Read Sumi Naga JOSHUA 4 Bible Online

JOSHUA 4 - Sumi Naga bible

JOSHUA 4

¹Shiyeh kumtsuno Jordan katha luke thiu AMPEU no Joshua vilo pi.

²“Shiyeh chighi kini dolono timi lakhikhi kishelo

³eno panongu pelo Jordan mtalo no achinemiqono puthugho ake alono atu chighikini pelulo pilo. Panongu vilo atu tipaqo pe nonguno itiji khile aghazu shinikeno tile qhilo pilo.”

⁴Tithiu Joshua no chighi kini kishe pua keqo kuno,

⁵panongu vilo pi, “AMPEU nongu Lhou wu Puloshoqhi Bohu zuuno Jordan lo wulo. Nongu lakhikhino nongu bighi lo atu bepulo, tiye atu lakhino Israilmi shiyeh lakhi khi mchipuke.

⁶AMPEU no kiu shikeno hi atuqono timiqo lau amichipu ke. Hithiuno noti anuliqono hi atuqoye kiu kiqi kya? pi novilo iniju aye,

⁷nonguno panongu vilo nongu ye AMPEU wu Puloshoqhi Bohu pe aghoki katha kelo Jordan no qowumo veke pilo. Atu hipaqono hile kiu shivekeno alhokuthu Israilmi lau amichipu shi ache nani.”

⁸Timiqono Joshua zah kutsu pape, AMPEU no Joshua ahza tsuketoi panonguno atu chighikini azu mta lono ikhilu, shiyeh lakhikhi ghenguno lakhi pewo panongu ghazu alo qhive.

⁹Joshua no atu chighi kini pe Jordan mtalo achinemino Puloshoqhi Bohu pesu puthugho ngo keu alo shosuve, atu tipaqo itehi ghi aphi.

¹⁰AMPEU no Joshua vechewo timiqo vilo shilo pikeqo kuchopu shikhamphilo achinemiqoye Jordan mtalo puthugho a. Tiye Muse no ahza tsukeuke.

¹¹Kughono timi kumtsuno kathalu keno achinemino ashoqhibo pe panongu zuu wuve.

¹²Ruben ngo Gad eno Manase shiyeh tuxaqono aghu shinike kutoluveno Muse no panongu vilo pike toi timi kutami zuu cheve.

¹³AMPEU nhethe lono timi 40,000 toikeno aghu shinike Jerikho kupunulo aqa vecheve.

¹⁴AMPEU no tipa tsalalo kiu mlakeno tino Israilmi no Joshua pe kijeshi ikhiluve. Panonguno Muse gihu cheke toi pa kuxu do kuchopulo pa gihu cheuve.

¹⁵Tithiu AMPEU no Joshua vilo

¹⁶achinemi pelo Puloshoqhi Bohu pesu Jordan lono ipeghive pelo pi.

¹⁷Joshua no tishive,

¹⁸kughono achinemi qono ipe aghoki muku tovekeno aghokino thosulo toi qowuveno amku kuchopu chhive.

¹⁹Timiqo aqhi atughiulo atsala achighinino Jordan lono ipeghi eno Jerikho lughi kipelau Gilgal lo aghazu shive.

²⁰Tilehi Joshua no atu chighikini Jordan lono pe ighikeu pe shosuve no

²¹pano Israilmi vilo ishi pi,” Hithiu noti nulino hi atuqoye kiu mchipu kea pi aye,

²²panongu vilo Israilmino Jordan ghoki qhaivekeu yeghi lono katha lukeu mchike pilo.

²³Panongu vilo pilo AMPEU Alhou no ninguno kathalumoke dolo Jordan ghoki qhai shive tsue, puzuu nighenguno Akuhu Zughi qhai shivetsuke toi.

²⁴Tighenguno ayeghilomi kumtsu no AMPEU kukaye kiu toi kije keno ithi nani eno nongu no AMPEU nongu Lhou alhokuthu sumsa che nani.”