Read Sumi Naga GALATIAMI 4 Bible Online

GALATIAMI 4 - Sumi Naga bible

GALATIAMI 4

¹Ino piakeuye hike: amheghi lunikeu huno izulo aphi loye, amheghi kumtsu paw shianamu aquaxemi lakhi toi peitha acheni.

²Pano izulo aphi loye pa puno kihitha puatsukeu tsala tomoke kutolo pa shikukami eno ghakusumi qholo acheni.

³Ningu ghi tihutoike; ninguno akupulu tekhoyilu mphi loye ayeghilo yezahqo qu-axemi shi acheke.

⁴Ikemu kughou ado kupukulai ighivekeno Alhou no pa Nu puwu, totimi pelo punupe, Judami yezah qholo xupe,

⁵Ayezah qholo xuchekemi xachilelunike, tishianguno ningu pelo Alhou no saputhulu vekemi nuli shilupeniyeke.

⁶Nonguye anuliqo shiveapi piye nikehu Alhou no pa Nu Ghungu ningu mlolo tsu, pano ishi igha cheni, “Apuo, iPuh.”

⁷Ikehu nonguye aqu-axemi lakhi kumovae, ikemu anu lakhiake. Eno anu lakhi keaye amheghi ighinikemi lakhike.

⁸Kughou nonguno Alhou mthano achekeno, kichile lhouqo qu-axemi shi acheke.

⁹Ikemu itehiye nonguye Alhou ithivae, momu piniaye Alhou no nongu ithivae, tishiaye nonguye kishi puzu idechilewo qeinayikeu eno aqu agha ghahwu qu-axemi shikithenishi cheni kya?

¹⁰Nonguno atsala, aqhi, atusho eno ampe hamilo tsaquyi pinyi cheni!

¹¹Ino nongu gholo aghimeshi mlachekeu adou shivea keshelapi niye msa ani.

¹²Athikuzumiqo, ino nongu qhuiniju ani, ino kiutoi keno nongu ghi titoi shiluvelo, kughengu niye nongu toi shive kehu. Nonguye ishou kiumu akumou shipuamoe,

¹³nongu ghi kumsulu aghi nanike, iphilo kusukini sholukeu lono nongu vilo atsakiviu pikulha nikeu dokivi atughiu ithuluke.

¹⁴Ino kusukini shi aji puakeu ghenguno nongu gizulo pejukeu lakhi shive ikeghi nonguye iju kuchhubemo momu ipevemoke, ikemu nonguno Alhou wu kungumi lakhi momu Jisu Khristo sasulu akeshi ni ikhiluke.

¹⁵Nongu mlo kiqishi achekeu hu itehiye kiu shivea kya? Kughengu ino nongu zuqhushi hipau shepe shitsulu nanike: nonguye nongu nhethi lejo suwo itsuvenishi acheke.

¹⁶Ike itehiye ino nongu vilo kuchou tsa pike ghenguno nongu ghumi shiveape kesha?

¹⁷Timi hupaqoye nongu lau shishe amlo tsuani, ikemu panongu kukumsuye akivi xapu amoe. Panonguye ilauno nongu pelo kututa shivepe nishi anike tishianguno nongu pelo panoqo lau amlo tsuwuve peniye shianike.

¹⁸Ino nongu gholo akelo likhino kumo puzu kiukiumu akivipu kukumsu ghenguno amlo tsuqhiyi cheghi aye tiye pulhapuju aloke.

¹⁹Ino kimiyechekemi anuliqo, totimino apunu kusu suakeshi niye itaghi nongu lolo Khristo lhoaye gholumoke kutolo nongu ghenguno ino ime suani.

²⁰Niye nongu gholo kumtsa anishi ani eno kutau ghola lono nongu junishi ani, kughengu niye nongu pesu kiu shivetsumono anie!

²¹Ivilo pilo, nongu khunoqono Ayezah qholo anishi cheni keno hi Ayezah lo kiu yepuani keno chimla aphikesha?

²²Ishi pipuakeuno Abraham no anu kini achekelo lakhino amishiu nu eno lakhiuye anipu kuchou nuke.

²³Amishiu nuye timi lhoayeh ghola lono punuke, ikemu anipu kuchou nuye Alhou no tushoqhi puakeu lono punuke.

²⁴Ike hiye kichekipiye lakhike: totimi hipamaye puloshoqhi kini huke. Lakhiye Sinai Naghuto kudauno, tipau nuliqoye aquaxemi shi punu cheni, tiye Hagar ke.

²⁵Hagar ye Arabia lo Sinai Naghuto kumlhoke, eno itodolo Jerusalem phughiye li kumlhoke, kughengu Jerusalem ye tile akemiqo sasu aquaxemi shiani.

²⁶Ikemu anipu kuchou huno kungughalo akeu Jerusalem kumlhoke, liye ningu zake.

²⁷Kughengu kuchoyesulo ishi yepuani: “Anuhau totimio, noye atianuli kuha namu alovi alo! Noye apunu kusu sujumo namu, alokivi launo ighamuku alo! Kughengu akimi sasu kughuna akeu totimi nguno jumuve keu totimi huno atianuli alau kutomo anani.”

²⁸Ikehu ningu athikuzumiye Isak toi Alhou no tushoqhi puakeu tianuliqoke.

²⁹Ike wovekeu ghulokilo timi lhoaye lono punu keu nu huno Alhou Ghungu kudauno punulukeu nu shikighime cheke toi, itehi ghi titoi anike.

³⁰Ikemu kuchoyesulo kiu pipuani kya? “Aquaxeliu ngo linu pama haphevelo, kughengu aquaxeliu nuye anipu kuchou nu sasu amheghi ighikuqha pemo nani.”

³¹Tishiaye, athikuzumiqo, ninguye aquaxeliu nuliqo kumoe ikemu anipu kuchou nuliqo ke.