Read Sumi Naga 1 THESALONIAMI 4 Bible Online

1 THESALONIAMI 4 - Sumi Naga bible

1 THESALONIAMI 4

¹Athikuzumiqo, ashekhashi ninguno Ampeu Jisu lono nongu qhuiniju eno nongu hakite ani, ike nonguye kishi xukepu keno eno kishi Alhou pulou shikepu keno nonguno nilauno shikalu ketoi, nonguno itehi kishi xuanikeno titoi nonguye tinguno alaushi xu achelo.

²Ampeu Jisu vechewo ighikeu kukutsu ninguno kiu nongu tsukeno tipau nonguno ithi ani.

³Kughengu Alhou pulouye nongu shikimthe apenishi ike nonguye kiptimi totimi dolo mithemokeu lono suchileluvelo.

⁴Alhou kumthami shiayeh toi ghasumlakeu ghichikupo lono kumono akimthe eno gihukuzupu gholauno nongu lakhi khino kishi pututa nipu [1] sasu xuakepu keno ithimasae.

⁶Hipau vehulo timi khumu pa thikuzuu lau akumou shikevilo momu pawu kiu keno hexatsu kevilo, kughengu ninguno puzuuno nongu kutughuve ketoi khunoqono tikithipu shicheni keno Ampeu no tipauqo ghime nanike.

⁷Kughengu Alhou ye mithekumolo xupenike ningu kuluke kumoe ikemu akimthepulo xupeniyeke.

⁸Tighenguno khunono akukutsutsa hipau ikhilumoni keno paye timi milive anike kumoe ikemu Alhou, pa Ghungu Kimthe nongu tsukeu hu milive anike.

⁹Athikuzumi kimiyekile kepu ghili ghenguye khunomu nongu lau yeakepu avehu kuhae, kughengu nongu lakhino lakhi kishi kimiyekepu keno Alhou no nongu kutsupiyepe puanike,

¹⁰kuchouno Makedonia qha kumtsulo nonguno kupulumi athikuzumi kumtsu kimiye achenike. Ikemu ninguno nongu hakitekile akeuye alau alaushi titoi shiape niyeke.

¹¹Nino nongu kutsuvekeu toi iqu ighai keu kuxu xunikeu, alikhi akumlapu sajeqolo amlo tsuqhiyi shinikeu eno pututa phia-u peithano mlachu nikeuno nongu kuxu kimji shichelo.

¹²Tishianguno pululumono akemino nongu gihu lupenike eno khuu shoumu pukhubepe xumo nani.

¹³Athikuzumiqo, kithimiqoye kishive akelapi nongu pelo mthano apenishimo kelauno hi pithilu ani, tishianguno lajupu kuhakemi kutamiqo toi mono nonguye amlo kusa shipemo niyeke.

¹⁴Jisu thive eno xuithuvekepi ninguno pulu cheni; titoi khunoqono Jisu pulucheno thive nikeno Alhou no Jisu gholono panongu saghi nani kepi ninguno pulu cheni.

¹⁵Kughengu Ampeu no pikeu tsa pesu nino nongu lau hi piani: Ampeu no ighike tsalalo ningu khunoqono thimono xuaghini keno ninguye thivekemi zuuno wuve aghini chemoe.

¹⁶Kughengu tilehiye ahza kutsu ghugha anani, kungumi gholo atou sutsa chilu nani, Alhou fuko kuyigha nani, eno kungugha kudauno Ampeu ampi iqighi nani. Eno Khristo pulucheno thivekemiqo paghi xuputhu nani.

¹⁷Tileno ningu thimono xuaghikemiye panoqo sasu kumtsa khungkusu lono sunhe saikuve nani eno amulhu lono Ampeu sasu kusholu nani. Tishipuzu ninguye pulhapuju Ampeu gholo acheuve nani.

¹⁸Tighenguno hipatsa pesu lakhino lakhi lokughunotsulo.