Read Sumi Naga KOLOSIAMI 3 Bible Online

KOLOSIAMI 3 - Sumi Naga bible

KOLOSIAMI 3

¹Nonguye Khristo gholono xuputhu puaghi aye, khilehi Khristo no Alhou u-ajeu akuka lakhulo iqa anikeno, ti kungughalo akeqo thime shou nongu mlo belo.

²Kunguu thime shou kumsupuku alo eno ayeghilo thime shou kumsupuku akevilo.

³Kughengu nonguye thive ake eno nongu kuxuye Khristo gholono Alhou no kusupe anie.

⁴Nongu kuxu kuchouye Khristo ke, eno kughou pano ipeghini keno tileno nongu ghi pa gholo ipeghi nani eno pa kimthe jukuvupu kusaje nani!

⁵Tighenguno nongu lolo ayeghilo minechekeu hu pithivelo, hipaqo toike: kiptimi totimi dolo mithekumo, kuchhube kutsula, ngosukumla, aghichikupo eno alakimine (kughengu alakimineye ajulho mllakeu ghola lakhike).

⁶Hipaqo shikeu ghenguno Alhou loghuye pa hebidekemi shou ighi nani.

⁷Kughou nonguno hikithipu kuxu xuchekeno nonguye hipaqo lono kutami toi xucheke.

⁸Ikemu itehiye amlo kighide, aloghu, akimthi, kuthakugha nongu kichi lono xikishi tsa pikeu kumtsu peve khavelo.

⁹Lakhino lakhi lau akimki tsa pikevilo; nongu lhoayeh aqau pepimhe chekeqo qhive akehu.

¹⁰Hiye pa lhokusuu Alhou no pa ghili ithiluve peniye tamono pa ngulho kimihi lono shikithetsu acheni.

¹¹Hipau kuxuloye Grikmi, Judami, aphighu yiko ghakeu, ghamokeu, ayekumthami, akupusho akuxulo achekemi, aquaxemi momu timi qechemokemi ipi kututa shiakepu kuhae, ikemu Khristo ye thwokhalo ke eno kumtsu gholo anie.

¹²Alhou no nongu kimiyeno, pawu shipenike kisheluvekemi akehu, kimiyeqhiyikeu, kutami kupukeu, akumtsha, akughuvu eno kutuukulu pepulo.

¹³Lakhino lakhi shou mopikepu aghikelo pinamu palokutovetsu eno akipimi pevetsukilelo. Ampeu no nongu kipimi qhivetsu ketoi nongu lakhino lakhi kipimi qhivetsukilelo.

¹⁴Hipaqo kumtsu nguno alauno kikimiye pepulo, kughengu kikimiyeno thwokha, kupukulupushi tsugha kuqhatsu cheni.

¹⁵Khristo launo ighikeu lokiqi pelo nongu mlolo ayehkipe shipelo; hipau lokiqipu ghenguno Alhou no aphimpi lakhilo nongu kukumqoluvae; ike Alhou shikimthi chelo.

¹⁶Khristo tsa pelo nongu lolo kinikulushi achepelo. Alokutsu kighithi kumtsu pesu lakhino lakhi kutsupiyekile eno aloshiputsukilelo. Nongu mlolo Alhou shikimthi keu xapusu leshele, akishele eno aghungulo le phelo.

¹⁷Tishiaye atsa lona akumlalo namu nonguno kiukiu shini keno, Ampeu Jisu vechewo Apu Alhou shikimthi ghi thwokha shilo.

¹⁸Anipunoqo, nongu kimi qhoqhulo, kughengu nonguye Khristo timi kehu tishi shimasake.

¹⁹Akiminoqo, nongu nipu kimiyelo eno panoqo shou mughachhoyi shikevilo.

²⁰Anuliqo, pulhapuju nongu puaza gholulo, kughengu tiye Ampeu lopivipuke.

²¹Apuazaqo, nongu tianuli ihulo ghasukevilo, panonguno amlo mtomove nosake.

²²Aqu axemiqo, nongu shou ampimi gholulo, eno panongu pelo alovipenike ghenguno panonguno jukuto akelo likhino shikevilo, ikemu nonguno Ampeu sumsakeu lono amlo tsuqhiyi mlaithalo.

²³Okumlapuno kiukiu shiaghi namu timi qeamono Ampeu qeakeshi amlo qiqhiyi mlaithalo.

²⁴Ampeu launo osaxu shighi nono amheghi ithulu nani kepi kumsululo. Kughengu nono qeakeu Ampeu kuchouye Khristo ke.

²⁵Achipikumo kumlamiye khukhumu pano achipikumo shikeu tsuchile nani, kughengu Alhou ye kumtsu aphiphishi peitha cheni.