Read Sumi Naga TITO 2 Bible Online

TITO 2 - Sumi Naga bible

TITO 2

¹Ikemu noye kuchou kukutsulo kiu shilopi puanikeno tipautho pesu kutsupiyelo.

²Muchomi shivekeqo vilo pano kupululo, kimiyekinilo eno kutuu kululo iquneyishi, tsaqutsaleyishi eno alikhiahakhalu ishilopi nono panongu vilo pilo.

³Tihutoi topumi shivekeqo vilo Alhou sukumsa kuxu xulopilo. Panonguye timi xishi jekukemi shimoni momu aji kushomi shimoni. Panonguye kiuno akivi keno tipau pesu kutami kutsukepu,

⁴tishianguno topulhothemi sapheputhu pesu pututa kimi ngo atianuli kimiyelupe,

⁵alikhi aghasulu muqhamiqhiyilu, akibolo anipu kivi shilu, agholauno peithalu, pututa kimi qhoqhu gihulupe ishimasae. Tishianguno Alhou tsape shichekeu hu timi khunomu pipusamo nani.

⁶Tihutoi apumi shiakeqo vilo alikhi aghasulopi hakitelo.

⁷No ampino thwokhalo akumla akughutha kivi shipuzu timi pelo oju pesu xupelo. Okukutsulo mutsumisheyi shilo eno mishisheyi shilo,

⁸timino pipusapughayi mokepu kuchou tsa pi shilo, tishianguno ghobide chekeqo pelo ningu lhoksa pikepu kiumu kuhaveno kujove penike.

⁹Aquaxemi vilo pano mipemi qhoqhu gihu, eno thwokhalo panongu mlo kiqipu shilo pilo. Panonguye amipemi ghechilekepu kumo

¹⁰momu kuzukugho shikepu kumoe, ikemu thwokhalo pukhubekulu shimasae, tishianguno panonguno shikeu kumtsulo niXakuluu Alhou ghili kutsupiye chekeu jukighilepu shilupe nike.

¹¹Kughengu Alhou kupukiniye timi kumtsu xakulupu ghenguno ipeghivae.

¹²Tino ningu vilo Alhou sumokeu kuxu ngo ayeghilomino minechekeu pheveno hipa yeghilo iqu-ighayi keu ngo mutsumisheyi keu eno Alhou lau amlo tsukeu kuxu xulepi ningu kutsupiye cheni,

¹³tiye nilokivipu Tsala, niLhou akijeu eno Xakuluu Jisu Khristo no akimthejukuvu lono ipeghi nike kutolo laju ghi kheakeuke.

¹⁴Pano ni ghenguno pa mpi pesu tsuveke, tiye alhoksapu jeli kumtsu launo ningu xapheluniyeke eno pa laumi mithemitheikemi shitsuniyeke eno akivipu shinikeulo azukini shipeniyeke.

¹⁵Thime hipaqo pe pilo: nowu timi shikumto eno sakiyi nikeu kuka kumtsu peithalo. Timi khuu pelomu ojukunatha pekevilo.