Read Sumi Naga IBRIMI 12 Bible Online

IBRIMI 12 - Sumi Naga bible

IBRIMI 12

¹Ike ningu sheloye thopimi aqokitikhi hijejehino ningu suhu muxape anike ghenguno, ningu punaqhikeu jeli kumtsu eno axine khipauno tsatsayi ningu pufuluve cheni keno tipaqo xaqhiveni nolo, eno ningu zulo pokimhekepu qhitsukeu hu amloithamono poni nolo.

²Ningu kupulu hukuthuu eno kishekhau Jisu lau anhe-sukuqumono juni nolo. Pa zulo alokivipu qhipuatsukeu jupesu paye kros lo thinikeu kujo-mzakepu kepi kumsumoe eno itehiye Alhou wu akuka lakhu ajeu iqa ani.

³Jisu ye axine shichekemi qono shishe pa mithikelo paye kishive keno tsaquyi kumsujulo! Tishianguno nonguye aghuthi sumo nani eno amlo hauvemo nanike.

⁴Nonguno axine sasu kumjokeulo nonguye akithipushi ajih qokeu kutoloye mujochilekeu shiju mphie.

⁵Nongu ghuthi puxu tsuniaye, anuliqo ipi nongu kupuakeu nonguye kumsumavea kesha? “Inu Ampeu no sakiyi qoputhu keulo tsukhuyi shilo, Pano ovilo alomi pikelo aghuthi sukevilo.

⁶Kughengu Ampeu ye pano kimiyekemi sakiyi qoputhu cheni, Eno pano ikhiluakeu nuliye pano hecheni.”

⁷Sakiyi qoputhulukepu ghenguno nonguye kutuu lulo, Alhou ye anuliqo toi nongu saputhu anike. Apuno sakiyi qoputhu mokeu nuli khile ani kya?

⁸Anuliqo toi nongu sakiyi qoputhu keu kuha aye, nonguye anu kucho kumo puzu tuqhanu ake.

⁹Ike itaghi, ayeghilo nipunoqono nisakiyi qoputhu kelo ninguye panoqo qhoqhu acheni. Tishiaye, ninguye tinguno alaushi angu aghakupu Apu qhoqhu ghi xukepue.

¹⁰Kughengu ayeghilo nipunoqoye ado ikhonheyi keu ghenguno pano mlo chipiu shipeniye ningu sakiyi qoputhu cheni, ikemu Alhou ye nikivipu ghenguno shi cheni, tiye ningu pelo pa kimthe kusaje peniyeke.

¹¹Sakiyi qoputhu akeu tuqhudoloye khilemu aloviqhiyi chemoe ikemu aghimepu shi cheni. Tishiepimu khunoqomi aghimeshi puzu sakiyi qoputhuluve nikeno tipaqoye iquighayi keu mikucho lothi pithilu cheni.

¹²Tishiakehu, nongu-u thizumyi akeu suqhelulo eno nongu khonhe miqemileyi akeu shikumtolulo,

¹³nonguye ala kumzulo chechelo, tishianguno apukhu kinitavekeu huye ala chepimivemo nani ikemu shipiviluve nani.

¹⁴Timi kumtsu sasu kulashi anikeu pukaputsalo eno akimtheshi xunikeu pukaputsalo, kughengu tipau kuhakeloye khunomu Ampeu ithumla nani.

¹⁵Alhou wu kupukini launo xachile idevemo nike kutokupuyilo. Akukhu kimji sutsunibo toi ipeghi puzu tipau tughu huno kutami shipusalu nosake kutokupuyilo.

¹⁶Esao toi alhoksa eno achineyeh kumtha shive nosake kutokupuyilo. Paye kichi lakhi chuqupu ghenguno anoghiu mheghi jeveke.

¹⁷Nonguno ithianike, athiuye pano kukumgha lunishi kutu kelauno anhezu piji tipau phujukemu pa miliveke, kughengu paye xachilelu kepu dokivi phumlave.

¹⁸Nonguye Israilmino Sinai tolo ighi puzu ami iqukeu, akuzu, khumkhuleyi keu eno pasapagha bulukeu hutoikeulo ighimoe.

¹⁹Tilehi afuko ghugha eno atsapi sutsa timiqono chilukelo atsapi itaghi panongu putsa pemonike ghenguno qhuiniju.

²⁰Kughengu ahza tsukeulo panonguye puqhemlave: “Pichepighi pinamu naghuto dilu aye tiye atu pesu veqhi pithivelo.”

²¹Tipa tolo jupukukelo shishe akuyighupu kehu Muse no ishi pike, “Niye akumsano khokhoshive.”

²²Ikemu nonguye Zion tolo ighi ani, akuxupu Lhou phughi kungugha Jerusalem lo, eno kungumi kihikhamlakemi gholo ighi ani.

²³Nonguye Alhou nuli kichimiqo khunoqo je kungughalo yepuanikeno tipaqo muqolo, eno timi kumtsu shou Kughakuthau Alhou lau eno Alhou zulo amikuchomi nguagha kupukulu shivetsukemi lau ighilu ani.

²⁴Nongu Puloshoqhi Akitheu kimekutsuu Jisu lau eno Abel jih nguno kupuqhiyi pipuakeu kuzutepuku keu jih lau ighi ani.

²⁵Tighenguno, khuno pi ani keno tipau tsa inimovekeu shikevilo, kughengu ayeghi lono Alhou tsape shipesu panongu kutughukeu inimovekelo panonguye pomlave aye, tishiaye kungugha lono atsape shipesu kutughukeu ninguno initsumoaye ninguye kitilamu pokulupu kuhae.

²⁶Khaghiye pa sutsano ayeghi sukughuthake, ikemu itehiye pano ishi piqhi puani: “Ino itaghi ghuthu lakhi ayeghi likhi kumono atsutsu ghi sukughutha nani.”

²⁷“Itaghi ghuthu lakhi” ipikeu tsahuye lhophepe puakeu thimeye sukughutha nani eno ikhive nani, tishianguno sukughutha mlakeu thimeno acheuve nani.

²⁸Tighenguno ninguye sukughutha mlakeu yehkipeqha ithuluveake ghenguno shikimthi ani nolo. Ikehu akimtheshi ighukeu eno sumsakeu lono Alhou no ikhikulupushi pa mlla huthuni nolo;

²⁹kughengu ningu Lhou ye pitimuhakepu ami lakhike.