Read Sumi Naga JOSHUA 2 Bible Online

JOSHUA 2 - Sumi Naga bible

JOSHUA 2

¹Tithiu Joshua no pukujumi kini Akasia pushoa lono tuqhouno Kanan yeghi, akhotono Jerikho phughi puju penike puwu. Kughono pamano aphughilo ighikeno tipaji pama ye Rahab kutuqhaliu kilo ngove

²Jerikho lo akukauno Israilmi khami tipa jih pa yeghilo ighikepi chiluve.

³Tileno pano Rahab lau asutsa puwu, “Timi okilo ighikeqoye ayeghiqha kuchopu puju niye ighike! tipaqo saighilo!”

⁴Lino khochile, “Iye timi khami ikilo ighie, ikemu panonguye khilauno ighikeno niye mthae. Panonguye aphughi khagho khamphilo atsala ilo mphi lono wuvae. Panonguye khilau wuchekeno niye inijumoe, ikemu nonguno kei haju aye kughalu nanie.” (Rahab no pama pe amqha kunguu asu koza teni gholo kusuve).

⁷Akukau timi qono tipa phughi lono wuve no aphughi khagho khaluve. Panonguno ti Israilmi pukujumi phusu Jordan lapa kutolo wuve.

⁸Tipaji pukujumi pamano zuu mphi lono Rahab no amqhalo ikughi

⁹eno pama vilo pi, “Ino ithivae AMPEU no hipa yeghi pe nongu tsuvae. Ayeghi qhalo timi kumtsuno nongu msa auvae.

¹⁰Nino chilue, kughono nonguno Ijip pheveno che keno AMPEU no nongu zulo Akuhu Zughi pelo qhaive peke. Nonguno Sihon ngo Og pama pithivekeu ghi chilue, pamaye Jordan kipelau Amarimi kukau ke.

¹¹Nino ti chiluke mtsa, nongu ghenguno ni mlo hauve. AMPEU noLhou huno kungugha eno ayeghilomi Lhou ke.

¹²Tishi aye ino nongu lau kimiye ketoi nonguno nibolomi kimiyeni pi pa jelono tushoqhive lo eno ino nongu pulu kulupushi amchipu hami itsulo.

¹³Nonguno ipu iza, ipelimi, itsunipulimi eno panongu bolomiqo susholuni pi izulo tushoqhivelo! Ningu pithive pe kevilo.”

¹⁴Timi pamano li khochile,” Nino pikeu toi shimove aye Alhou pelo nikuxu luvetsu peni. Nino kiu shi ani keno nono hipatsa khuvilomu pima aye nino ozulo tushoqhi ani, kughono AMPEU no hipa yeghi nitsuveni keno nino akivishi nongu tuchoni.”

¹⁵Rahab ye aphughi liwolo shipuku pua keu kilo ache, tighenguno lino alashe lono akighi tshuqhive tsuno piqive.

¹⁶Lino pama vilo pi, “Atoyeghilo wuvelo, tishimo aye akukau timi qono nokujo phuluve nani. Tsala kuthu panonguno ideighimoke kutolo itshu luvelo. Tithiu no nokujo lalo wulu nani.”

¹⁷Timi pamano li khochile, “Nono nivilo tushokiqhi shipe keu toi nino shini.

¹⁸Nono hi shimaye sakene, kughono nino noyeghi leniye ighinikeno hi huchuyi keu kighi alashelo tshupukuno ningu piqi keu kighi lono okibolo opu, oza, opelimi eno opuno kibolomi kumtsu saighivelo.

¹⁹Kutami khuala khalau ipeve aghi aye pa kithiye pa likhi pauae eno ni kipimiye kuhae, ikemu nongu gholo timi lakhi shou mu a-u beve aghi aye tiye ni makho shini.

²⁰Tishi namu nono hi ningu sutsa pe kutami vilo pive aghi aye ningu tushokiqhi hu kumsa shivae.”

²¹Lino pulove eno panongu puwuve. Lino huchuyikeu kighihu ala shelo tshupukuve.

²²Pukujumi pamano atoyeghilo wuve no itshuluve. Akukau timiqono ayeghiqha kuchopu tsala kuthu pama phuithu ikemu phumlave eno Jerikho lo idewove.

²³Tithiuno pukujumi pamano atoyeghi lono iqighieno aghoki kathasu Joshua lau ideighive. Pamano kiu shive keno kishekulu Joshua vilo pipuzu

²⁴ishi pi, “Nino mtsuqhei ithivae, AMPEU no ayeghi kuchopu pe nitsuvae, tile kuami kumtsuno ningu msa auvae.”