Read Sumi Naga 1 TIMOTHI 1 Bible Online

1 TIMOTHI 1 - Sumi Naga bible

1 TIMOTHI 1

¹Ni Xakuluu Alhou wu ahza eno Khristo Jisu lajupu lono Khristo Jisu wu apostol Paul no,

²akupulu lono inu kuchou Timothi lau yelu ani. Apuh Alhou eno niMpeu Khristo Jisu no kupukini ngo kimiyeqhiyikeu eno alokiqipu otsu peniu.

³Ino Makedonia kudau wuchekelo ovilo pivekeu toi noye Efesia lo ngo aghilo. Tilehi timi khamino kichileu kukutsu pesu kutsupiye anike tipanoqo vilo tishi kevilopi ahza tsulo.

⁴Panoqo vilo kughakichetsaqo ngo ashekichi kuhakeu apu-asu iko ighikeu jeqo qhivelo pilo, kughengu akukutsu tipaqoye Alhou ghola hu akupulu vechewo heshelupe nikeu kumo puzu kutsalakilekepu haputhu chenike.

⁵Ahza hipau tsukeu kimijiye amlo kithe ngo tsughukhuyi keu lokumsu ngo mutsumishei keu kupulu launo ipeghi chekeu kikimiye hu haputhu tsuniyeke.

⁶Timi khamiye hipaqo launo ala vepimi wuveno adoutsa kughakile keulo idewove cheni.

⁷Panonguye Alhou yezah kukutsumi shinishi cheni, ikemu panonguno kiu tsa pi eno kiu ghenguno pikeno muthamu tsatsayi shikumto acheni.

⁸Nino ithiakeuno Ayezah ye akiqi lono peitha aye akivike.

⁹Tishimaye hi ithimasa kepushi ani ike ayezah qoye timi kivimi ghenguno mlape puamoe ikemu ayezah hexakemi, hekibidemi Alhou kumthami, axine shichekemi, achineyeh thachekemi, mithemokemi, apuh ghiqhi kemi,aza ghiqhi kemi, timi heqhi-buqhi kemi,

¹⁰salha-shupukemi, kiptimino kiptimi sasu kughupakemi, timi kughasawo jekemi, akimkimi, akimki shepe shikemi momu kuchou kukutsu nguno bidelau kiukiumu shikeu ghenguno ayezah mlape puacheni,

¹¹akukutsu tiye ipelo pikulhapeniye pichetsukeu tsakiviu sasu lakhike; akimthe jukuvupu eno akumghapu Lhou tsakiviu huke.

¹²Akumla hipau shipeniye akumto itsuchekeu niMpeu Jisu Khristo shikimthi ani, kughengu pano ipichebe kulupu shiaghi puzu pa kumla shipeniye isusulu

¹³kethono puzuu niye pa thaighakemi, pa shikimighikemi eno aka- aghavesu kemike. Ikemu pano ikimiyekututsue kughengu pulumokeu lono mthano ino mlaithacheke.

¹⁴Jisu Khristo gholo xukimepe akeu vechewo akupulu ngo kikimiye ningu wu khikhi ani keno tipau gholono niMpeu kupukini shishe ishou lepuku tsuke.

¹⁵Hiye kumtsu ikhilu puzu pulukepu tsapi lakhie, tiye axinemi xalunike Khristo Jisu no ayeghiqha lau ighie. Niye axinemi kumtsu nguno alhoksau ke;

¹⁶ikemu puthaputsano Alhou no hipau kiqi ghenguno ikimiyekutuke tishianguno ni axinemi gholo alhoksau lolo Khristo Jisu pelo pawu kutuukulu lukumkhashi piyelupeniyeke. Pano ipelo hithiu pa pulu lupuzu lhokta kuxu ithuluniye akeqo lau kichekipiye lakhi shipeniyeke.

¹⁷Lhokta Kukau thivemlakeu eno ithulu chemokeu Alhou ye pa likhikeu pa lau alhokupujulo agigihu eno akimthe jekipi shi achelo! Amen.

¹⁸Anu Timothio, ino hipau zah pesu otsu ani ike khaghino tungkupumino omiji puzu atsape shikeu kiqi lono, ike atsape tipaqono oshikumtope puzu,

¹⁹akupulu tsuqupe eno alokumsu akivi pupuzu aghukishi akivi shilupeniyeke. Timi khamino pano lolo alokumsu akeu pevekeu lono pano kupulu shipusavae.

²⁰Timi tipaqo gholo Hemenio ngo Aleksander pama ghi lakhike, ino pama pesu Satan kuka lau phesuvetsuae, tishi anguno Alhou thaigha pemonikeu ithipeniyeke.