Read Sumi Naga KOLOSIAMI 2 Bible Online

KOLOSIAMI 2 - Sumi Naga bible

KOLOSIAMI 2

¹Nongu Laodikiami, ino kujuthumlano achekemi kumtsu ghenguno ino shishe pukaputsa mlachekeu nongu pelo ithipenishi ani.

²Tishianguno panongu mlo kuloghi shilupe, kimiyekinilo ghokumqolu eno ithikutolu keu lono sughiche keu kinikulu kumtsu alupeniyeke. Tishikeu lono panonguno Alhou wu tuqhou ti Khristo ithilu nani.

³Khristo gholo Alhou lokutsu eno akighithi khuki kumtsu kusupe puanike.

⁴Ino nongu vilo hi piani tishianguno khuu pelomu kichiletsa pikithi pesu nongu pishiqhi sawuve pemoniyeke.

⁵Kughengu niye aphimpi loye nongu launo putosupe anamu amlo loye nongu sasu anike, eno nonguno akivishi kithikiyi akeu ngo Khristo lau nongu kupulu ithamono akeu ithulu puzu alokivishi ani.

⁶Nonguno Khristo Jisu ye Ampeu kepi ikhiluve ketoi pa gholono xuchelo.

⁷Pa gholono nongu kuhu qusulo, nongu kuxu shiqhepuku chelo, nongu kutsupiyeve ketoi akupululo mutotoi thuwululo eno shikimthi keuno qochili alo.

⁸Khristo launo sughikeu kumoaye timino pekishe kutsupiye sughikeu momu tsutsu yeghiqha ghahwu yehkipe launo sughikeu kighithi ngo kichiletsa pesu nongu kughasuwuve pemonike jukuto alo.

⁹Kughengu Khristo philo Alhou lhoayeh kuchopu kupu anike,

¹⁰eno pa gholo xukimepe akeu lono xukuchopu lukepu nongu tsuvae. Paye akuka eno ayehkipe kumtsu shou akughushuuke.

¹¹Pa gholo xukime akeu lono aphighu yiko ghavae tiye timino shichekeu gholano kumoe, ikemu Khristo no shikeu ghola lonoke, eno tiye alhoayeh aqauqo shichekeu xapevekeuke.

¹²Kughou nongu baptiz shitsu keno nonguye Khristo gholo qhoveke, eno baptiz shitsukelo nongu ghi Khristo gholono peputhuvae, tiye Alhou no akithi lono Khristo xuputhuvekeu kukano mla akeulo nonguno akupulu akeu lonoke.

¹³Nongu xine ghenguno ngo Judakumomi aphighu yiko ghamokeqoye Alhou kudauye thi acheke, ikemu itehiye Alhou no Khristo gholono nongu puxuvetsuae. Alhou no ninguno hekibide xine shivekeu kumtsu pevetsuae.

¹⁴Ninguno kukhakulo kepushi akeu yezah pano ikhi vetsuae, kros lo pa yedavekeu lono qhivetsuke.

¹⁵Khristo no kros tipau lono aghahwu yehkipemi ngo akumtomi ipichekeqo kuka liluvetsuke; eno pano tipaqo shou toluvekeu aqha pelo jupeniye tipaqo shekujojo sawuke.

¹⁶Tighenguno timi khuu pelomu chuqu kusho tiqhetini tsala pinyikeu aqhi kithe pinyikeu momu Sabat pinye ghenguno nongu shou ayezah betha pekevilo.

¹⁷Hipaqoye kiu ighini cheni keno tipau yekukhuke, ikemu ampi kuchouye Khristo ke.

¹⁸Timi khamiye alikhi ampi jukuchhube keu eno kungumi mllakeulo amlo tsuqhiyi acheni eno kungunhetsuno akhotou shicheni. Titoi kemiqoye hipa yeghilo timi kukumsu pesu akiqi kiumu kuhamu akuchhoma shi acheni. Timi tipaqo pelo nongu kideqhive pekevilo.

¹⁹Timi tipaqoye Khristo, khuno akutsu keno pa tsuqupe chemovae. Khristo launo atuqhu ngo anhuqo vechewo aphimpi kuchopu kutshukimepe eno aphilo kudapu shilu cheni eno Alhou no thuwupe nishi kehutoi thuwulu cheni.

²⁰Nonguye Khristo gholo thive puzu tsutsu yeghiqha ghahwuqo yehkipe launo kuqhopeve aye, nonguye kushiye hipa yeghi laumi hutoi xucheni kya? Nonguye kushiye,

²¹“Hi peithakevilo,” “Tipau micheju kevilo,” “Kutau bukevilo” ipichekeu yezah qhoqhu cheni kya?

²²Hipaqo jeli kumtsu peithathuve aye avehupu kuhave chenike. Hipaqoye timino mlakeu yezah eno akukutsu likhike.

²³Hipaqoye achineyehlo amlo tsuqhiyilupe eno alikhi ampi jukuchhubelu eno aphimpi pughuqhilu penikeu lokutsupu toi ithulu aghiluvi, ikemu tipaqoye, ashi ajilo ngosukumla ghasukulume kiumu ithi chemoe.