Read Sumi Naga JEMS 4 Bible Online

JEMS 4 - Sumi Naga bible

JEMS 4

¹Nongu gholo mutomushu keu ngo kichighikeuye kiulono ipeghi cheni kya? Tipaqoye nongu lolo ngosukumla phimpi sasu tamono kichighi keu lonoke kumo kesha?

²Nonguno thime lunishikutu ikemu tipau kuhae, ikelauno nonguno ghiqhi cheni. Nonguno thime minekutu ikemu tipau ithumlae, ikelauno nonguno kichighi mutomushu cheni. Nonguno lunishi keu ithumla keuye nonguno Alhou vilo khumoke ghengunoke.

³Nonguno khu cheni ikemu tipau ithulu chemoe, kughengu nonguno akumou lono khukehue, tiye nonguno ngosukumla ghapiqiniye khu chenike.

⁴Pukhukilemla keu lhoxuqo! ayeghi sasu ashou shichekemiye Alhou ghumikepi nonguye mtha kesha? Tighenguno khunono ayeghi sasu ashou shinishi keno paye pa pesu Alhou ghumi shianie.

⁵Momu kuchoyesulo, “Alhou no angu-agha nilolo qhitsukeuye anheshuqhiyi kumsukutu keu chhitoi acheni,” ipi puakeuye kumukumo kughashi kesha?

⁶Ikemu Alhou no kupukini tsukeuye tinguno alauke. Tighenguno kuchoyesulo ishi pipuani, “Alhou no aqhekuzami lakhave cheni ikemu mtshaivukemi lau kupukini tsu cheni.”

⁷Tighenguno nonguye Alhou qhoqhululo. Tughami mujochilelo eno paye nongu launo pove nani.

⁸Alhou lau kupunu ighilo eno paye nongu kupunu ighi nani. Nongu axinemiqo, nongu-u shikimthevelo! Nongu amlo kini puchekemiqo, nongu mlo qhukimthevelo!

⁹Amlo kughutashi ighalo eno amlo kighishi shi qalo. Nongu kunu pesu amlokighishi shi qakeu shivepelo eno nongu lokivi pesu amlo kumtshu shivepelo!

¹⁰Nonguno Ampeu zulo mtshaivulo eno pano nongu sunheqhe nani.

¹¹Athikuzumiqo, lakhino lakhi shou alhoksa pikevilo. Khunono pa thikuzumi shou alhoksa picheni momu pa thikuzumi shou kughathabe cheni keno paye Ayezah shou alhoksa pianike eno tipau shou kughathabe anie. Nono Ayezah shou kughathabe aye noye Ayezah papelukemi kumovae ikemu tipau shou kughathabekemi shiauvae.

¹²Alhou likhino ayezah tsukeu eno kughakuthauke. Pa likhino xakulupu eno shipuhave kulupu anike. Ikemu noye khuu keno okusami shou kughathabe cheni kya?

¹³Nongu khunoqono, “Ishi momu thoghiu ninguye aphughi hipau- hupaulo izuwuni eno ampe lakhi tilau ngoni cheni eno lhidi kumla shipuzu alla kighisheluni,” ipi chenikeno, itehi hi inilo.

¹⁴Kughengu thoghiu nongu kuxuye kiu shive nani keno nonguye mtha aphike. Nongu kuxuye akimhi lakhino ado kitila ipeghi puzu pai hauve keu toike.

¹⁵Tishiaye, nonguye ishi pikepuke: “Ampeu pulou shiaghiaye ninguye xulu nani eno hipau hupau shini.”

¹⁶Ikemu ile nonguye qhezalaki ani; titoi qhezakemi kumtsu alhoksake.

¹⁷Tishiaye, timi khuno achipiu kiu shikepushi anikeno ithi puzu tipau shimo nikeno tiye pa ghenguno axineke.