Read Sumi Naga 2 THESALONIAMI 1 Bible Online

2 THESALONIAMI 1 - Sumi Naga bible

2 THESALONIAMI 1

¹Paul, Sila eno Timothi ishino Thesalonia lo Apu Alhou eno Ampeu Jisu Khristo lono akukuhou timiqo lau yelu ani.

²Apu Alhou eno Ampeu Jisu Khristo no kupukini ngo alokiqi nongu tsupeniu.

³Athikuzumiqo, ninguye nongu ghenguno pulhapuju Alhou shikimthi aniputsake! Ninguno titoi shikeuye achipike, kughengu nongu kupuluye ihulokeu shi thuwulu ani eno nongu lakhino lakhi kimiyekile keulo thuwu anike.

⁴Nongu shikighime eno nonguno shiluksa sholukeu kumtsulo nonguno ithamono pulu akeu ghenguno Alhou kukuhou kumtsulo nino nongu ghenguno akijivile acheni.

⁵Hiye Alhou no achipi lono kughathakeu pikiphe lakhike, tishianguno nonguye Alhou yehkipe qholo ilo kuzupu shitsu nike ghenguno nonguye ime anike.

⁶Kughengu kiuno achipi keno Alhou ye tipau shi nani: khunono nongu ghimeqhi ani keno tipaqo ghime nanike,

⁷nongu nigholo aghime shiakeqoye pano alokughuno tsu nani. Hiye Ampeu Jisu no kungumi sasu kungugha lono ighi kelono tishi nani.

⁸Ami kuyiqu pesu Alhou mthakemi ngo niMpeu Jisu tsakiviu gholumokemi shou aghime tsu nani.

⁹Timi tipaqoye alhokupujulo kutsakungokeu ghime ithulu nani eno Ampeu kimthejukuvu lono hapupove nani.

¹⁰Tiye Ampeu no pawu timiqo zulono ajekipi luke tsalalo eno pa pulu chekemi gholo pa gihuke tsala lono tishi nani. Nongu ghi kupulumiqo gholo sulu nani kughengu ninguno pikeu tsapehu nonguno pulubeluvae.

¹¹Tighenguno ninguye pulhapuju nongu ghenguno inikhu acheni, tishianguno ningu Lhou no nongu pelo pano kuluvekeu kuxulo akuzupushi xulupe niyeke eno pano pa kuka kumto pesu nongu kivipu eno akupulu lono akumla shikeu kumtsu shikupulu peni.

¹²Hitoi shikeuno ningu Lhou eno Ampeu Jisu Khristo wu kupukini kiqi lono nongu gholo ni Mpeu Jisu jepipilu nani eno nonguno pa gholo ajepipilu nanike.