Read Sumi Naga KOLOSIAMI 1 Bible Online

KOLOSIAMI 1 - Sumi Naga bible

KOLOSIAMI 1

¹Alhou pulou lono Khristo Jisu wu apostolmi shiluvekeu Paul, eno ningu thikuzuu Timothi pamano

²Kolosia lo Khristo lono Alhou timi eno puluqhiyi chekemi athikuzumiqo lau ye ani.

³Kughou ninguno nongu ghenguno inikhu nikeno ninguye pulhapuju ningu Mipeu Jisu Khristo paPuh Alhou shikimthi acheni.

⁴Kughengu Khristo Jisu gholo nongu kupulu akeu eno nonguno Alhou timiqo kumtsu lau kimiyekini akeu ninguno chiluvae,

⁵tiye laju apenike ghenguno kungughalo kikepesu anike. Hipau lajupuye atsakiviu sutsa kuchou nongu lau ighi tughi lono nonguno chiluvae.

⁶Nonguno Alhou wu kupukini hu kuchou kepi chilu eno ithi kuthuluke tsala lono nongu gholo athi pithilu eno thuwulu akehutoi, ayeghiqha kumtsu atsakiviuye athi pithilu eno thuwulu ani.

⁷Nino kimiyechekeu eno akusau aqeu Epafra no hipau nongu kutsupiyeke, paye ningu zuqhushi Khristo ghenguno pulubekulushi mlachekemi lakhike.

⁸Aghungu Kimthe no nongu lolo kikimiye tsuakeu pano ningu pithike.

⁹Ikehu ninguno tipau chiluke tsala lono ningu ghi tamono nongu ghenguno inikhutsu ani. Alhou pulou kighithi eno tipau ithikuthulu kepushi Aghungu no tsukeu lokutsu pesu nongu lolo sutsupe nike ninguno inikhutsu anike.

¹⁰Tishino nonguye Ampeu pulou lono ame kua kuxu xulu, pa lokiqipu shilu, akumla kivi kumtsulo athi pithilu eno Alhou kighithi alau shilu ishi nanike.

¹¹Pa kimthe jukuvupu kumto launo ighikeu kuka kumto kumtsu pesu nonguno mutotoilu peni, tishianguno nonguye kheakulushi thwokha puqhelu penike.

¹²Eno alokivishi Apu shikimthi alo, pa kuvu kukaqhalo pawu timiqo ghenguno amheghi iyighilupe nike pano nongu pelo akuzupu shilupeke.

¹³Kughengu pano akuzuno qhasupe akeu lono ningu xapheluke eno Anu pano qhuyivulai chekeu yehkipe qholo ningu sasu ighike,

¹⁴pa gholono ninguye xachile kulupushi axine pevetsukeu anie.

¹⁵Khristo ye ithukumlau Lhou jukimihi ke. Paye lhophe puakeu kumtsu gholo anoghiuke.

¹⁶Kughengu pa su-puzu kungughalo, ithukulu, ithukumla, akuka lakhu, ayehkipe qha, ayehkipemi eno ayehkipeqo namu kumtsu Alhou no lhopheke. Thwokha pano lho eno pa vehupu ghenguno lhopheke.

¹⁷Paye kumtsu zuuno acheghi eno pa gholo akeu lono thwokha tsuqu kumqope ani.

¹⁸Pa phimpiye akukuhou eno paye tipau kutsu, paye abothu, paye akithi lono xuputhuvekeu Nu anoghiu, tishianguno thwokhalo pano akuchuquu shipeniyeke.

¹⁹Kughengu Alhou no Anu lolo Alhou lhoayeh kumtsu apenikeu shike,

²⁰eno Anu vechewo thwokha pa lau sachile saghi nikeu shive. Pa Nuno kros lo thivekeu vechewo Alhou no ayeghi shou ngo kungughalo akeu kumtsu sawo pa sasu kulashivepeke.

²¹Ghuthu lakhilo nonguye Alhou launo tsusumi shicheke.

²²Ikemu itehiye, pa Nu no timi shiahji puakeu pithivekeu lono Alhou no nongu pesu pa shounoqo shivetsuke, tishi anguno nongu pelo akimthe, mutsumisheyi eno tukutiye kuhano pa zulo saghiniyeke.

²³ikemu nonguye akupululo aboqha kumto shou mutotoi achemoayesake. Nonguno atsakiviu chilu puzu lajupu tsukeu lono iqevekepu kumoe. Atsakiviu tipau huye ayeghiqha kumtsu asheshuvae, eno ni Paul pelo hipau peithakutsumi lakhi shipeke.

²⁴Nongu ghenguno ino aghime sholukeulo niye itehiye alovi ani. Kughengu iphilo aghime sholuakeu vechewo Khristo no pa phimpi, akukuhou ghenguno aghime shikepushi akeu ino shikuputsu anike.

²⁵Nongu kivipu ghenguno Alhou launo ighikeu kumlapu saje hipau shipeniye Alhou no ipelo akukuhou peithakutsumi lakhi shipeke. Hiye Alhou tsa pithikuthu tsupeniyeke,

²⁶hiye wovekeu tiqhelilo timiqo launo kusupe puachekeu tuqhou kukughu huke, ikemu itehiye timiqo lau pephepiyevae.

²⁷Kughengu Alhou kukughuye hike: pawu tuqhou pesu timiqo pithiniyeke, ike tiye Judakumomi kumtsu ghenguno kinikulupu eno akimthe jukuvupu shi tuqhou pano puakeu huke. Tuqhouye hike: Khristo ye nongu lolo ani, eno tipau kiqiye Alhou kimthe jukuvu kusaje nikeu lajupu anie.

²⁸Ikehu ninguno Khristo pesu asheshu cheni, alokutsu kighithi jeli pesu kumtsu kutughu acheni eno kumtsu shika acheni, tishianguno milakhikhino Khristo gholo akeulo tekhoyivekemi shipesu Alhou zulo qhitsuniyeke.

²⁹Hi shiluniaye, Khristo no tsukeu kumto kuka ilolo shishe hakitetsu akeu peitha puzu ino pukaputsa ghichheghime shi acheni.