Read Sumi Naga GALATIAMI 2 Bible Online

GALATIAMI 2 - Sumi Naga bible

GALATIAMI 2

¹Ampe chighi-bidi thiuno ino Tito sasu Barnaba gholono itaghi Jerusalem lo iqho.

²Alhou no ipiyesuketoi ino tilau iqhoe. Ino mla ighive keu eno mlawuniye akeu adou shivemoni aye tilau sakiphemiqo sasu lomoshi kusholu kelo, Judakumomi lau atsakiviu pikulha chekeu lhepiyeke.

³Igholo chekeu Tito ye Grikmi kemu, tsuyikhomo aphighuyiko ghavemasake pimoe.

⁴Qeti timi khamino athikuzumi kepi nigholo kihikuqha iloghino Tito peloghi ayiko ghave penishi ake. Timi tipaqoye ninguno Khristo gholo xukuqhape ililayi akeu miqejuniyeke, tishino panonguno ningu tshupe qhiveniye shike.

⁵Ikemu ninguno atuqhudo kitilamu panongu phesumoe, tishianguno atsakiviulo kuchou akeu nongu ghenguno kutsukiyi puatsuniyeke.

⁶Ikemu sakiphemi kepi chekeqo hu kuchouno panonguye tishi keo mokeno ighenguye kiumu kimhe akepu kuhae, kughengu Alhou ye ashou koghe jupesu xatha chemoe, ike sakiphemi tipaqo ghi akukumsu kithe kutau kiumu ipithimoe.

⁷Tikekumo puzu, Alhou no Pitor pelo Judami lau atsakiviu pikulhape nikeu makho tsuke toi, pano ipelo Judakumomi lau atsakiviu pikulhape nikeu makho tsukeu panonguno ithulue.

⁸Kughengu Alhou no Pitor pelo Judami lau apostolmi shilupeke toi, Alhou no ipelo ghi Judakumomi lau apostolmi shilupeke.

⁹Alhou no amakho hipau itsuke akukuholo sakiphemi shiaghikeqo, Jems, Pitor eno Johan ishino ithulu puzu panonguno Barnaba ikujo sasu aqo lakhi kepi petha shino kuposhulu. Nino Judakumomi gholo mla wunikeu shi eno panonguno Judami gholo mla nikeu shi kughalue.

¹⁰Panonguno nivilo pikeuno ninguye panoqo gholo kumlhomi akeqo kumsululepike, ike nighi tipauye shinishiqhiyi cheke.

¹¹Pitor no Antiok lo ighi kelono ino mishi zulono pa sakiyive kughengu paye mutsuqheyino akumou shiveke.

¹²Jems no timi khami puwukeqo ighi mphi loye Pitor no Judakumomi sasu kuchukusho shiche. Ikemu timi tipaqo ighive kethiuye paye tsughuveno Judakumomi gholo chumove, kughengu paye Judakumomi pelo aphighu yiko ghave penishi chekemiqo msave.

¹³Athikuzumi Judami kutamiqo ghi Pitor gholo supuzu ighuve ike Barnaba thotsu panongu kuyighu gholo kidisawuve.

¹⁴Ikemu atsakiviulo kuchou akeu kiqilo panonguye achipi kumovekeu ino ithiveno panongu kumtsu gizu lono ino Pitor vilo ishipi, “Noye Judami kemu Judami lakhi toi mono Judakumomi toi xuchenike. Tishiaye noye kushiye tsuyikhomo Judakumomi vilo Judami toi xulopi cheni kya?”

¹⁵Mutsuqheyino ninguye azano punuke lono Judamike eno Judakumomi toi axinemi kumoe.

¹⁶Tishimu ninguno ithi akeuno timi lakhiye Jisu Khristo shou akupulu bekeu vechewo likhino Alhou lau achipikalu cheni kethono Ayezahlo kiu shilopi puanikeno tipau shilukeu vechewono kumoe.

¹⁷Khristo gholo kuqhape akelono ninguno Alhou lau achipikalu nikeu pukaputsa keulo Judakumomi toi ningu ghi axinemi shiaghikepu shi aye tishiaye Khristo ye axine peithatsu chekeu kesha? Tiye khilemu kumoe!

¹⁸Ino kiu xaleqhive akeno tipau shipuku kithe aye tipau kiqiye niye Ayezah hebide anie.

¹⁹Kughengu imzu loye Ayezah qholono ipithivae, tishianguno Alhou lau xulupeniyeke. Niye Kros lono Khristo gholo yeda pithivae,

²⁰ikehu niye ighoshi xu movae ikemu Khristo no ilolo ani. Eno aphi ashilo itehi ino xuakeu kuxuye Alhou Nuno ikimiye puzu ighenguno pa kuxu tsuvekehu tipau shou puluvekeu lono ino xuani.

²¹Niye Alhou wu kupukini pevemoe. Kughengu Ayezah vechewo Alhou lau achipikalu kepu shi aye Khristo no thivekeuye adouke.