Read Sumi Naga JOSHUA 22 Bible Online

JOSHUA 22 - Sumi Naga bible

JOSHUA 22

¹Tipathiu Joshua no Ruben, Gad eno Manase kipelau kuami shiyeh timiqo ku kutsu.

²Pano panongu vilo pi, “AMPEU qeu Muse no nongu vilo shilo pikeqo kumtsu nonguno shivae, nonguno izahqo kumtsu aghokulu shivae.

³Tipa tsala kuchopu nonguno nongu kusami Israilmi phevemoe nonguno nongu Lhou AMPEU zahqo kithikiyi shi aghokulu shie.

⁴Itehi pano piqhiveke toi, AMPEU Alhou no nongu Israilmi lokughuno vetsuae. Tighenguno itehiye AMPEU qeu Muse no Jordan hukukuu pe nongu shiyeh tsuke alo idewolo.

⁵Muse no ahza tsukeu nongu no mutsumishei aghokulu shi alo, nongu Lhou AMPEU qhuivu alo. Pa pulou shilo, pa zahqo lulo, pa lau amikucho shilo, omlo eno ongulho kumtsu pe pa ghoshilo.”

⁶Joshua no kukumgha betsu ghi atsa hipaqo panongu vilo pieno puwuve: “Nonguye kinimi shi aphulo idewoniae, shuna tsandi ayi nhemgha eno aphi nhemgha kutomo pe woniae, nongu ghumi launo ithulu keu pewo nongu kusamiqo sasu kusajelo.” Tithiu panongu ghakhulo idewove. Muse no Jordan kipelau yeghipe Manase shiyeh tuxaqo tsuve. Ikemu Joshua no tuxa lakhiu qoye Jordan kulolau yeghipe shiyeh kutau gholo kuqhaghi tsuve.

⁹Tishino, Ruben, Gad eno Manase kipelau shiyeh qoye pano yeghilo idewove. Panonguye Israil shiyeh kutami Kanan yeghi Shilo lo qhiveno chesu pano yeghilo wuve, tiye AMPEU no Muse veche lulepi ahza tsukeu a Gilead yeghilo wuve.

¹⁰Kughou Ruben, Gad eno Manase shiyeh tuxa qono chewo Kanan yeghi Jordan kupunu tolu keno panonguno tile akiptia kije lakhi mla.

¹¹Kutami Israil shiyeh qono ishi chilu, “Rubenmi, Gadmi eno Manase shiyeh tuxa qono Kanan yeghi Gelilot lo Jordan lono ni kudau akiptia mla anie.”

¹²Kughou Israilmino ti chilukeno pano Israil shiyeh kumtsu Shilo lo ighi eno kipelau shiyehqo sasu aghu shi nike kutove.

¹³Tileno Israilmino achineu Eleazer nu Fineha hape Ruben, Gad eno Manase kipelau Gilead yeghilo kuami shiyehqo lau puwu.

¹⁴Fineha gholo timi sakiphemi chighi puwu, panonguye lakhi khino shiyeh bocho lakhikhi shou ampimi.

¹⁵Panonguno ighieno Gilead yeghilo Ruben, Gad eno Manase kipela shiyeh qo sasu kusholu.

¹⁶AMPEU wu aqoaho kumtsu ghenguno puthugho ghi panongu vilo pi, “Nonguye kushiye Israil Lhou shou akumla lhoksa shi anikya? Nonguye nongu ghenguno akiptia mlakeuno AMPEU hebide anie! Nonguye pa gholo chemovae!

¹⁷Peor lo ningu kipimi hu kumsujulo. Tile AMPEU no pusakusu pesu pawu timiqo shikighime kehu? Ninguye ishi kutolo tighenguno ime achephike. Akipimi tino lukumkha kumo keshea?

¹⁸Nonguye itehino pa miliveno pa gholo chemoveni keshea? Tsalatsa nonguno ishi pa hebide aye pano thoghiuye Israil shou aloghu ideve nani.

