Read Sumi Naga 2 THESALONIAMI 3 Bible Online

2 THESALONIAMI 3 - Sumi Naga bible

2 THESALONIAMI 3

¹Ashekhashi athikuzumiqo, nighenguno inikhutsu alo, tishianguno Ampeu tsape hu nongu gholo kishi shilukeno papashi kuphalu penike eno ajepipilu penike,

²Alhou pelo kixikilami ngo alhoksami launo ningu xaphelutsu penike inikhutsu alo; kughengu timi kumtsuno atsape shikeu pulukemi kumoke.

³Ikemu Ampeu ye pukhubekuluke; pano nongu shikumtotsu nani eno alhoksau launo nongu shokhalutsu nanike.

⁴Nino khikhi nongu vilo shilopi pikeno nonguye tipau shiaghi nani eno shiache nani kepi nongu shou ni mlo ithamokeu Ampeu launo anie.

⁵Alhou kikimiye eno Khristo no kutu-ukulu tsukeulo Ampeu pelo nongu sawu peniu.

⁶Athikuzumiqo, Ampeu Jisu Khristo jelono nongu vilo nino piani, athikuzumi khuno akipichi shighi xucheni puzu ninguno kutsupiyekeu kiqi lono xucheghimo nikeno tipaqo launo kugho susu auvelo.

⁷Kughengu ninguno kiu kishi shi ache keno nonguye titoi shikepukepi nongu ampino akivishi ithi anie. Nongu sasu achekelo ninguye akipichi shipuamoe,

⁸ninguye ame tsumono kutami khuu chuqupumu chupuamoe. Tishikekumo puzu ninguno ghichhe ghimeshi putho pucho akumla shicheke, tishikeu huye ninguye nongu khuumu punaqhimo niyeke.

⁹Ninguno hitoi shikeuye kutami punaqhi nikeu achipi kumoke ghenguno kumoe, ikemu nongu pelo niwu ghushoghili pape peniyeke.

¹⁰Kughou nino nongu gholo achekeno nongu vilo hipau pivae: “Timi khuno mlamo nikeno paye chukepu kumoe.”

¹¹Kughengu nino chilukeuye nongu khamiye akipichishi xuacheni eno kiumu mlamono kutami kumlalo kupunatsu keu likhike.

¹²Ampeu Jisu Khristo jelono nino timi tipaqo vilo piputo eno hakite anike, panonguye kithikiyi xumayesa eno pututa kuxu ghenguno mla mayesae.

¹³Athikuzumiqo, akivipu shinikeulo qeyi-nayi kepu kumoe.

¹⁴Yesu hipaulo ninguno pipuakeu khuno pelumo nikeno pa jukutope pualo eno pa pelo kujovepeni kehu palokutovelo.

¹⁵Pa jupesu aghumi lakhi toi shikevilo ikemu athikuzuu lakhi toi pa loshiputsu tsulo.

¹⁶Aghuloki eno ala thwokhalo alokughunopu Mpeu pelo alokiqi nongu tsupeniu. Ampeu no nongu kumtsu sasu apelo.

¹⁷Ni Paul ampino i-u pesu petha hipau yelu ani. Iwu yesu kumtsulo hino amichike; hipau gholauno ino yecheni.

¹⁸Ningu Mipeu Jisu Khristo wu kupukini nongu kumtsu gholo apelo.