Read Sumi Naga JOSHUA 1 Bible Online

JOSHUA 1 - Sumi Naga bible

JOSHUA 1

¹AMPEU qeu Muse thive kethiu, AMPEU no Muse kukuphuu putsa. Pano pi, “Nun nu Joshua,

²iqeu Muse thivae. Itehiye no eno Israilmi kumtsu kutolulo eno Jordan kathasu ino panongu tsu akeu yeghilo wulo.

³Ino Muse vilo pike toi, nonguno chechekeu yeghi kuchopu pesu no eno iwu timi kumtsu tsuvae.

⁴Oghuthu ghiphiye apeu asayeqha lono ahuu Libanon naghuto kuto. Kipelau Eufrati ghoki lono kulolau Hatimi yeghi veche Mediteriya Zughi kuto.

⁵Joshua, nono xuake tivilo timi khunomu otomo nani. Ino Muse gholo acheke toi ogholo ache nani. Ino alhokuthu ogholo ache nani. Niye khilemu oqhivemo nani.

⁶Mtotoilo eno amlo kuloghilo, kughengu ino panoqo puasu tsunike piqhi puakeu hu nono sakipheu shiveno panongu mheghi shitsu niye akeu ke.

⁷Qeti mtotoilo amlo kuloghilo eno iqeu Muse no ayezah tsukeqo kuchopu mtsuqhei shi aghokulushi pelo, tipau lono ajeu momu piyiu idewo kevilo tishi keuno nono khilau wu ni keno kuchopulo tokuluu shinani.

⁸Okighinilo alhokuthu ayezah kakuhu philo. Putho pucho philo eno tile yepuakeu kuchopu thebei pelulo. Tishikeuno okuxulo kinikulu eno tokulu shi nani.

⁹Mtotoi shi amlo kuloghi shilo pi ino ahza tsukeu ithilo, msakevilo momu amlo tulalo kevilo kughengu ni AMPEU oLhou no nono khile cheni keno ogholo che nani.”

¹⁰Tipathiu Joshua no sakiphemi vilo ahza tsu.”Apusho mtalo ilolo eno timiqo vilo achuqupu pulopi ahza tsulo, kughengu nonguye atsala kuthu dolo Jordan veche wuno AMPEU Alhou no tsukeu yeghi hu lulu niae.”

¹²Joshua no Ruben ngo Gad shiyehqo eno Manase shiyeh tuxaqo vilo pi,

¹³“AMPEU nongu Lhou no Jordan kipela kudau yeghi pesu nongu ghakhu shitsukeu AMPEU qeu Muse no nongu vilo pikeu hu kumsu lulo.

¹⁴No nipu nuliqo eno no pichepighi qoye Jordan kukuu Muse no tsukeu yeghilo anani, ikemu nongu ghushimi kuchopu aghu nanu pepuno pano thikuzumi Israilmi lau wuno kuphu nani.

¹⁵Jordan kulola kudau nongu Lhou AMPEU no panongu tsukeu yeghi lulumphi kuto wunani. Kughono pano Israil shiyeh timi kumtsu pelo ililaive peni keno tileno nonguno Alhou qeu Muse no nongu tsukeu yeghi Jordan kipelau ideighino ngolu nani.”

¹⁶Panonguno Joshua khochile, “Nono nivilo pikeqo kuchopu nino shinie eno nivilo khile wulepi keno wunie.

¹⁷Muse gho luche ketoi nino alhokuthu ogho lunie eno oLhou pelo Muse gholo acheke toi ogholo apeniu.

¹⁸Khuno oyezah kutsu ghechileni keno eno oyezah lakhimu lumo nikeno pithiveni. Mtotoilo eno amlo kuloghilo.”