¹⁹Tishi aye itehi, noyeghi lono mlla kuzupu kumo aye AMPEU yeghilo ighilo, tile pa Phiki anie, ningu vilo ayeghi khulo. Ikemu AMPEU hebide kevilo momu ningu dolono ningu Lhou AMPEU wu akiptia lakhi nguno alau mlaghi hebide kevilo.

²⁰Zera nu Akhan no kiu toi lumo kepu nhemgha lo ahza lumovekeno Israil shiyeh kumtsu ghimevekeno kumsujulo.”

²¹Ruben, Gad eno Manase kipelau shiyeh qono kulolau shiyeh qo mpemiqo khochile,

²²“Akuka kughushuuye Alhou ke! Pano AMPEU ke! Akuka kughushuuye Alhoue! Pano AMPEU ke. Nino kushiye ti shikeno pano ithi ani. Nino hebideno AMPEU lau amikucho piyemove aghi aye nonguno nipelo xu apekevilo!

²³Nino AMPEU gholumoveno ni kutashi akiptia mlape piti kumlla nike, momu tuxatini gho tsunike momu kuposhukulu gho tsunike hi mla aghi aye AMPEU pelo ni ghime penie.

²⁴Moe, nino hi mla keuye hithiu notinulino nitinuli vilo, ‘Nonguye Israil Lhou lau kiu shikepu ania?

²⁵Kughengu AMPEU no ningu dolo Jordan pe alughi shivetsue, nongu Rubenmi eno Gadmi, nonguye AMPEU lau nongu saje kumu kuhae,’ ipi nosaye ke. Tighenguno noti nuye nitianuliqo pelo AMPEU mllanikeu lakhaluvike.

²⁶Tighenguno nino aghakishiqo pitiniyeke kumo momu agho pe tsunike ghengu kumoe,

²⁷ikemu tishikepu zuqhulo, no timi eno ni timi ghenguno eno nithiu tiqhelimi ghenguno amchipu shiniye ninguye kuchouno pa kimthe Phikilo pa mllacheke eno akipitigho eno kuposhukulu ghoqo eno aghakishiqo pe mllache keu ithi apeniyeke. Hino notinonuli pelo ningu tianuliqoye AMPEU lau niwu kumu kuhae ipipemo nike ghengunoke.

²⁸Ni kimiji titoikeu sholu aye nitianuli qono ishi pilu nani, ‘Julo nipuasuqono AMPEU wu akiptia toi akiptia lakhi mlake. Hiye aghoqo momu aghakishiqo piti niyeke kumoe, ikemu notimi ngo nitimi dolo amchipu lakhi shi pua niyeke.’

²⁹Ninguye mtsuqhei AMPEU hebidemoe momu itehiye akiptia lakhi mlano aghoqo momu tuxatini gho momu aghakishiqo pitiuveno pa papemove niyeke kumoe. Ningu ye AMPEU ni Lhou wu akiptia nguno kutau akiptia mlamoe, tipau kiptia huno atughiushi pawu achineki zulo puthugho achenike.”

³⁰Achineu Fineha ngo pa gholo shiyeh gholo ampimi chighiqo ti kulolau shiyeh bolomi qono Ruben, Gad eno Manase kipelau shiyehqo tsa inijuno panongu amloqive.

³¹Achineu Eleazer nu Fineha no panongu vilo pi “AMPEU ye ningu gholo anike pi nino ithivae. Nonguye pa hebidemoe eno tighenguno AMPEU no Israilmi shou aghime tsuniye akeu lono xaluvae.”

³²Tithiu Fineha ngo pa gholo ampimiqoye Gilead yeghi lono Ruben ngo Gadmi qhiveno, Kanan lo Israil timiqo lau idewono panongu lau piputove.

³³Israilmino amlo qive eno Alhou akishe tsu, eno panongu sasu aghu shinikeu tsa pimove, eno Rubenmi ngo Gadmino achekeu yeghi shipsa tsumo nikeu shive.

³⁴Rubenmi Gadmino ti, “Akiptia ye ningu kumtsu ghenguno, AMPEU ye Alhou ke “ ipi keu michike pive. Panonguno tipau je pe “Thopi” ipi kuve.