Read Sumi Naga KOLOSIAMI 4 Bible Online

KOLOSIAMI 4 - Sumi Naga bible

KOLOSIAMI 4

¹Ampemiqo, achipi lono eno aghibiu lono nongu qemi peithalo. Nongu ghi kungughalo Ampeu aphikepi kumsululo.

²Akighinilo tamono mutotoi shi alo, Alhou shikimthighi akighinilo tsukhutsuvai shi alo.

³Ningu ghengu ghi inikhutsu alo, tishianguno ningu pelo Alhou tsape shikulupudo pano kophetsu penike, Khristo wu tuqhou tsa pilupe nike, kughengu tipau ghenguno niye akughukilo anike.

⁴Ino pikepushikeulo mutsumisheyi pilupe nike inikhutsu alo.

⁵Pululumono akemi lau alokutsu shighi ghusho ghili piyemasae eno adokivi aghikeu akivipu shikeu lono peithalo.

⁶Nongu tsapilo pulhapuju mutshaminheyi eno jumughayi shilo, eno nongu vilo inijukemi lakhikhi vilo khokichile achipiu kishi tsukepu keno ithimasae.

⁷Ninguno kimiyechekeu athikuzuu Tukhika no niye kiu toi anikeno kumtsu pesu nongu vilo pi nani. Ni thikuzuuye Ampeu kumla shikeulo nikusami pichebekulumi lakhi ke.

⁸Hilau ninguqo ye kiutoi anikeno pa pelo nongu vilo pipeni eno nongu loshipivitsu penikeu kimiji ghenguno nongu lau ino pa puwu ani,

⁹pa gholo nongu gholomi, kimiyechekeu eno pichebekuluu athikuzuu Onesima puwu ani. Hilau kiu kishi shianikeno pamano nongu vilo kishekulushi pinanike.

¹⁰Igholo akughu shiakeu ikusau Aristarka no petha nongu tsuani, tihutoi Barnaba tikishiu Mark ghi petha nongu tsuani. (Pano nongu lau ighiaye pa ikhilulo ipi pipuwukeu tsa hu nonguye ithuluve aghiniake.)

¹¹Eno Josta ipi kuchekeu Joshua hu ghi petha tsupuwu ani. Alhou yehkipe ghenguno isasu mlachekemi gholo aphighu yiko ghakemi Judamiye hipano kuthu likhike, panonguno shishe ikuphu achenike.

¹²Nongu gholomi, Khristo Jisu qeu Epafra no petha tsupuwu ani. Pa kighinilo pulhapuju amlo tsuqhiyi nongu kumsulu acheni, tishianguno nongu pelo Alhou pulou kumtsulo mutotoi puthugholupeni, tekhoyi shilu peni eno mutsuqheyi shikutolu peniyeke.

¹³Ni ampino pa shepe shitsu anike paye nongu ghenguno, Laodikia eno Hirapoli lo akemiqo ghenguno shishe akumla shi achenike.

¹⁴Nino kimiyechekeu shikipiviu Luk ngo Dema pama ghi petha nongu tsupuwu ani.

¹⁵Laodikia lo athikuzumi akeqo lau petha tsuani. Numfiya eno li kilo akukuho kuchochekemiqo lau niwu petha tsu ani.

¹⁶Nongu gholo yesu hipau phisuve kethiu Laodikia mi kukuhoulo ghi hipau philu pelo; eno Laodikia kudauno yesu nongu lau tsupuwu nanike nonguye tipau phisukepu shilo.

¹⁷Eno Arkhipa vilo ishi pitsulo: “Khristomi kumlapu saje otsupe puakeu shikhavetsu masakepi ithilo”

¹⁸Ni Paul i-u ampino petha hipau yepuku ani. Itshupepuakeu ayikichhe kumsululo! Alhou wu kupukini nongu gholo apeniu!