Read Sumi Naga FILIPIAMI 1 Bible Online

FILIPIAMI 1 - Sumi Naga bible

FILIPIAMI 1

¹Khristo Jisu qemi Paul ngo Timothi pamano Filipia lo Alhou wu timiqo ngo akukuholo pastormi eno dikonmiqo lau yehani.

²Apu Alhou ngo Ampeu Jisu Khristo launo kupukini ngo alokiqipu nongu shou apeniu.

³Ino nongu kumsuluke kumtsulo niye iLhou shikimthi acheni;

⁴ino nongu ghenguno inikhuke kumtsulo niye alokivishi inikhu acheni,

⁵kughengu atughiu tsala lono ishi kutolo atsakiviu pikulhakeu kumlalo nonguno igholo ime kuqha achenike,

⁶Ino mutsuqhei ithi akeuno khuno akumla kivi hipau nongu lolo huthuvetsu keno Khristo Jisu Tsala kutolo pano shikupu tsu nani.

⁷Nongu kumtsu ghenguno ino hitoi kumsupu akeuye achipi ke, kughengu nonguye pulhapuju imlolo achenike. Kughengu ino itehi akughu shiakelo ngo ino atsakiviu susho eno iyiqhi kumto chekelo ghi nongu kumtsuno igholo Alhou kupukini kusajejukemike.

⁸Alhou no thopiu shi anike, niye Khristo Jisu mlo ighiqhiyikeu pesu nongu kumtsu sasu kusho nishikeuno imlo kukushi anie.

⁹Nongu ghenguno ino inikhutsu akeuno nongu wu kimiyekiniye akighithi ngo achipiu xakutha alau thuwulu peni,

¹⁰tishianguno nonguno akiviu kiu keno kishelu nani eno Khristo Tsalalo nonguye muqhamiqhiyi eno tukutiye kuha nanike.

¹¹Alhou jekipipu eno shekiqhepu ghenguno Jisu Khristo lau likhino ighichekeu mikucho xathino nongu shepichhiluve nani.

¹²Athikuzumiqo, ino nongu pelo hi ithipe nishi ani, ishou kiu shivekeno tipau huno atsakiviu iko ikukithe kepu shiluveke.

¹³Tishikeu lono Aghukhemi eno hilau akemi kumtsuno niye Khristo qemi lakhi keghenguno akughushi anikepi ithi khavae.

¹⁴Ino akughu shiakeu huno athikuzumi kutomo pelo Ampeu lau amlotsukeu shiluanipe, eno musaighumo puzu Alhou tsa pikulha nikeulo alau shi mutotoi lu anie.

¹⁵Panoqo gholo khamiye anhekushu eno akukuxu lono Khristo pesu pikulha cheni ikemu khamiye amikucho shi pikulha cheni.

¹⁶Hipaqoye kikimiye lono shi cheni, kughengu atsakiviu sushopeniye Alhou no ipelo hile anipe kepi panonguno ithi ani.

¹⁷Ikemu kutamiqoye amikucho lono kumono alikhi ampi kuloghipu mlo xapusu Khristo pikulha cheni, eno ino akughu shiakelo alau ighimeqhi nikeu kumsu cheni.

¹⁸Tishiepimu kumukumoke! Kuchou mlo lona akumou mlolo namu alaghi thwokha shiluke thaqhu lono Khristo pikulhake, tino niye alovi anike. Eno niye alovi anani,

¹⁹kughengu nonguno ighenguno inikhutsu keu eno Jisu Khristo Ghungu kukuphu vechewo niye khaqhiphevepe nani kepi ino ithi ani.

²⁰Kughengu ino khekulhoshi kumsupu eno laju achekeu ye ino shikepushi akeu tomoveno kujovemo niyeke, ikemu pulhapuju shicheketoi, eno akhotoshi itehighi niye amlo kumtono chhitoi shino, thikepu shina xukepu shinamu iphimpi hipau lono Khristo jekipipu shitsu nani.

²¹Kughengu ino xuakepu shiaye Khristo la shinia ikemu thivekepu shiaye ila shiniake.

²²Ikemu xuape kepushi aye, niye ame kuapu kumla alau shilu ananike. Ike khikhiu kishelu kepu keno niye pimlae.

²³Hikuma dolono itsakibipe anie. Ino shinishi akeuye hipa kuxu qhiveno Khristo gholo auvenishi, kughengu tiu pavi kuchouke.

²⁴Ikemu ino xuaghikeuno nongu ghenguno alau avehupu shianike.

²⁵Nongu pelo ikowolu eno akupulu lokivi alupenike ghenguno niye nongu gholo xu anani kepi ithi ani,

²⁶tishianguno nongu ghi igholono Khristo Jisu gholo shishe akijivilo kepu shilupenike, kughengu itaghi ino nongu lau ighi nanike.

²⁷Akhotono nongu kuxu gholalo Khristo tsakiviu ghenguno kiu akuzupu keno tipau shilo, tishianguno ino ighino nongu sasu kusholuna kushomla namu, nonguye amlo lakhi shipe puthugho akeu, eno atsakiviu kupulu ghenguno akukumsu lakhi shino pukaputsa akeu ipelo chilupelo.

²⁸Kiulonomu nongu ghumi pelo nongu shikumsavepe kevilo. Panongu kutsave nikeu michipuye tipaulo anike, ikemu Alhou kudauno tiye nongu xakulupuke.

²⁹Kughengu Khristo jelono nonguye pulube nikeu likhi kumono pa ghenguno aghime shinikepu dokivi kophepe nongu tsuke.

³⁰Tishiaye, ino aghushi chekeu nonguno ithulupuakeu eno niye tishi shi chephi kepi nonguno chiluakeu ghushilo nongu ghi chhosulo.