Read Sumi Naga 2 TIMOTHI 2 Bible Online

2 TIMOTHI 2 - Sumi Naga bible

2 TIMOTHI 2

¹Tishiaye, inu, Khristo Jisu gholo xukimepe akeu kukupu vechewo mutotoi shilo.

²Thopimi kutomo kua lono ino pikulhache keu tsaqo nono chilupua keu hu ikhilulo, eno tipau pesu nono pulubekulumi, khunoqono kutami kutsupiyelu nani keno tipaqo lau pichebetsulo.

³Khristo Jisu ghushimi kivi lakhi toi noye aghime kusaje lulo.

⁴Ghushimi lakhiye vejoi akumla shiakeloye aqha kuxulo xukutshu chemoe kughengu pa kimijiye pa kishesulukeu kijemi pulou shitsuniyeke.

⁵Pokuxu kelo ilokemi lakhiye ayeh papelumo aye asaxu qemlae.

⁶Alukichimi khunono ichheime mla cheni keno ghile hukelo pa paghino asaje atughiu ithulu masae.

⁷Ino kiu pianikeno kumsukuto julo kughengu Ampeu no opelo thwokha ithitoilupe nanike.

⁸Jisu Khristo, akithi lono xuthughive keu eno David polo kughukomi lakhike pa kumsululo. Ino pikulha chekeu Atsakiviuye hike.

⁹Highenguno niye heqhi-buqhichekemi lakhi toi aghime shiani eno ayikichheno tshupe anie. Ikemu Alhou tsaye ayikichhe pe tshuve mlae,

¹⁰eno Alhou wu kishekiphemiqo ghenguno niye thwokha puqheluvetsu anie, tishianguno panongu ghi Khristo Jisu launo akimthe jekipino xakulupushi akeu ithulupeniyeke.

¹¹Hiye kuchoushi pichekeuke: “Ninguno pa gholo thive aye ningu ghi pa gholo xulu nani.

¹²Ninguno puqhekulushi aye, ningu ghi pa gholo ka nani. Ninguno pa peve aye, pa ghi ningu peve nani.

¹³Ninguye akupulupu shimonamu pa ye akupulupu shi acheni, kughengu pa ye pa likhi pa peve mlae.”

¹⁴Nowu timiqo vilo hipau pesu piputolo, Alhou zulono panoqo vilo atsa kusuxa kevilopi tsaquyi kutughulo. Tiye akivipu kiumu shimlake ikemu iniakemi shipusa nikeu likhike.

¹⁵Akumlami lakhi huye pa kumlalo kujovemo nike kuchou sutsa akivishi pepimhe puzu Alhou zulo ikhikulupu shinike tolukivi thaqhu pukaputsalo.

¹⁶Alhou sumokeu tsa kughakile keulo chhosu kevilo; tiye timi hasusu alaushi Alhou sumokeulo wuve chenike,

¹⁷panongu tsapiye apiyino ashi chupuhakeu toike. Humenia ngo Fileta pamaye tipaqo gholomike.

¹⁸Pamaye kuchou laghi pheveno ningu wu xuchilethughi keuye hechevae ipi puzu timi khami kupulu shipusavetsu anike.

¹⁹Ikemu Alhou no ghope qhikeu akumto boqha huye tulamlae; tipaulo ishi yepuku puanike: “Khunoqono Ampeu wu timi keno pano tipaqo ithi ani,” eno “Ampeu laumi ke pichekeqoye alhoksa kumla launo putosuvelo.”

²⁰Aki kuloghi lakhiloye shunatsandiyino akhu ajukhu shikeu likhi achemoe, ikemu hamiye ayeghi ngo asu pesu shikeu acheni; hamiye avehu akhotopu lono peitha cheni ikemu hamiye inapugha peitha cheni.

²¹Timi khunono alhoksa inapugha keu launo mithelu nikeno avehu akhotopulo pa peithalu nani, kughengu paye akumla kivipulo peitha kulupushi pa Mpeu lau ikhipetsuve keu shi kutope anike.

²²Ikehu lhothemi shiakelo ngosukumla launo povelo eno amlo kimthe shino Ampeu vilo khukemi muqo gholo supuzu amikucho, akupulu, kikimiye eno kuloni kughuvuyi keu shinikeu phulo.

²³Mubomzu eno akukumsu kuhamithe keu kikighelo chhosu kevilo, tipauno mutomushuyi keu ipeghive cheni kepi nono ithi anike.

²⁴Ampeu qemiye mutomushuyi kepu kumoe, ikemu kumtsu lau iqu ighayikeu, ghutsu-ghulayi keu kusuqhikuluu, akukutsuu

²⁵eno pa mujochekemi lau shikithetsu kelo agholauno shimasae. Ishiake Alhou no tipaqo pelo amlo xaidelupeno kuchou ithi peluvi.

²⁶Tishiluaye panonguno kumsuchilelu nani eno tughami no panoqo mepe qhi puzu pa gho apulou shiape keu lichhe launo polu nanike.