Read Sumi Naga FILIPIAMI 3 Bible Online

FILIPIAMI 3 - Sumi Naga bible

FILIPIAMI 3

¹Ithikuzumiqo, ashekhashi Ampeu no nongu loshipivitsu pelo. Ino pive keu yekithenike niye kiumu azukuzu kuhae, tiye nongu ghenguno akivipu ke.

²Kusakugha shichekeqo, ti atsuqo jukuto alo, ti aphi ashi ghathamasa kepi pichekeqo jukuto alo.

³Kughengu kuchouno ninguye aphighu yiko ghakemiqoke, kughengu ninguye Aghungu Kimthe lono Alhou mlla cheni, Khristo Jisu lono nikijivilo acheni eno timi lhoaye pesu shikulu pukhupe achemoe.

⁴Monimoaye, timi lhoayeh pesu shilukeu niye pukhukepu alau anike! Khualano timi lhoayeh pesu shilukeu pukhukepu ani aye, niye tinguno shilukepu anie.

⁵Niye punuwo akutachenino aphighu yiko ghaveke. Israilmi lakhi shighi ipunuke, Benjamin lagha ke, Ibrimino punukemi Ibrimi lakhike. Judami yezah pepukeu ghola lono piniaye niye Farisimi lakhike,

⁶eno azukini shichekeu lono piniaye niye akukuhou shikighimeqhi chekemi lakhike. Ayezah pelukeu lono amikucho shikulupu shiaye niye tukutiye kiumu kuhakemie.

⁷Ikemu ino kiu alla shilupuaghi namu Khristo ghenguno tipaqoye adou kepi ino kihivae.

⁸Tike kumo puzu, Khristo Jisu ye iMpeu ipi ino ithilukeu huno amekushou shikelauno kutau thwokha adou kepi ino kihivae. Ikemu pa ghenguno thime kumtsu phevae eno tipaqoye xinexigha kepi kihivae tishianguno niye Khristo pesu isaxu shilunikehu

⁹eno pa gholo kuqhaluve niyeke. Ayezah papelukeu lono ilikhi iwu shilukeu mikucho pumono Khristo shou akupulu bekeu vechewo amikucho shilukeu anike, tiye Alhou launo ighikeu mikucho akupulu shou bepe akeuke.

¹⁰Ino pulo chekeuye Khristo ithini pa xuputhuvekeu kuka ithi, pa ghimeqo kusaje eno pa kithi gholono pa kimihi shiwuniyeke,

¹¹tishino ino laju akeuye akithi lono ixuputhutsu peniyeke.

¹²Niye hipau toluvea kepi piamoe momu kupukulayiluve ake kumoe, ikemu tipau iwu shiluve nike wucheni, kughengu Khristo Jisu no ni pesu pawu shiluve ake.

¹³Athikuzumiqo, niye tipau toluve akepi kumsu amoe, ikemu ikuxulo thime lakhi hipau shi cheni, ithikhau kiu anikeno kumsumave cheni eno azuu kiu ani keno tikudau tonike wucheni.

¹⁴Ike niye akimiji kudau vejoi pokive wucheni tishianguno asaxu qeluniyeke, asaxu tiye Khristo Jisu vechewo Alhou no kungugha kuxulo kulukeu ke.

¹⁵Ningu khunoqono akupululo tekhoyivea keno tikithipu kumsukepuke; eno nongu gholo khamino kiuwala kutau kukumsu aghiaye tighi Alhou no nongu lau piye nanike.

¹⁶Tishiaghie pimu, ninguno kiu toluveakeno tipau yeh qhemi pesuno ninguye azuu hasu wuni nolo.

¹⁷Athikuzumiqo, nongu kumtsu ino kiutoi shi cheni keno titoi shilo. Ninguno nongu ghenguno kichekipiye achipiu shipiye puatsu ake; ikehu khunoqono ningu toi shicheni keno tipaqo tsaquyi jukutolo.

¹⁸Ino nongu vilo ghuthu kutomo pivea eno itaghi anhezu pijighi tipau pikithe ani ike timi kutomono Khristo no kros lo thivekeu ghumi shi xuachenike.

¹⁹Panonguye ashekhalo kutsapiniyive nikeuke, panongu kive kichhipuno panongu lhou shi acheni eno panonguno kujokepu pesu akijivilo acheni eno panonguye hipau yeghilo nhemgha shou likhi kumsupuku acheni.

²⁰Ikemu ninguye kungu ghakhumike, ninguye ni Xakuluu Ampeu Jisu Khristo kungugha lono ighinikeu khekulhoshi ani.

²¹Pano ningu phimpi hi thivenikuau pesu pa phimpi akimthe jukuvupu kimihi toi kilivetsu nani, tiye pano thwokha pa yehkipe qholo saghilukeu kuka hu peithano shitsu nani.