Read Sumi Naga JOSHUA 7 Bible Online

JOSHUA 7 - Sumi Naga bible

JOSHUA 7

¹Israilmi lau AMPEU zah kutsu shikeuno Jerikho shipsa vekeu nguno alauye kumu lumoni pikeuhu agho lumove. Timi lakhi Akhan ipikeu no tipau zah lumove, tighenguno AMPEU no Israilmi shou aloghu pukuve. (Akhan ye Karmi nu eno pasuye Zabdi eno Juda shiyeh lo Zera lagha lono ighikemi.)

²Joshua no Jerikho lono timi khami Bethaven kupunulo Bethel kipelau aphughi lakhi Ai phu pujuu penike puwu. Panonguno juveke thiu,

³Joshua lau asutsa sughi, “Timi kumtsu Ai lewu kepu avehu kuhae, timi 2000 momu 3000 likhi puwulo. Aghu shipeni ke ghushimi kumtsu puwu kevelo, tiye aphughi kije kumoe.”

⁴Tighenguno Israilmi 3000 toikeno lewu ikemu panonguye Ai noghami zulono pochile ighivemo aye saptsa ve.

⁵Ai mino Israilmi timi shighi tsugho pithive eno panongu phughi liwo lono hasusu Shebarim kutolo ha ighi eno panonguye amlo have no msave.

⁶Joshua ngo Israilmi sakiphemi no amlo sashe veno panongu kuuphi suxu eno AMPEU wu Puloshoqhi Bohu zulo ikiqi avela kutolo ihi auve, panongu mlo ghime piye keu mchi ayeghi mkhuno akutsu chhitoive.

⁷Joshua no pi, “Aha! O Akiqheu Mpeu: Noye kushiye ningu pelo Jordan katha ighi pekya? Ningu pe Amarimiqo ulo tsuve no ningu pelo Jordan hukukuu ngovepe mokya?

⁸O AMPEU, niye kiu shilepi kya? Israilmino aghumi zulono shothi ighivae.

⁹Kananmi eno ayeghiqhalo kuamiqono ti chilunia. Panonguno ni botha luveno ni pithivenia, noye oje kipipu ghenguno ni lau kiu shinia?”

¹⁰AMPEU no Joshua vilo pi, “Ithulo, noye kushi ye hitoi ayeghilo zu ania?

¹¹Israilmino pimivae. Ningu dolo ashoqhi zah kutsu hu panonguno hephovae. Panonguno shipsave kepu mhemgha ikhiluvae. Panonguno pukaluveno mikivae eno pano nhemgha gholo qhiluvae.

¹²Tighenguno Israilmiye pano ghumi zulo puthugho mlavae. Panonguno aghumi launo shothivae kughengu panongu likhi panongu lumove kepushi puhavae. Ahza tsuke toi lukevilo pikeu nhemghaqo kutsavemoke loye niye ogholo ngomoae.

¹³Ithulo, timiqo shikimthevelo eno panongu sasu ilau ighinike kutolo. Panongu vilo thoghi tsala ghenguno kutolo pilo, ni AMPEU Israilmi Lhou no hi pikepu ani: ‘Israilmi nongu vilo kutsavelo pikeu nhemghaqo anie. Nonguno tipaqo nhemgha ikhive moke tivilo nongu ghumi zulo puthugho lumo nani!’

¹⁴Tighenguno panongu vilo pilo thanau panongu pututa shiyeh azuu saipeghilo eno ino khuu shiyeh kuni keno panonguno alimi alagha shi ipeghini khuno limi kuni keno pututa akiboshi ipeghilo. Khuno kibo kupheni keno pututa jelono ipeghilo.

¹⁵Timi khuu kichepheno pano ikhi luvekeu nhemgha phupheluni keno pa gholo pa kibolomi eno pa nhemghaqo ishi piti kuqhaveni, kughengu Israilmi shou akukujo kije sughike eno ishoqhi hephove tsuke.”

¹⁶Thanau inaqhe Joshua no Israilmi shiyeh shiyeh shi saighi eno Juda shiyeh kuphe.

¹⁷Pano Juda shiyeh lo alagha alagha lono kuphe eno Zera laghalo akibo akibo jekuphe eno Zabdi kibolo kuphe.

¹⁸Tishino pano Zabdi kibolo timi lakhikhi kuphe eno Zabdi tilimi Karmi nu Akhan ikhiphe.

¹⁹Joshua no pa vilo pi, “Inu, hile AMPEU Israil Lhou zulo kuchou tsa piphevelo. Noye kiu shivekeno ivilo pilo. Izulo kusuvenike pukaputsa kevilo.”

²⁰Akhan no khochile pi, “Iye tiye kuchouke, ino Israil Lhou zulo axine shivae eno ikumlaye hike.

²¹Ningu no khathaluve keqo dolo Babilon lo phi aloke lakhi, tsandiyi kilogram kini eno shunamqo kilogram tuxanguno akimshiu ishi ithuluno tipaqo lunishiveno ikhiluveke. Tipaqo ipusho alou chhuqho puani eno tsandiyino aqhoshi qhopuanie.

²²Tileno Joshua no timi khami puwu eno panonguno wuju kelo kuchouno apusholo tsandiyino aqhoshi qhopuaghi keu phulu.”

²³Panonguno apusho lono pesu Joshua lau eno Israilmi lau ighi no pesu AMPEU zulo qhive.

²⁴Joshua eno Israilmi kumtsuno Akhan ngo patianu, pa pighi jeli, amshi, gadaha ngo bheriqo pa pusho eno pano luvekeu aphi, shuna eno tsandiyiqo kuchopu khathaluveno sasu aghime khilaqalo wuve.

²⁵Joshua no pi, “Noye kushiye aghime ningu tsukya? Itehi AMPEU no oghime niae.” Timi kumtsu no atu pesu Akhan daqhi pithive. Panonguno pa bolomighi daqhive eno anhemgha kuchopu pitivetsu.

²⁶Panonguno atu tipa alo kumqo puakeu ishi kutolo ani. Tighenguno a-a tipau je pe Akupuna Khila ipi picheni. Tileno AMPEU ye ayisamove.