Read Sumi Naga IBRIMI 2 Bible Online

IBRIMI 2 - Sumi Naga bible

IBRIMI 2

¹Tighenguno ningu kuchou jeli khije chiluve akeno tipaqo amlo tsuqhiyi kumsukutoju masae, tishianguno ninguye putosupe wuvemo nanike.

²Kungumi vechewo tsuvekeu tsape huye kuchou kepi ithiani, khunono tipau papelumoni momu tipau gholumoni keno tipau qhemi aghime sholu cheni.

³Tishiaye, ninguno xakulupu kije hikithipu kughuchove aye ninguye kishipuzu polu nani kya? Ampeu pa ampino atughushi xakulupu hipau pesu asheshuke eno tipashelo khunoqono pa launo chilukeno tipaqono nivilo tipau huye kuchou kepi mutsu qheyi shive tsuae.

⁴Tipamtsa Alhou ghi amchipu ngo akumzapu eno akichiqhipu jeli shikeu vechewo panoqo gholo ashepe shi kuqhatsuke. Pano Aghungu Kimthe launo tsukeugho ghi pa pulou kiqi lono kusajetsuke.

⁵Alhou ye kungumi pelo, nino kugha chekeu yeghiqha, ti ighiniye akeu akithe yeghiqha shou hu ayehkipemi shipeniye qhipuamoe.

⁶Tike kumono kuchoyesu hamilo ishi pipuakeu toike: “O Alhou, timiye kiukeno noye pa kumsulu acheni kya? Timi kenokuu noye pa hejukuto acheni kya?

⁷Ado kitila ghenguno nono pa pesu kungumi nguno aqhokigheu shi lhoke, Akimthe jekipi ngo agigihupu pesu nono pa qhopipeke.

⁸Eno pa pelo thwokha kumtsu shou ayehkipeu shipeke.” Ike Alhou no timi pelo thwokha shou ayehkipeu shipeke huye thwokha jeli shou pa pelo ghusupe akeu tsake. Ikemu itehi akeuloye timiye thwokha qhasu peamoe.

⁹Ikemu ninguno Jisu ithikeuno paye ado kitila ghenguno kungumi nguno aqhokigheu shi lhoke, tishianguno Alhou wu kupukini vechewo pano timi kumtsu ghenguno thikepu shive. Ikemu pano akithilo aghimeshikeu ghenguno itehiye akimthejekipi ngo agigihupu pesu pa sheqhe ikhilu keu[2] ninguno ithulue.

¹⁰Alhou no thwokha lhophe eno heju acheni, pano Jisu pelo aghimeshi keu vechewo kupukulu shipe keu tiye achipike, tishianguno anu kutomo saghi puzu pa kimthe jekipi kusaje peniyeke. Kughengu Jisu likhino xakulupu kudau panoqo sawutughiuke.

¹¹Pano timiqo xine shikimthetsu cheni, ike pa eno pano shikimthevekemi kumtsu Apu lakhike. Tipau ghenguno Jisu ye tipanoqo pesu pa thikuzumi kepi pinikeu kujochemoe.

¹²Pano ishipiketoi, “O Alhou, Ino ithikuzumi vilo oje piphetsuni, Ino aqo-aho zulono osheqheni.”

¹³Pano highi pike, “Ino Alhou pukhubeni.” Itaghi pano highi pike, “Alhou no atianuli itsukemiqo sasu niye hilau anie.”

¹⁴Ike pano timi tipaqo pesu atianuli ipi chekemiqo huye ashi-aji puani, Jisu ampino panoqo kimihi shive eno timi phi-ashi kusaje puke, tishianguno pa kithi vechewo akithi kuka akeu tughami puhavetsuniye shike,

¹⁵tishi puzu akithi musakeu ghenguno akuxu kupuju tsughape achekeqo kuqhopheve niyeke.

¹⁶Kughengu mutsuqheyino paye kungumiqo hejuchemoe ikemu kuchoyesulo piketoi, “Abraham polo kughukomi heju cheni.”

¹⁷Tighenguno paye thwokha jeli lono pa thikuzumiqo kimihi shimasaveke, tishianguno panoqo wu pukhubekulupu eno amlo ighiqhiyi keu achinetou lakhi shipuzu Alhou huthupeniyeke, tishilukeuno timiqo xine pevetsukulupu shiniyeke.

¹⁸Kughengu pa ampino aghime shijuvae eno ghukuju sholuve akehu, paye ghukuju sholukemiqo kuphulu kepushi anike.