Read Sumi Naga JOSHUA 11 Bible Online

JOSHUA 11 - Sumi Naga bible

JOSHUA 11

¹Israilmino tolu akeu sutsa Hazor lo akukau Jabin no chilu kelo pano kukamiqo lau asutsa puwu, Madon lo akukau Jobab Shimron ngo Akshap kuma kukau pama.

²Ahuu ato yeghiqha lo kukamiqo, Galil Zughi apeu Jordan khilalo kuami eno Debir zughi muku eno ato pukhu kuxalomi kukami lau puwu.

³Pano Jordan hokumxalo Kananmi lau Amarimi lau, Hatimi, Perizimi eno Jebusimi atolo kuami eno Mizpa yeghiqhalo Hermon naghuto pukhu kuxalo kuami kumtsu lau yepuwu.

⁴Panongu no pano ghushimi kumtsu saighi. Ghushimino azu mkulo asaye akeu jehi ighi. Pano gholo khurshi eno khurkulu kutomo saighi.

⁵Kukami kumtsu kuqhano Israilmi sasu aghu shini ye Merom ghokiti ghazu alo hekutsulu.

⁶AMPEU no Joshua vilo pi, “Panongu jumsa kevilo, thoghiu hipau ghulokilo ino Israilmi ghenguno panongu kumtsu pithiveni. Noye panongu wu khurshiqo pukhu kighicheve tsulo eno khurkuluqo pitive tsulo.

⁷Tighenguno Joshua ngo pawu timi kumtsuno zuleno Merom ghokiti lo panongu lewu eno AMPEU no panongu shou Israilmi pelo tolupe.

⁸Israilmino panongu hasusu Misrepot Maim eno Sidon eno Mizpa khila kuto wuve.”

⁹AMPEU no ahza tsuketoi Joshua no shi: Pano khurshiqo pukhu michevetsu eno khurkulu pitive tsu.

¹⁰Joshua no ideighi eno Hazor leveno tipau kukau pithive. Tipa ghulokilo Hazor no kukami kumtsu shou akuka kughushushi ache.

¹¹Panonguno tile kuaqo kumtsu pithive, khumu akuxu pua tsumove eno aphughi hu pitivetsu.

¹²Joshua no aphughi tipaqo lo kukami kuchopu leve eno timi kumtsu pithive. Muse Alhou qeuno ahza tsuke toi tishive.

¹³Tishimu Hazor phughi Joshua no pitivetsu keu nguno alauye alughi shou shipuaghi keqoye pitivetsumo.

¹⁴Israilmino amekusho nhemgha eno lhoxuqo aphughi tipaqo lono suwuve eno panongu wu shiluve. Ikemu panonguno timi qoye pithive, khumu akuxu qhimove.

¹⁵AMPEU no Muse lau ahza tsu eno Muse no tipau zah Joshua tsuve eno Joshua no aghokulu shi ikhiluve. AMPEU no Muse ahza tsu keqo kumtsu mlakhave.

¹⁶Joshua no ayeghiqha lukhave, ato yeghiqo, naghuto pukhu lo kuaqo ahuu eno apeu qhaikeu yeghi eno Jordan khila kumtsu lukhave.

¹⁷Apeu Edom phivilo Halak naghuto ikosusu ahuu Balgad kuto eno apeu Harmon naghuto kudau Libanon kuto ikowove. Joshua ye ado kushuwa kuto tipa yeghiqha kukau sasu aghu shive ikemu panongu kumtsu shou toluve eno pithi khave.

¹⁹Israilmi sasu visho shive keu phughiye Gibeon likhi, tile Havimi ghi a. Tinguno alauye kumtsu leluve keu phughi likhi.

²⁰AMPEU no panongu pelo Israilmi sasu tsaqui aghu shinike kutope, tishianguno kimiyekini panongu shou kuhano pithi khaveni keu shive. Tiye AMPEU no Muse lau ahza tsuve keuke.

²¹Tipa ghulokilo Joshua no wuno subosughi lagha kukau Anakim, atoghilo kuami, Hebron, Debir, Anab, Juda yeghi tolo eno Israilmi tolo kuami ghi puhavetsu, Joshua no panongu eno pano phughi mithemthei puhavetsu.

²²Israil yeghilo Anakimmi qhoi kuhave ikemu Gaza, Gat eno Ashdod lo aghuloshi qhive.

²³Joshua no ayeghi kumtsu leluve. AMPEU no Muse ahza tsuketoi Joshua no ayeghi tipaqo pe Israilmi dolo panongu wu ashiayeh kiqi lono kijevetsu. Titoi shiveno timi qoye ashi-aghu shimono ililai ngove.