Read Sumi Naga JEMS 3 Bible Online

JEMS 3 - Sumi Naga bible

JEMS 3

¹Ithikuzumiqo, nongu kutomono akukutsumi shikepu kumoe, kughengu nonguno ithi anike ningu khunoqono kutsu cheni keno kutami nguno alau chixechileyi keu pesu ningu shou kughathabe nani.

²Ningu kumtsu ghuthu kutomo shipimive cheni, eno timi khuno pano pikeulo khilemu shipimi chemo keno paye viwotokulu timi lakhike, pa kuxu kuchopu ghasulu chenike.

³Ninguno khurshiqo kichilo ayitachu khatsu cheni, tiye tipaqo pelo ningu gholupeniyeke, eno tipaqo phimpi kuchopu khilau wukepu keno sawulu cheni.

⁴Azukilu ghi julo, tipaqoye akuloghike eno amlhu kumtono fusawu cheni, tiye helisa aghulo lakhino satsughuluve cheni eno tipau sakicheuno khila wunishikeno tikudau wuluve cheni.

⁵Titoi amiliye aphimpilo aghulo lakhi kemu aqhekuzatsa kije picheni. Ami kuyiqu kitila lakhino kishi aghasa kije pitive cheni keno kumsujulo!

⁶Amiliye ami lakhi toike. Amiliye niphimpi gholo achipikumo keu yeghiqha lakhike eno aphimpi kuchopu shipsa vetsu cheni. Amiyizu lono ighikeumi pesu nilhoaye kupujulo ami suvetsu cheni.

⁷Lhoxu jeli, aghau, itikiche, azulo lhoxu kumtsu chhikughuvulu cheni eno timino chhikughuvue,

⁸ikemu khuumu amili chhikughuvu mlae. Hiye alhoksa, ghasukumla lakhie, akithipu tughuno chhitoi ani.

⁹Amili pesu ninguno niMpeu eno Apu shikimthi cheni eno hipau pesu Alhou kimihi lono lhopuakeqo akusami ghusho cheni.

¹⁰Akichi lakhi lono kumghake tsa ngo ghushoke tsa ipeghi cheni. Ithikuzumiqo, hipau shipekepu kumoke.

¹¹Azupuki lakhi loye akungo ngo akukhuzu ipeghi cheni kesha?

¹²Ithikuzumiqo, khughuthibo lakhiye Oliv xathi pithi chemoe; momu atsayiboye khughuthi pithi chemoe; tikekumono amitizuye isaphayi keu zu qopipelu chemoe.

¹³Nongu gholo alokutsumi eno ithikututa shilukemi ani kesha? Timi tipauye pa kuxu akivishi xukeu vechewo mtsha-ivukeu lokutsu lono pa kumla pephepiyelo.

¹⁴Ikemu nongu mlolo kukhu-kimiji ngo anhekushu eno aghukha ani aye nonguye aqhekuzashi puzu kuchou shou akimkitsa pikepu kumoe.

¹⁵Tikithipu lokutsuye kungugha launo ighikeu kumoe; tiye ayeghiqha lowuke, tiye nguka ngugha ke eno tughakusapuke.

¹⁶Kughengu khile anhekushu ngo aghukhashi heshelu nishi keu ani keno tilehi kubangu keu eno lhoksa kugha kumla jeli kumtsu anie.

¹⁷Ikemu kunguuno ighikeuye mithemitheyi keuno atughiu. Hiye alakishi, iqunei keu, ikhilukile keu, akipimi pevekutsuno chhitoi eno alothi akivi pithi cheni; hiye agijukeu momu kuhakugha kuhae.

¹⁸Amikucho ghile hulukeuye alakishimino alashikeu piti xusukeu lono ke.