Read Sumi Naga GALATIAMI 3 Bible Online

GALATIAMI 3 - Sumi Naga bible

GALATIAMI 3

¹O Galatiami mbomzumiqo, khuno nongu shikughuzuve kya? Nongu nhethino ithulu akeshi Jisu Khristo kros lono yedave keu vejoi lhepiyeve ake kumo kesha?

²Ipelo hilikhi nongu vilo inijulu pelo. Ayezah lo pikeu shiluke ghenguno keo, akupulu lono atsakiviu chilukeu ghenguno nonguye Aghungu Kimthe ithulu kya?

³Nonguye hikithipushi mbomuzu kesha? Alhou Ghungu pesu nongu kupulu kuxu huthuve puzu itehiye nongu shi-aji kumto lono kishekhani kesha?

⁴Nonguno puju shiju keu ye adou kesha? Kuchouno tiye pakiqi hami ani!

⁵Alhou Ghungu Kimthe nongu lau pekishe sughi eno nongu gholo akumzapu kumla mlatsukeu huye nonguno Ayezah lo mlalo pikeu shiluke ghenguno keo, nonguno atsakiviu chilu puzu pulukeu ghenguno kya?

⁶Abraham ghili pikeu toike: “Abraham no Alhou shou pulubeke, ikehu paye achipikava kepi Alhou no pa kihiluve.”

⁷Nongu ghi tihutoike. Nonguno ithikepushi akeuno akupulu akemiqono Abraham polo kughukomi kuchouke.

⁸Ike Alhou no Judakumomi pelo akupulu vechewo pa lau achipikalupe nani kepi kuchoyesuno azunatha ghi ithuluveke. Tighenguno kuchoyesuno azunatha ghi Abraham lau lokivipu sutsa ishi pikulhake: “Ovechewo Alhou no ayeghilo ashiayeh kumtsu kumghatsu nani.”

⁹Abraham kupuluno kumgha keu qeluke toi kupulumi kumtsu kumghatsue.

¹⁰Tighenguno khunono Ayezah lo mlalo pipuakeu shilukeu pukhu acheni keno tipanoqoye Alhou no musu inivekeulo anie. Kughengu kuchoyesulo ishi pipuani. “Khunoqono Ayezah kakulo yepuku puakeu kumtsu pelumo eno tipaqo shimo nikeno tipanoye musuinikeulo ani!”

¹¹Mutsuqheyino Ayezah ye khilemu timi pelo Alhou zulo achipikalu pemlake, kughengu kuchoyesulo ishi pipuani, “Timi khuuno akupulu vechewo Alhou lau achipikalu cheni keno paye xulu nani.”

¹²Ikemu Ayezah ye akupulu shou pukhube amoe, kughengu Ayezah lo ishi pipuakeuno, “Timi khuuno yezahlo shilo pipuakeqo shinikeno tipaqo xulu nani.”

¹³Khristo no ningu zuqhushi angusuu shive puzu Ayezah lo musuini puakeu launo ningu xapheluve, kughengu kuchoyesulo ishi pipuani, “Timi khuuno asubolono tshuqhi thiveni keno paye musuiniva.”

¹⁴Khristo no hitoi aghime shikeuye Alhou no Abraham lau kumghatsukeu hu Judakumomi ghi Jisu Khristo gholo kimepe akeu ithulu eno akupulu vechewo ningu pelo Aghungu Kimthe ikhilupeniyeke.

¹⁵Athikuzumiqo, timi kuxulo kichekipiye tsuni: timi kini dolo thotsu pulo shoqhi shive keu hexa luchemo momu sukupha lu chemoe.

¹⁶Ikelo, Alhou no Abraham lau eno pa polo kughuko lau ashoqhi shike. Tipaulo, “pa polo kughukomiqo” ipi puamoe, tishikeaye timi kutomo lau shinicheke, ikemu tipaulo. “apolo kughuko” ipi puani, tipau kiqiye timi lakhi pi anike, tiye Khristo ke.

¹⁷Ino piakeu kiqiye hike. Alhou no pulo shoqhi lakhi shipuzu tipau shikupuniyeke. Ampe 430 thiuno ighikeu huye tipau puloshoqhi hexavemla eno Alhou no piqhipuakeu ikhi vemlae.

¹⁸Kughengu Alhou no tsukeu mheghi Ayezah shou bepe aghi kenapiaye tiye ashoqhi shou bepe amovae, ikemu tipauye Alhou no ashoqhi shipesu Abraham tsukeuke.

¹⁹Tishiaye kiushipeniye Ayezah tsupuani kya? Tipau sukuphatsukeuye kiuno achipikumo keno piyeni kehuke, ikemu tiye Abraham “polo kughuko” hu ighimoke kuto dolo likhike, kughengu pa lau ashoqhi shikeke. Ti Ayezah huye kungumi vechewo lachemi launo pikiye sughike.

²⁰Ikemu khileno ampino shini keno lachemi avehupu kuhae, kughengu Alhou ye lakhie.

²¹Tishiaye Ayezah ye Alhou no ashoqhi shipuakeu hebide kesha? Tikumoe! Kughengu ayezah lakhi tsukeu lono timi puxu kulupu ke aye, ayezah vechewo timi pelo Alhou lau achipikalu peni cheke.

²²Ikemu kuchoyesulo pikeuno ayeghiqha kumtsu kuka axine no qhasupe ani, ikehu khunoqono pulu nikeno, Jisu Khristo pulubekeu lono tsunikeu shi piqhipuakeu gho hu ithulupe niyeke.

²³Akupulu ighimphi loye ningu kumtsu Ayezah no khathasupe akughumi shipuacheke,

²⁴Ikehu Khristo ighimoke kutolo Ayezah no ningu kukutsuu shiacheke, tishianguno ningu pelo akupulu vechewo Alhou lau achipikalu peniyeke.

²⁵Ikemu itehi akupulu huye ighivae, ninguye ayezah qholo ngomovae.

²⁶Kughengu akupulu vechewo Jisu Khristo gholo kimepe akeu lono nongu kumtsu Alhou nuliqoke.

²⁷Kughengu nongu khijehino Khristo sasu kuqha pekeulo baptiz shiveakeno Khristo kuxu pepuvae.

²⁸Ikehu Judami ngo Judakumomi dolo mu aquaxemi ngo kuqhopheve kemi dolo kiptimi ngo totimi dolo pinamu kutuqukeu kuhae, Khristo gholo kimepe akeu lono nongu kumtsu lakhie.

²⁹Tsala nonguno Khristo laumi aye nonguye Abraham polo kughukomiqo ke, eno Alhou no piqhi puakeu mheghi ithulu nani.