Read Sumi Naga 2 THESALONIAMI 2 Bible Online

2 THESALONIAMI 2 - Sumi Naga bible

2 THESALONIAMI 2

¹Athikuzumiqo, niMpeu Jisu Khristo ighini chekeu eno ningu hekutsukumqo pesu pa sasu kusho nikeu vehu ghenguno nino nongu qhuiniju ani,

²ike Ampeu Tsala ighivea kepi puzu nongu kukumsu thoghu thoghu shikevilo. Kumsujukelo khualano tungkuptsa piake lono momu atsa pikulhawuke lono chilukeu momu ningu launo yesu ithulukeulo yepuaghike pi aghiluvi.

³Timi khuu pelomu kiu lalo nomu nongu pishiqhive pekevilo; kughengu Alhou hekibide ashekhau shimphi loye eno Alhoksau Timi hu,[1] kutsaqhive nike kutope puakehu ipeghi mphi loye tipa Tsala ighimo nani.

⁴Paye Alhou ipicheke jeli momu mllachekeu thime jeli kumtsu shou akumou shinani, eno tipaqo kumtsu nguno pano akiqheuke pi nani, pano Alhou chinekilo iqa puzu pa ampiuno Alhou kepi piwuve nani.

⁵Ino nongu gholo acheke lono hipatsa piche keu nonguye kumsuchilelu mokesha?

⁶Itodoloye kiuno pa hakha pesu ani keno nonguno ithi anie, tishianguno pa do kophepuakeu lono ipeghipeniyeke.

⁷Kughengu muzamghalei keu kixikilau huye itehighi tuqhouno akumla shiauvae; ikemu pa hakha pesu akeuno kuhave kethiuno kiu shiniye anikeno tipau shilu nani.

⁸Tileno Alhoksau hu pephe ipeghi nani, ikemu Ampeu Jisu no akimthejukuvu lono pephe ipeghi kelo atuthu kisheno Alhoksau hu pithive nani eno kutsapiniyive nani.

⁹Satan no pa peitha akeu kukakumto lono Alhoksau hu ighi nani eno akumzapu kumla jeli ngo kichileu michipu eno akichiqhipu kutomo shipepiye nani,

¹⁰eno alhoksa pishikiqhi jeli kutomo pesu puhavenikemiqo shou shipiye nani kughengu panongu xaluve kepushi akeu kuchou hu ikhilumo eno kimiyemoe.

¹¹Hi ghenguno pishikiqhipu kije lakhi Alhou no panoqo shou puwutsu, tiye panoqo pelo akimki pulupeniyeke,

¹²tishianguno khunoqono amikucho kumolo aghuiloqhiyi cheni eno kuchou pulu chemo keno tipaqo kileqhive niyeke.

¹³Ikemu athikuzumi, Ampeu no kimiyechekeqo, ninguye ado kumtsulo Alhou shikimthi anicheni. Alhou no Aghungu lono nongu pesu pawu timi shilu eno kuchoulo akupulu akeu vechewo pano atughushi nongu kisheluvae.

¹⁴Ninguno atsakiviu pesu nongu vilo asheshukeu vechewo Alhou no hipaulo nongu kuluvae, tishianguno nonguye ningu Mpeu Jisu Khristo kimthe jukuvu alupeniyeke.

¹⁵Tighenguno athikuzumiqo, mutotoi puthugholulo, eno ninguno atsalo na yesulo namu kuchou pekishepewo nongu shikavekeu hu tsatsayi tsuqupelulo.

¹⁶NiMpeu Jisu Khristo ampino, eno niPuh Alhou, khuuno ningu kimiye acheni eno kupukini vechewo lhokta lokughunopu ngo lajupu kivi pesu ningu tsukeno,

¹⁷amlo kuloghi pesu tsu eno nongu shikumto tsuno atsapi lona akumla lonamu akiviu shilu peniyeke.