Read Sumi Naga 1 THESALONIAMI 2 Bible Online

1 THESALONIAMI 2 - Sumi Naga bible

1 THESALONIAMI 2

¹Athikuzumiqo, nongu ampino ithi anike ninguno nongu xuju ighikeu huye adouye kumoke.

²Nonguno ithianike, Filipia lo nishikighime eno nishikukujo ghi peitha keghi ningu Lhou no amlo kuloghi ningu tsukeu lono, tilau ghi shishe ningu hakha aepinamu nongu vilo atsakiviu pikulhaluke.

³Kughengu ninguno nongu qhuiniju akeuye akumo akukuhau momu axine shinikeu momu muqumugha laghi lono ku anike kumoe.

⁴Ikemu Alhou no ni ikhikulupu shiaghive eno atsakiviu pesu ipichetsu keu toi ninguno pi acheni. Ninguye timi pulou shiniyeke kumoe ikemu nimlo lhejuchekeu Alhou pulou shiniyeke.

⁵Kughengu nonguno ithianike, ninguye timi shepukakeu momu alakimine venhanikeu tsa peitha chemoe, tiye Alhou no ashepe nitsu anike!

⁶Momu kutami lau na nongu lau namu ninguye timino sheqhepe nikeu phupuamo,

⁷monimoaye ninguye Khristo wu apostolmike ghenguno nongu launo kiu avehupushi akeno khukepu shiake. Tishinike zuqhu, ninguye aza no anuliqo tuchomujo ketoi ninguye agholauno nongu gholo acheke.

⁸Ninguye nongu kimiyekutu kelauno Alhou launo ighikeu tsakiviu nongu sasu kusaje nike kutope acheke likhi kumono nikuxu ampi ghi nongu sasu kusaje nike kutope acheke, kughengu nino shishe nongu kimiye chenike.

⁹Athikuzumiqo, ninguno ghichhe ghimeshi mlachekeu hu kumsululo. Ninguno Alhou tsakiviu pesu kutsu chekelo nongu lakhimu shipunaqhi moniaye ninguye puthopucho akumla shiacheke.

¹⁰Nongu kupulumiqo lau ninguye kishi tukutiye kuhano akimthe eno achipiu shi xuchekeno nonguno ningu shepe shilu nani eno tihutoi Alhou no nishepe shilu nanike.

¹¹Kughengu nonguno ithi anike, apuhno atianuliqo peitha keshi ninguno nongu peithacheke.

¹²Ninguno nongu mlo shikumtotsu, ninguno nongu lokughunotsu eno Alhou no pa yehkipe eno pawu akimthe jekipilo nongu kulukehu pa pulou lono xupenike ninguno nongu hakitecheke.

¹³Ninguno tamono Alhou shikimthi achekeuye hipau ghenguno ghike. Kughou ninguno Alhou tsa pesu nongu lau sughikeno, nonguno tipau initsuke eno tipauye timi tsa toi kumono Alhou tsa toi ikhilutsuke, mtsuqheyino tiye kuchouke. Kughengu Alhou ye nongu kupulumiqo gholo mla anike.

¹⁴Athikuzumiqo, Judia lo Jisu Khristo lono Alhou wu akukuhouqono kiu kishi shikeno nonguno sholuvae. Panonguye Judami launo aghime sholuke, nongu ghi tihutoi nolikhi noghakhumi launo aghime sholuke.

¹⁵Judamino Ampeu Jisu eno tungkupmiqo pithive eno ningu hapiyepighiveke, Alhou mlo shipusa eno timi kumtsu ghumi shi ani!

¹⁶Kughengu Judakumomi vilo atsakiviu pikulha puzu xakulupu shinikeulo panonguno ningu lakhake. Hipau shikeu lono panongu xine kumtsu shikupu nike pulhapuju hitoi shi achenike. Ikemu ashekhalo Alhou loghu panongu shou ikughivae.

¹⁷Athikuzumiqo, kughou ninguno ado kitila dolo nongu launo akukumsu loye kumokemu aphimpilo likhino putosuve keno, ninguno nongu sasu kinheqhi kusholuni shikelauno khekulhoshi ani.

¹⁸Tipau ghenguno ninguye nongu lau ideighi nishi ake, ni Paul no ghuthu kini kuthu kutolo wuniye shike, ikemu Satan no ningu lakhave.

¹⁹Kughengu Ampeu Jisu no ighikelo pa zulo nino tokulu shinike ghenguno akijivile akivipu eno niwu lajupu akeuye kutami kumono nongu likhike.

²⁰Kuchouno nonguye nijekipipu eno nilokivipuke!