Read Sumi Naga 1 PITOR 2 Bible Online

1 PITOR 2 - Sumi Naga bible

1 PITOR 2

¹Tighenguno kusakugha kumtsu eno akimki tsa pikeu eno kuhakugha eno axekusu eno xishikile keu tsa kumtsu qhivelo.

²Anga kughununo akichhizu yenishike toi nongu ghi akimthe anguaghapu kichhizu yenishilo, tishianguno nongu ghi thuikulu puzu xakulupu shilu nani.

³Kughengu kuchoyesulo pikeutoi, “Ampeu no kimiyekeu nonguye puju-shijuno phuluvae.”

⁴Timino kideqhivekemu Alhou no amekushopu kepi kishelu keu akuxupu tuqu Ampeu lau ighilo.

⁵Akuxupu tuqu shi-ghi pa lau ighilo eno aghungulo ki shikeulo nongu peithapelo. Tilehi nonguye akimthe chinemiqo shighi Jisu Khristo vechewo aghungu lono aghashikeu Alhou lau ikhikulupushi mllalo.

⁶Kughengu kuchoyesulo ishi pipuani, “Julo, Zion lo ino atuqu lakhi qhipuani, Amekusho eno kishekiphe atsukupu tuqu Khunono pa pulu nikeno alokumtshuvepemo nani.”

⁷Nongu puluchekemiqo ghenguno atuqu hipauye amekushopuke; ikemu pulumokemi ghenguye kuchoyesulo ishi yepuakeu tsa atho shive; “Akikishimino kideqhivekeu tuqu huno atsukuputuqu akhotou shiveaghi.”

⁸Ike tipauye, “Timino kupuxalukepu tuqu lakhike panoqo pelo veqhivepe nikeu tuqu lakhike.” Panonguno kupuxalukeuye atsa papelumokeu ghenguno panoqo pelo tishivepe nikeushi Alhou no kughupe qhiveke.

⁹Ikemu nonguye kishekiphe lagha, Akukau chinemi, akimthe shiayeh, Alhou timike, tiye akuzu lono pawu akichiqhipu kuvu kudau nongu kulukeu Alhou kumzapu kumlaqo pesu asheshupe niyeke.

¹⁰Ghuthu lakhilo nonguye Alhou timi kumoe; ikemu itehiye pawu timi shivae; ghuthu lakhilo nonguye, Alhou no kimiyeqhiyi keu ithumlano cheke ikemu itehi nonguye pano kimiyeqhiyi keu ithuluvae.

¹¹Ino kimiyechekemiqo, ino nongu qhuiniju ani, hipau yeghilo inami eno kupokichemi ake ghenguno ashiajihlo ngosukumla nongu kuxu sasu pulhapuju aghushi akeulo khilemu phesu kevilo.

¹²Alhou mthakemi gholo ghushoghili akivi shilo, tishianguno panonguno nongu vilo kusakugha kumlami kepi nguku aghinamu pano ighike Tsalalo panonguno nongu kumla kivi ithulu puzu Alhou akishe tsupe nike.

¹³Timino kithipesu qhipuakeu jeli, ti Akukau [1] akiqheu shiakeu launa momu alhoksami ghime eno kivimi sheqhe penike,

¹⁴Ahng qo qhipua keu lau namu Ampeu je ghenguno tipaqo kumtsu qhoqhulo.

¹⁵Kughengu nonguno achipiu shikeu huno mbomzumi yekumtha hasuve penikeuno Alhou pulouke.

¹⁶Kuqhophevekemi toi xulo, tishimu noye kuqhophevekemi akepi tipau pesu alhoksa kumla jonha kevilo, ikemu Alhou qemi toi xulo.

¹⁷Timi kumtsu gihulo, nokusami kupulumiqo kimiyelo. Alhou sumsalo eno Akukau [2] gihulo.

¹⁸Aqemiqo, nonguye nongu mipemiqo qhoqhu masae eno gihukuzupu kumtsu pesu tsumasae, tiye ivunheyi eno akumtshami lau likhi kumono mughachhoikemi lau ghi tishimasae.

¹⁹Akumou lono nongu ghimeqhi keu namu nono Alhou pulou kumsupu ghi puqheluveaye tipau ghenguno Alhou no nongu kumghatsu nani.

²⁰Nonguno akumou shiveke ghenguno heqhikeulo nonguno kutuuluve keulo nonguye alla shilukepu kiu ani kya? Ikemu achipiu shikelo ghi nongu ghimeqhiaye eno nonguno kutuuluve aye, Alhou no tipau ghenguno nongu kumghatsu nani.

²¹Kughengu hikithipulo Alhou no nongu kuluvae, kughengu Khristo ghi nongu ghenguno aghime shiveke eno nongu lau kichekipiye lakhi qhipuatsu anike, tishianguno nongu pelo pa nepalo nesu peniyeke.

²²Paye kiu xinemu shipepuamoe; pa kichi lono akimkitsa lakhimu chilupuamoe.

²³Kughou pa thaigha keno paye thaighakeu tsa pesu ghechilemoe; kughou pano aghime shivekeno paye khumu shikumsamoe; ikemu achipi lono xathachekeu Kughakuthau, Alhou lau pawu lajupu bepe qhiveke.

²⁴Khristo ampino kros lo pa phimpi lono ningu xine xapuluveke, tishianguno ninguye axine launo thive puzu Alhou lau amikucho kuxu xupeniyeke. Pa zakuqo pesu nongu shipiviluvae.

²⁵Nonguye bheri ala puhavekeqo toike, ikemu itehiye nongu ngulho Kheu eno nongu Pighiu papelu penike nongu sachile saghivae.