Read Sumi Naga JOSHUA 17 Bible Online

JOSHUA 17 - Sumi Naga bible

JOSHUA 17

¹Jordan kulolau ayeghi leqhi lakhi pe Josef nu anoghiu Manase polo kiqi bolomi tsuve. Gilead papu Makhir ye Manase nu anoghiu eno paye aghutomi lakhi, tighenguno Gilead ngo Bashan kuma pe pa tsuve.

²Jordan kulolau yeghipe Manase bolomi kutami hipaqo tsuve —Abiezer, Helek, Asriel, Shekhem, Hefer eno Shemida. Hipaqono Josef nu Manase polo kiqi kiptimiqo eno panonguno akibolo ampi miqo.

³Manase nu Makhir, panu Gilead, panu Hefer, panu Zelopehad ye anu kiptimi kuha ikemu totimi likhi. Linoqo je Mahla, Noa, Hogla, Milka eno Tirza.

⁴Linoqono Eleazer achineu eno Nun nu Joshua eno sakiphemiqo lau wuno pi, “AMPEU no ayeghi leqhi lakhipe ningu eno nisholokumi kiptimi tsupenike Muse no ahza tsuvae.” AMPEU no ahza tsuketoi ayeghi pe li noqo sholokumi kiptimiqo tsuve.

⁵Tishike ghenguno Manase ye Jordan kipelau saje chighi nguno alau Gilead ngo Bashan kumano pa saje shilu.

⁶Kutau ghenguno kumono Manase ngo totimi qoye panu kiptimi gholono amheghi ighiluve. Gilead yeghi huye Manase polo kiqi kutamiqo gholo kijevetsu.

⁷Manase yeghiqhaye Shekhem kipelau Asher lono Mikmethat kuto qhawo ae. Alughiye apeu kukau Entapuami kutolo bothasupe ae.

⁸Tapua hokumxa yeghiye Manase wu ikemu Tapua taun alughi lo akeu hu Efraim polo kiqiqo yeghi shi ae.

⁹Alughi hu Kana ghoki kutolo iqia. Aghokiti peu akeu phughiqoye Efraim wu. Aphughi tipaqoye apeuye Manase lughi bocho dolo ake. Manase lughi ye aghokiti ahuuno huthusu Mediteriya Zughi lono kishekhave.

¹⁰Apeuno Efraim, eno Manase no ahuu eno Mediteriya Zughino kulolau pano lughi.

¹¹Isakhar ngo Asher yeghi bocholo Manase wu BethShean ngo Ibleam kuma gholo hokumxa taunqo gholo Dor, Azumkulo akeu, Endor, Tanak, Megido eno panoqo hokumxa taunqo ae.

¹²Tishimu Manase timiqoye tipa phughi qolo akemi haphemlave, tighenguno Kananmiye tile acheuve.

¹³Athiu Israilmino akumto shiuve kethiu ghi, panonguno Kananmi kumtsu haphemove ikemu panongu pelo angkashi panongu ghenguno mlauvepe.

¹⁴Josef polo kiqi qono Joshua vilo pi, “Noye kushiye ayeghi leqhi lakhi likhi pe niwu shitsu kya? Kughengu ninguye AMPEU no ningu kumghatsuno ninguye kumzapu shivae.”

¹⁵Joshua no khochile, “Tsalatsa nonguno kutomo shive aghi aye eno Efraim yeghiqhano nongu ghenguno tulalove aye Perizimi ngo Refaimmi yeghi ghasulo ilolo eno nongu ghenguno a-a ghephelo.”

¹⁶Panonguno khochile, “Ti ato yeghiqhaye nighenguno kije kumoe, ikemu Kananmi aqa yeghilo akemiqoye ayino shikeu khurkuluqo ani, panonguye BethShan eno tipau hokumxa taun qolo eno Jezril khilaqolo akeqoke.”

¹⁷Joshua no Efraim shiyeh eno Manase shiyeh vilo pi, “Nonguye timi kutomoe eno akuka kuamiqoke, nonguye saje lakhi nguno alau tsunie.

¹⁸Ato yeghiqhaqo hu nongu wu shiniae, Tino aghasuqha shi aghinamu, ghepheveno ashekha lono ashekha kuto pe nongu wu shivelo. Kananmi ghenguye panonguno ayi khurkulu aghinamu eno akumtomi shi aghinamu nonguno panongu haphevelo.”