Read Sumi Naga EFESIAMI 6 Bible Online

EFESIAMI 6 - Sumi Naga bible

EFESIAMI 6

¹Atianuliqo, nongu pu-aza gholulo, oghenguno hino Ampeu wu timiqo kumlapu sajeke, kughengu tishikeuno achipike.

²“Opu oza sumsalo” (hiye ahza tsukeu gholo kukumgha sukuqhatsukeu atughiuke).

³“Tishianguno noye akivishi apenike eno ayeghilo axushu penike.”

⁴Apu-azanoqo, [2] nongu tianuli mlo shikighide tsukevilo, ikemu Khristomino qophechekeu eno kutsuchekeu ghola lono panongu saputhulo.

⁵Aqu-axemiqo, Khristo qe akeshi akumsa akuighu eno amlo lakhi xapusu ayeghilo nongu shou ampemiqo ghokulu shilo.

⁶Timi lokiqipu shichekemi toi nongu shou ampemi nhekithelo likhino shikevilo ikemu Khristo qemi kehu amlo kuchopuno Alhou pulou kiukeno tipau shilo.

⁷Akukumsu kivi pupuzu timi qe amono Ampeu qe akeshi nongu kumla tsaqutsaleyi shilo.

⁸Aqu-axemi na aqu-axemi kumo namu pano akumla kivi shipuakeu Ampeu no tipau pa tsuchile nani kepi ithilo.

⁹Amipemiqo, pivekeu toi nongu ghi nongu qu-axemi peitha pivilo, eno aqu-axemi kichi kevilo. Kughengu panongu eno nongu wu Ampeu ye kungughalo anikepi kumsululo, paye timi kumtsu aphiphishi peitha chenike.

¹⁰Ashekhashi hi ithilo. Ampeu gholo xukimepekeu lono eno pa kuka kumtono nonguye mutotoi alo.

¹¹Tughakusa muqu mugha lhoksa shou nonguno puthugho luve kepushi Alhou launo ighikeu ghunanu kumtsu pepu alo.

¹²Kughengu ninguye timi sasu kupughu amoe ikemu ayehkipemi, atomi, hi akuzu tiqheli yeghiqha yehkipeqo eno kungughalo aghakusa ghahwu kukaqo sasu kupughu anike.

¹³Tighenguno Alhou launo ighikeu ghunanu kumtsu ikhilulo, tishianguno alhoksa tsala ighikelo nonguno ithamono mujochilelu nani, eno ashekha kutolo kupughu apuzu nonguye ithamono aghilu nani.

¹⁴Tighenguno ithamono puthugholulo: amikucho pesu nongu pokha shipulo; achipiu pesu amla kukuzupu shipulo;

¹⁵eno lokivipu tsa pikulha nike kutope akeu pesu nongu pukhu qhopulo.

¹⁶Hipaqo kumtsu nguno alauno akupulu pesu nongu zuto shilo, nonguno tipau pesu Alhoksau no ami kuiyiqu piji vepuwukeu kumtsu ghapinhelu nani.

¹⁷Xakulupu pesu akutsu qhopu lulo, eno Alhou tsa pesu Aghungu lo zutakikihi shi ikhilulo.

¹⁸Ado aghuloki kumtsulo Aghungu no sapiyekeu lono Alhou vilo qhuiniju ghi pulhapuju inikhu chelo. Tipau kimji lono tsukhuyi shialo eno khilemu kughucho kevilo; Alhou wu timiqo ghenguno khuini tsualo.

¹⁹Ighenguno ghi inikhu tsualo, tishianguno ino pikepu shikelo Alhou no pikulupu itsupe nike eno ipelo musa ighumono tuqhou tsakiviu pesu asheshulupe nike.

²⁰Kughengu hi ghenguno niye akughu shianamu lashikamike. Niye pimayesa putsake ghenguno ipelo musa ighumono pilupenike inikhu tsulo.

²¹Itehiye nongu ghi niye kiutoi ani eno kiu shianikeno ithinishi aghi nanike, kimiyechekeu nithikuzuu eno Ampeu kumlalo pukhubekulu shi mlachekeu Tukhika no thwokha nongu vilo pitsu nani.

²²Akhotoshi hipau vehu ghenguno ino nongu lau pa puwu ani, tishi keu lono ninguye kiutoi ani keno nongu pelo ithipeniyeke eno pa pelo nongu mlo shikuloghi tsupeniyeke.

²³Apu Alhou eno Ampeu Jisu Khristo no alokiqi ngo kimiyekini eno akupulu athikuzumiqo tsupeniu.

²⁴Thimlakeu kimiyekini lono ningu Mpeu Jisu Khristo kimiyechekemiqo shou Alhou wu kupukini apeniu.