Read Sumi Naga 2 TIMOTHI 1 Bible Online

2 TIMOTHI 1 - Sumi Naga bible

2 TIMOTHI 1

¹Khristo Jisu gholo xukimepe akeu lono akuxupu ghili piqhipuakeu pikulhape nike Alhou pulou lono Paul pelo Khristo Jisu wu apostolmi lakhi shilupe.

²Ino kimiyechekeu nu Timothi lau yeani. Apu Alhou eno niMpeu Khristo Jisu kupukini kikimiye eno alokiqipu otsupeniu.

³Ipunoqo toi imlo mutsumisheyi shipuzu ino qechekeu Alhou shikimthi ani kughou ino akighini shinikeno tamono okumsulu ghi pa shikimthi acheni.

⁴Ino onhezu kipiji kumsulu cheni eno niye alokivi lono osasu kusholu nike putho-pucho khekulhoshi acheni.

⁵Nono mutsumishei keu kupulu akeu ino kumsulu acheni, tiye opuza Lois ngo oza Eunis pama kupulu achekeu toi noghi tipau aghi nani kepi ino pulu ani.

⁶Tighenguno ino oshou kukumgha betsu kelono Alhou no agho otsukeu hu iquipeghi penike opiputo ani.

⁷Kughengu Alhou no ningu tsukeu ngu-aghaye ningu pelo msa-ichi peniyeke kumoe, ikemu akuka kumto ngo kikimiye eno alikhi aghasulukeu ngu-agha ke.

⁸Tishiaye, niMpeu shepe shinikeu ghenguno kujo-mza kevilo momu pa ghenguno ino akughushia keu jupesu kujo-mza kevilo. Ikemu Atsakiviu ghenguno aghime shikeulo Alhou kuka kumto lono osaje lulo.

⁹Ninguno kiuala shilupuaghike ghenguno kumoe ikemu pa pulou kimiji eno pa kukupu ghenguno ningu pelo pawu timi shipeniye pano ningu xalu eno kuluke. Hiye khaghino Khristo Jisu gholono ningu tsuke,

¹⁰ikemu niXakuluu Khristo Jisu ipeghikeu vechewo itehiye ningu lau tipau pephepiyevae. Kughengu Khristo no akithi kuka kishekhave tsuke eno Atsakiviu vechewo akuxupu eno tsu-mavemla keu kuvu sughitsuke.

¹¹Atsakiviu hipau pikulha penike ghenguno apostolmi lakhi eno kutsuchekemi lakhi shighi Alhou no isukusu shie,

¹²eno highenguno hishi aghime shianie. Ikemu niye kujo-mza chemoe, kughengu ino khuu pulube chenikeno ino ithi ani, eno ino pulu akeuno Atsala hu tomoke kutolo pano ilau kiu pichebe puanikeno tipau paye khe kulupu shi ananike.

¹³Nono ilauno chilupua keu kuchou tsa ghola hu papechelo, eno Khristo Jisu gholo akupulu eno kikimiye akeulo xuachelo.

¹⁴Aghungu Kimthe nilolo achekeu huno aghokivi opichebe puatsukeu hu jukutolo.

¹⁵Nono ithi aghi nanike Asia yeghiqhalo akemi kumtsuno iqhivae, eno tipanoqo gholo Fugelo ngo Hermogeno pama ghi iqhivae.

¹⁶Ampeu no Onesifora no kibolomi kimiyeqhiyi tsupeniu, kughengu ghuthu kutomolo pano ilopivitsu cheke. Paye ino akughu yikichhelo akeu jupesu kujo-mzamoe;

¹⁷ikemu kughou pano Rom lo ighikeno paye khekulho shi iphusu ighino isasu kusholuke.

¹⁸Tipa tsalani pa pelo kikimiye ithulu penike Ampeu no kumghatsu apeniu! Efesia lo akelo pano ighenguno akumla kivi mlakeu hu noye akivi shi ithianie.