Read Sumi Naga 1 TIMOTHI 5 Bible Online

1 TIMOTHI 5 - Sumi Naga bible

1 TIMOTHI 5

¹Muchomi vilo alomi pikevilo ikemu apu lakhi toi pa qhuinijulo. Apumiye athikuzumi toi peithalo;

²topumiye aza toi peithalo eno ilimiye achepu toi muqhamiqhiyi shi peithalo.

³Khunono kuchouno chimemi keno tipanoqo lau kuphu gihulo.

⁴Ikemu chimemi lakhino anuli momu atilimi aghiaye tipaqo pelo pano kibolomi lau paghi achineyeh kiqi lono shikepu shiakeu ithipekepue, eno titoi shikeu lono apu-aza momu asu-apuza lochilepekepue, kughengu hiye Alhou pulou ke.

⁵Khuuno kuchouno chimemi keno eno li tucho hejukemi kuhakeno liye Alhou shou lajupu bepeauvae eno putho pucho Alhou pelo kuphutsupenike akighinishi khu acheni.

⁶Ikemu chimemi khuno li kuxu kilhekulhu xuni keno liye xu anamu kithimi shiauvae.

⁷Akukutsu tsa hipau pesu panoqo vilo pilo, tishianguno timi khuu pelomu panoqo thaigha pemonike.

⁸Timi khuu khuumu abolomi hejumokeuye eno tiye akhotono asholokumi hejumokeuye akupuluchine phevae eno paye pulumokemi nguno alhoksauke.

⁹Chimemi ampe lhotsugho shive aghikeqono aje kihipuakeqo gholo kihisulupelo. Tinguno alauno liye akimi lakhi kilo kughuna puaghikemi;

¹⁰eno akumla kivi shichekeu ghenguno ajepipi cheghikemi, atianuli akivishi saputhu puaghikemi, inami sasukinimi, Alhou qemi pukhu qhutsuchekemi, shilukusami kuphu chekemi eno thwokhalo akumla kivi shichekemi shiaghi masae.

¹¹Ikemu topu lhothe chimemiye kihikusu shi kulaumokemi gholo kihisu pekevilo; kughengu pano shiaji pulouno kulauvenishi kelo panonguye Khristo launo putosuve chenike;

¹²eno tishi keulo Khristo lau pano shoqhi atughulo shipuakeu hu hephoveno pimive cheni.

¹³Tinguno alaughi panonguye adou lono ado peveghi aki atsutsulo iqhoiqi anikeu shikalu cheni, eno adou lono ado peveke likhi kumono inipugha pimokepu tsa pesu jeku kughakuho eno pisumokepulo pisu nike ithiuve cheni.

¹⁴Ikehu niye topu lhothe chimemi pelo kulauvepe nishi, atianuli auvepenishi eno akibo peithauve penishie, tishianguno ni ghumi pelo ni lhoksa pipemo niyeke.

¹⁵Kughengu chimemi khamiye Satan papeniaye xachile idewove ake.

¹⁶Ikemu totimi kupulumi lakhi shiaghi puzu lino kibolo chimemi aghiaye, liye tipaqo tucho heju masae eno akukuhou pelo tipau amakho pupekevilo, tishianguno akukuhou pelo kuchouno chimemi shiaghikeqo tuchomujolu pekepue.

¹⁷Akukuholo kichimi khunoqono sakiphemi shipuzu akumla kivi mla cheni keno atha-aqo kishe-kishe ithulukepu akuzupuke, tiye akhotono kutsu shika keulo ichhe imechekeqo.

¹⁸Kughengu kuchoyesulo ishi pikeu ani, “Kughou amshitsuno athi qopheni keno tipau kichi khavetsu kevilo,” eno itaghi pipuakeuno, “Akumlakishimiye pa tha-aqo ithulukuzuke.”

¹⁹Timi kini momu kuthuno thopi tsuke thiuno kumoaye kichimi shou ngukubekeu tsa khilemu initsu kevilo.

²⁰Khunoqono axine shicheni keno mishi zulono alomi pilo, tishianguno kutami pelo musave penike.

²¹Alhou zulono eno Khristo Jisu zulono eno kungumi kishe kipheqo zulono opelo akukutsu tsa hipaqo pape penike ino ohakite ani. Khilemu kumsukutoju mono kughathabe kevilo eno agi jumono shilo.

²²Ampeu kumla shipenike ghenguno tsaqutsaleyimo keloye khuu shoumu a-u betsu kevilo. Kutami xinelo kuloji kevilo, olikhi okughape muqhamiqhiyi shipualo.

²³Opo tamono suachekeu ghenguno azu likhi yekevilo ikemu atsayi-ji kititi sholo.

²⁴Timi khami xineye mutsuqheyive cheni eno vejoi panoqo sasu kughakuthapulo suve cheni; ikemu kutami khami xineye athiu likhino ithulu cheni.

²⁵Tihutoi akumla kivi ghi mutsuqheyive cheni, eno mutsuqheyimono aghi namu kusuvemla nani.