Read Sumi Naga GALATIAMI 5 Bible Online

GALATIAMI 5 - Sumi Naga bible

GALATIAMI 5

¹Khristo no ningu kuqhophevae. Tighenguno kuqhopheveke toi akumtoshi puthugholo eno itaghi aquaxemi makho lo kitime kithe kevilo.

²Ni Paul no nongu vilo piakeuno tsala nonguno aphighu yiko ghavepeaye Khristo ye nongu vehupu kuhamitheke.

³Khunoqono pa likhi pa kughape aphighu yiko ghavepe anikeno tipau vilo ino ghuttu kithe akeuno tipaqoye Ayezah kuchopu pelumoaye saputsake.

⁴Nongu khunoqono ayezah papelukeu lono Alhou lau achipikaluniye pukaputsa ani keno panonguye Khristo launo kututa shisu wuvae, nonguye Alhou wu kupukini launo ikiqivae.

⁵Ningu lajupuye Alhou no pa lau ningu pelo achipikalu penikeu ke, eno Alhou Ghungu no nikupulu vechewo mla akeu lono ninguno tipau khe acheni.

⁶Kughengu ninguno Khristo Jisu sasu kimepe ani aye aphighu yiko ghana ghamonamu aphiphi ke, ikemu Alhou wu kimiyekini vechewo mla keu kupulu huno akhotoke.

⁷Nonguye aloqhiyi checheke, khuno nongu hachileve puzu nonguye kuchou tsa pape movepe kya?

⁸Khuno nongu zuluve kya? Tiye nongu kulukeu Lhou launo kumoe.

⁹Kholaqhi kitilano asho muqo kuchopu ingu ipeghilu chenipe.

¹⁰Ikemu Ampeu gholo ningu xukimepe akeu lono niye nongu shou imlo itha mphike nonguye ino kumsu akeu nguno kutau kumsumo nani. Khuno nongu mlo shipusatsu anikeno Alhou no pa shou kughathabe nani.

¹¹Ikemu athikuzumiqo, tsalanomu aphighu yiko ghakeu akhoto kepi ino pikulha cheghi aye kushiye ishikighime apeni kya? Ino tipau pikulha aye Khristo kros ghili pikulha chekeuye kiumu kupunamo venicheke.

¹²Timi khunoqono nongu punaqhi anikeno tipaqo pelo pututa phighu pichive [1] penishi!

¹³Athikuzumiqo nonguye kuqhophevekeulo kuluvae, ikemu nonguye kuqhopheveake pi tino ajeku kivi shiveno nongu shiaji pulou gho shikevilo, ikemu Alhou kimiyekini vechewo nongu lakhino lakhi qekilelo.

¹⁴Kughengu ayezah kumtsu atsa hipaulo shikupu ani, tiye: “Okisughumi olikhi otoi kimiyelo.”

¹⁵Ikemu nonguno tughashi toi lakhino lakhi mikiqhi eno ghuzakile aye lakhino lakhi kutsavemoni mala jualo!

¹⁶Ikemu ino hi piani: Aghungu pelo nongu sakicheu shipelo eno ashino mine chekeu ghapiqi tsu kevilo.

¹⁷Kughengu timi lhoayeno minekeuye Aghungu no shipenishi keu launo bidelauke; eno Aghungu no kiu shinishi keno timi lhoayeno mine keu launo bidelauke; kughengu hikumaye lakhino lakhi sasu kumghokile cheni eno tipau kiqiye nono kiu shinishikeno tipau shipemoniyeke.

¹⁸Ikemu Aghungu no osakicheu shipeaye noye Ayezah qholo ngoamoe.

¹⁹Timi lhoayeno shichekeuye mutsuqhei hi anike: kipti toti dolo shipixi kile, kusakugha, jukusa kumla kughutha,

²⁰ajulho kumlla, atumu, kimthikile, anhekushu, amlokighide, alikhi asala kuphu, kotha kilekeu, kuqhakumla,

²¹aghichikupo, shokumzu, zuti-zugha kuxu eno titoike jeliqo. Ino azuuno nongu kutughuve ketoi itaghi nongu kutughu ani, khunoqono hipaqo shi cheni keno Alhou yehkipe ighi lumo nani.

²²Ikemu Aghungu xathiye Alhou launo ighikeu kikimiye, alokiqi, alokivi, kheakulu, alokeu, akivi, pichebekulu,

²³mtsha-ivukeu eno kusuqhikulu. Hitoikeqo shou ayezah kumu kuhae.

²⁴Khunoqono Khristo Jisu wu shiveakeno panonguye timi lhoayelo ngosukumla ngo minechekeu jeli kumtsu kros lono pithivae.

²⁵Ninguno Aghungu lono xucheghi aye, Aghungu lono checheni nolo.

²⁶Ningu qhezamoni momu lakhi no lakhi xukuthomoni momu lakhino lakhi jupe anheshumoni nolo!