Read Sumi Naga JOSHUA 18 Bible Online

JOSHUA 18 - Sumi Naga bible

JOSHUA 18

¹Panonguno ayeghi leluveke thiu, Israil shiyeh kumtsu Shilo lo kuho eno AMPEU no ngoche keu phiki shive.

²Tilehi Israilmi dolo ashiyeh tsuniqoye panongu saje ayeghi tsumono ae.

³Tighenguno Joshua no Israilmi vilo pi, “Nonguye nongu puasu Lhou AMPEU no nongu tsukeu yeghilo ilono lunikeu ado khitohi khe aniye kya?

⁴Ino panongu pelo ayeghiqha kumtsulo wupeno panonguno lunishi keu yeghi julho shisu peni tithiu panonguno ilau ide ighi nani.

⁵Ayeghihu saje tsuni panongu dolo kije tsuni, Juda no pano yeghi apeu tishi ngo nani eno Josef no ahuu pano yeghiqhalo tishi ngo nani.

⁶Ti saje tsuni shi pua keu ghili kishekulu yeno ilau sughilo. Tithiuno ino nongu ghenguno AMPEU niLhou vehu iniju nike asa qhini.

⁷Tishimu Levi laghaye nongu kutami gholo saje lakhimu ithulumo nani. Kughengu panongu sajeye AMPEU chinemi shighi qenani. Eno Gad shiyeh, Ruben eno kipelau Manase shiyehqoye Jordan kipelau pano yeghi ithuluvae, tipau huye AMPEU qeu Muse no panongu tsuveke.”

⁸Timiqono ayeghi xuwu penike Joshua no hitoi kichepiye keu kiqi lono wuve. “Ayeghi kumtsu wulo eno xujuwulo eno ilau ide ighilo eno tithiuno hile Shilo lono ino nongu ghenguno asa qhipheghi AMPEU vehu inijuni.”

⁹Tighenguno timi no ayeghi kumtsulo wuno panonguno kishi saje tsuni shi kijeve keno iqano tipaqo ghili yeh eno taunqo tile ajoshi yesu. Tithiu panonguno Shilo lo Joshua lau ide ighi.

¹⁰Joshua no panongu ghenguno asaqhi pheno AMPEU vehu inijuno Israil shiyeh achili aghikeqo lakhi khi lau ayeghi kijevetsu.

¹¹Atughushi Benjamin shiyeh bolomi paghi ayeghi kothatsu. Panongu yeghiye Juda shiyeh ngo Josef kuma dolo ae.

¹²Ahuuye pano lughi Jordan lono huthu eno Jerikho ahuu iqho eno kulolau ato yeghiqha Bethaven sayeqha kutoke.

¹³Alughi hu Luz momu Bethel ipikeu apeu kudau iqi eno tinguno chhiliu BethHoron naghuto kudau Atarot Adar kuto iqi ae.

¹⁴Alughi hu kutau kudau wuve naghuto tipau kulolauno idesu apeu kudau wuve eno Kiriat Bal momu Kiriat Jearim kutolo wuve, khikhi Juda shiyeh yeghi shi akeno, tino kulolau lughike.

¹⁵Ti apeu lughiye Kiriat Jearim shekha lono huthusu Neftoa ghokiti kutolo ani.

¹⁶Tileno naghuto pukhulo Hinom khila veche apeu kudau Jebusimi to kukujo Enrogel kuto wu ani.

¹⁷Tileno idesu ahuu Ensheme eno Gelilot ghungulo Adumin to la kuto wu ani. Alughihu Bohan, Ruben nu tusho kuto iqi

¹⁸no Jordan khila jupiche akeu ahuu ato kukujo kuto wu ani.

¹⁹Tileno akhilaqa lo iqighi eno ahuu Beth Hogla to kukujo veche wu ani eno Akithi Zughi ahuu aghoki qoiloghi akeu lono ashekha shive ani. Tiye Jordan qowukeu shekha shive ani. Tino apeu lughike.

²⁰Jordan huno kipelau lughike. Hipaqono Benjamin kibolomino ithulu keu yeghi lughike.

²¹Benjamin shiyeh bolomi wu aphughiye hipaqo: BethHogla, Emek Kiziz, Bet Aroba, Zemaraim, Bethel, Arim, Para, Ofra, Khefaramoni, Ofni eno Geba. Aphughi chighi kini gholo hokumxa taun qo kuqhaghi ae.

²⁵Tipa gholo Mizpa, Khefera, Moza, Rekem, Irpel, Tarala, Zela, Hailep, Jebus (momu Jerusalem,) Gibia eno Kiriat Jearim ishi aphughi chighi bidi gholo hokumxa taun kuqhaghi ani. Tipadono Benjamin shiyeh bolomino ithulukeu yeghike.