Read Sumi Naga FILEMON 1 Bible Online

FILEMON 1 - Sumi Naga bible

FILEMON 1

¹Jisu Khristo ghenguno akughushi akeu Paul eno nithikuzuu Timothi pamano, ningu kumtsa mla achekeu akusau Filemon

²nichepukishiu Afia eno Khristo ghushimi nikusau Arkhipa eno okilo akukuho akeu lau yesu hipau tsuani.

³NiPuh Alhou ngo Ampeu Jisu Khristo no kupukini ngo alokiqipu pesu nongu tsupeniu!

⁴Ino akighini shikelo pulhapuju okumsulu acheni eno shikimthi iLhou tsu acheni.

⁵Kughengu nono Alhou timiqo kumtsu kimiyechekeu eno nono Ampeu Jisu lau akupulu akeu ino chilu acheni.

⁶Ino inikhu akeuno nono okupulu kutami sasu kusaje keu lono Khristo gholo ningu wu akivipu akeu kumtsu alaushi ithitoi lupeni.

⁷Ithikuzuo, ovechewo Alhou timiqo mulo vepiqi tsu achenike ghenguno, okikimiyeno ilau alokivi kije eno alokughunopu shishe sughitsu cheni.

⁸Tishikehu, Khristo lono athikuzuu shiluvea kehu kiu shipenishi anikeno niye mutotoi ahza otsulu kepushi ani.

⁹Tishimu kikimiye ghengu lono oqhuiniju nikeu shivae. Ino hi qhuiniju akeuye ni Paul, Khristo Jisu wu lashikami lakhi itehiye pa ghenguno akughumi shiakeu huno,

¹⁰Khristo lono inu shiluvekeu Onesima zuqhushi ino oqhuiniju ani, akughu shiake lono Alhou launo niye papuh shiluvae.

¹¹Puzuuye paye oghenguno avehupu shimlake, ikemu itehiye ikujo kinikujo ghenguno kuchouno paye avehupu shi auvae.

¹²Ino pa pelo olau idewope ani, imlo kuchou tsupuwu anike.

¹³Ino atsakiviu ghenguno akughushi ake thaqhulo pa pelo hilau igholo aghipenishi anike, tishianguno ozuqhushi pano ikuphuluni chenike,

¹⁴ikemu nono pulosutsumo keloye niye kiumu shimo nikeu shivae. Ogho apulou lono kuphu penishi ani kethono tsuyikhomo ovilo kimiyelopi pinishiamoe.

¹⁵Ishiake, Onesima no ado ikhonhei ghenguno olauno pove keuye opelo pulhapuju pa saluve peniye keniake.

¹⁶Hinguno hilau paye aqu-axemi likhike kumoe ikemu aquaxemi nguno akiviu ake, paye kimiyechekeu athikuzumi lakhiake. Paye ighenguno tihutoi akhoto shianie! Tishiaye oghenguno paye ayeghi kuxulo eno Ampeu lono kiutoi akhotopu shini chenikela!

¹⁷Ikehu, niye oposhuu kepi nono kumsulu aghi aye, noye ni ikhilu akeshi pa ikhilu chilelo.

¹⁸Pano olau kiwala akumou shipuaghi momu opi puaghi aye, ino lotsupe nikeu shi kihivelo.

¹⁹Iuno hi yepuku ani: Ni, Paul no lochile nani. (Kumchomaghi ovilo piputo akepu kuhakemu, okuxu ghi ishou bepe anikene).

²⁰Ike athikuzuu tipau kumsujutsulo, Ampeu jelono niye olauno alokepu hami lunishi anike; Khristo gholauno imlo vepiqitsulo!

²¹Hi yepuku apulaghi ino ithi anike noye ino kiu piani keno tinguno alau shitsu nani kepi pulu anie.

²²Tishiake dolo, ighenguno achebo lakhi kutope aghilo, kughengu ino laju akeuno Alhou no nongu kighini khochiletsu puzu nongu lau ipelo ighilupe nanike.

²³Khristo Jisu lono igholo akusashi akughushi akeu Epafra no petha nongu lau tsuani,

²⁴eno tihutoi igholo kumtsa mlachekemi Mark, Aristarka, Dema eno Luk ishino petha nongu tsu ani.

²⁵Ampeu Jisu Khristo wu kupukini nongu ngu-agha sasu apeniu!