Read Sumi Naga TITO 3 Bible Online

TITO 3 - Sumi Naga bible

TITO 3

¹Now timiqo vilo ayehkipemi ngo kukami qhoqhu eno panoqo ghokulu shilo pilo eno akumla kivi kumtsu shinikeu kutolulo pilo.

²Timi xishikevi, mutomushuyi kiyikevi, ikemu timi kumtsu lau iquneyi shipuzu akumtshakughuvu shilo pilo.

³Kughengu ghuthu lakhiloye ningu ampi ghi mbomzumi, aghelumokemi eno achipikumomi shi acheke. Eno ashiaji ghakiqipu ngo aghoapulou qemi shi acheke, phimokilekeu eno anhekushulo xuacheke, kutamino ni mithi eno nino kutami mithi cheke.

⁴Ikemu kughou Alhou wu iqemokeu kikimiye ngo akivipu hu pephepiye keno,

⁵pano ningu xalue, tiye ninguno akumla kivi kiwala shiluke ghenguno kumoe, ikemu pa ampino kimiyekini kehu lhokikithe shi qhukimithe keu vechewo eno Aghungu Kimthe no akuxu kithe shitsukeu vechewo pano ningu xalue.

⁶Kughengu Alhou no ningu shou kupukunoshi Aghungu Kimthe puwu tsue,

⁷tishianguno pawu kupukini lono ningu pesu Alhou lau achipikaluve eno lhokta kuxu laju chekeu mheghi kiyighimi shilupeniyeke.

⁸Hiye kuchou tsa lakhike. Niye opelo hipaqo pikichichi apenishike, tishianguno khunoqono Alhou pululuve akeno tipaqo pelo akumla kivilo amlo tsuqhiyi shipeniyeke. Hipaqoye timi ghenguno akivi eno avehupuke.

⁹Ikemu mbomzushi kutsalakeu, apu-asu kughuko ghili, mutomushukeu eno Ayezah ghenguno kiyi keu launo tsughuluvelo, kughengu tipaqoye ala heshelukepu kuhae eno adouke.

¹⁰Timi khuno kijethani keno ghuthu akiniu kutolo likhimu pa hakhajulo, eno tipathiuye pa vilo kiumu shilopi kevilo.

¹¹Timi titoi kemiye kusakugha kepi ithilo, eno pa likhi pa xineno paye achipi kumoukepi pitsuauvae.

¹²Kughou ino olau Artema momu Tukhika puwuni keno noye pukaputsa puzu Nikapoli lo ilau ighilo, niye tileno susu tsala puwoni keu shianike.

¹³Noye pukaputsano ayezah kighithiu Zena ngo Apolo pamano aghuzulalo chekelo kuphu puwulo; eno pamano avehupushi aghikeu jutsulo.

¹⁴Nitimiqoye akumla kivipu lono ado peve nikeu ithi pelo eno kuchouno kuhakemi kuphukepu shipelo; eno panonguye avehu kuhakeu kuxu xukepu kumoe.

¹⁵Igholo akemi kumtsuno petha otsu puwu ani. Akupulu lono lakhishi akemi akusamiqo lau niwu petha tsulo. Alhou wu kupukini nongu kumtsu lau apelo.