Read Sumi Naga 1 THESALONIAMI 1 Bible Online

1 THESALONIAMI 1 - Sumi Naga bible

1 THESALONIAMI 1

¹Paul, eno Sila eno Timothi ishino Thesalonia lo Apu Alhou eno Ampeu Jisu Khristo lono akukuhou timiqo lau yelu ani. Kupukini ngo alokiqi nongu lau apeniu.

²Nongu kumtsu ghenguno ninguno pulhapuju Alhou shikimthi acheni eno ningu kighinilo tamono nongu kumsulu ghi ini acheni.

³Nonguno akupulu kumla shikeu, kikimiye eno ghichhe ghime shikeu ningu Mpeu Jisu Khristo lau lakuju mutotoi akeuhu ningu paPuh Alhou zulo ninguno kumsulutsu acheni.

⁴Athikuzumiqo, ninguno ithianike Alhou no nongu kimiye cheni eno pawu shipenike nongu kisheluvae.

⁵Kughengu ninguye atsakiviu nongu lau sughikelo atsapilo likhino kumoe ikemu akuka, Aghungu Kimthe, eno mutsuqheyi ithikuchou shikeu lonoke. Nongu gholo akelo ninguye kishi xuchekeno nonguno ithianike, tiye nongu kivipu shitsuniyeke.

⁶Ampeu no xupiyekeu eno nino xupiyekeu toi nonguno xuke; eno nonguye akijiksa shishe sholukemu Aghungu Kimthe launo ighikeu tsape alokivishi ikhiluke.

⁷Tishikeu lono Makedonia lo ngo Akhaya qhalo kupulumi kumtsu lau nonguno kichekipiye lakhi shivae.

⁸Kughengu Makedonia ngo Akhayia qhalo likhi nongu launo Ampeu tsape shiwu peke likhi kumono Alhou lau nongu kupulu akeu sutsa aqha kumtsulo wuvae, itehi ninguye kiumu piakepu avehu kuhae.

⁹Timi tipaqo ampino ninguno nongu lau ighikelo nonguno kishi ni ikhilukeno piakhani; eno nonguye kuchou eno xuakeu Lhou qenike ghenguno ajulho mllakeu qhiveno Alhou lau ideighivekeu piakhani,

¹⁰itehiye pa Nu kungugha lono ighikeu nonguno huqhekheani, pa Nu Jisu khuu akithi lono xuputhuve eno pano Alhou loghu ighiniye akeu lono ningu xapheluke.