho ani eno Khristo tsakiviu shipixinishi kehuke.

⁸Ikemu ningu pina kungughalo kungumi namu ninguno nongu vilo atsakiviu pikulhavekeu nguno akumou kutau pikulha aye Alhou ngusu pa shou apeniu!

⁹Azuuno ninguno piveke toi itaghi ino pikithe ani, nonguno atsakiviu ikhiluvekeu nguno akumou kutau tsakiviu nongu vilo pikulha aye Alhou ngusu pa shou apeniu!

¹⁰Hitoi pikelo niye timi lopu phu ani kesha? Ikeo timi pelo ni ikhilupeniye shi ani kya? Itehi kuto ino timi pelo ni ikhilu peniye shi aghiaye niye Khristo qeu shikepu kumoe.

¹¹Athikuzumiqo, niye nongu pelo hi ithipenishi ani: atsakiviu khipau ino pikulha cheni keno tipauye timino shiphelukeu tsakiviu kumoe.

¹²Kughengu niye timi kudauno hipau sughike kumoe momu timino kutsupiye ke kumoe, hiye Jisu Khristo ampino ilau pephe piyekeu vechewonoke.

¹³Ino Judami chineyeh lo kishi amlo tsuqhiyi achekeno nongu vilo pivae, ino suchilemono Alhou kukuhou, shikighimeche eno tipau shipuhave nike pukaputsa cheke.

¹⁴Judami chineyehlo niqhe sho Judami kutomo dolo ino atughiu shiache, nipuasuno pekishe pichekeu nongu nguno alau ino amlo tsuqhiyi cheke.

¹⁵Ikemu ipunu mphi lono Alhou no pawu kupukini vechewo ikishephelu eno pa qepenike ikulue.

¹⁶Pa nu ilau pephe piyenike pa pulou shive, tishianguno Judakumomi lau pa tsakiviu pikulhakepu shikelo, niye kiu shikepu kelapi khuu vilomu inijumoe.

¹⁷Tikekumono, Jerusalem lo izuuno apostolmi shive aghikeqo lawumu niye iqhomoe, ikemu niye Arabia lo wuve; eno itaghi Damaska lo ideighiveke.

¹⁸Ampe kuthu thiuno niye Jerusalem lo Pitor sasu kushonike wu eno niye pa sasu atsala chighi pungu ngove.

¹⁹Niye Ampeu thikuzuu Jems thono apostolmi kutami lakhimu sasu kushomlae.

²⁰Alhou no ithi ani ino nongu lau kiu yeh puwu anikeno tiye kuchou kethono mikiamoe!

²¹Tishieno niye Siriya ngo Kilikia qhalo wuveke.

²²Tikutolo Judia lo Khristomi akukuhomi sasu ampino kujuthimono ake.

²³Panonguye kutamino ishi pikeu likhi chilu: “Timi khuuno ningu shikighime eno hasuveniye shichekeno itehiye pano tipau kupulu pikulha anie!”

²⁴Ike ino tishilukeu ghenguno panonguno Alhou she ani.