Read Sumi Naga 1 THESALONIAMI 5 Bible Online

1 THESALONIAMI 5 - Sumi Naga bible

1 THESALONIAMI 5

¹Ikemu athikuzumiqo, kiu ghuloki eno kiu tuqhudo lono hipaqo shi nani keno nongu lau kiumu yeakepu kuhae.

²Kughengu nongu ampino akivishi ithi anike Ampeu Tsalaye kupukamino putho lono ighike toi nani.

³Kughou timi no, “Thwokha iquneyi eno achipishi akhanie,” ipi akelono zuleno shiluksa puluksano totimino anga pununiye suakeshi timiqo shou ighi nani eno panonguye povemla nani.

⁴Ikemu athikuzumiqo nonguye akuzulo amoe eno Atsala huye kupukami toi nongu kichiqhi ighi pekepu kumoe.

⁵Nongu kumtsu akuvu nuliqo eno puchou akemi qoke. Ninguye putholo akemi kumoe momu akuzulo akemi kumoe.

⁶Tishiaye kutami toi ninguye zuakepu kumoe, ninguye tsukhutsuvayi eno tsaqutsaleyi akepue.

⁷Kughengu zuachekemiye putho lono zu cheni eno shokumzumiye putho lono shomzu cheni.

⁸Ikemu ninguye akuvu laumi keke ninguye tsaqutsaleyi akepue. Akupulu ngo kikimiye pesu amlakukuzupu toi pepulo eno xakulupu wu lajupu pesu akutsukuqho toi pepulo.

⁹Kughengu Alhou ye pa ngusupu ghenguno aza polono ningu iniveke kumoe, ikemu ningu Mpeu Jisu Khristo vechewo xakulupu alupeniyeke.

¹⁰Pano ningu ghenguno thive, tishianguno ninguye thivena xunamu pa gholo xuchepeniyeke.

¹¹Tighenguno nonguno shi acheke toi lakhino lakhi mlo shikumtotsu eno lakhino lakhi xaqhe puku chelo.

¹²Athikuzumiqo nino nongu vilo hipau piputo ani, nongu gholo aghimeshi mlachekemi qhoqhulo, khunoqomi Ampeu no kishephe pesu nongu la kichepiye eno nongu shika cheni keno tipaqo qhoqhulo.

¹³Panonguno akumla shichekeu ghenguno qhoqhukeu akiqheu eno kikimiye lono panongu peithalo.Nongu likhi nongu dolo aloinokeu achelo.

¹⁴Athikuzumiqo, ninguno nongu hakutho anike, akipichimi lomi pilo, amlo kulotimi shikumtolo, tomo chhimokemi kuphulo eno kumtsu lau kheakulu shilo.

¹⁵Nongu gholo milakhi nomu alhoksa pesu alhoksa shikeu lochile kevilo, ikemu pulhapujulo lakhino lakhi lau eno timi kumtsu lau akivi shinikeuno akimji shilo.

¹⁶Pulhapuju alovi chelo,

¹⁷tamono inikhulo,

¹⁸kiukiu sholu aghinamu shikimthi alo, kughengu nonguno Jisu Khristo lono xuchekeulo Alhou pulouye nongu ghenguno hipauke.

¹⁹Aghungu Kimthe ghapinhe kevilo,

²⁰tungukuputsa mithi kevilo

²¹ikemu thwokha kumtsu chhejulo kiu akivi keno tsuqukhoyi luvelo;

²²alhoksa jeli kumtsu launo suchileluvelo.

²³Alokughuno tsuchekeu Lhou ampi pelo nongu pesu akimthe shilu peniu, eno nongu phimpi, angulho eno angu-gha achipishi puatsuno ningu Mpeu Jisu Khristo ighikelo nongu pelo tukutiye kuhapeniu.

²⁴Khuuno nongu kulu keno paye pukhu kulupuke eno pano tishitsu nanike.

²⁵Athikuzumiqo, ni ghenguno inikhutsu alo.

²⁶Akimtheshi ikhilukile chekeu [2] pesu athikuzumi kumtsu tsulo.

²⁷Ampeu jelono ino nongu piputo anike, athikuzumi kumtsu lau yesu hipau phisulo.

²⁸Ningu Mpeu Jisu Khristo wu kupukini nongu gholo achelo.