Read Sumi Naga 1 PITOR 3 Bible Online

1 PITOR 3 - Sumi Naga bible

1 PITOR 3

¹Nongu anipunoqoye nongu kimiqo qhoqhu gihulo, tishianguno panoqo gholo Alhou tsa pulumokemi namu nongu ghushoghili lono panoqo zuluvekepu shiluve nani,

²kughengu nongu ghushoghiliye kiutoi mithemitheyi eno Alhou sumsaqhiyi keno panonguno ithuluve nani.

³Nonguye juvi peniaye ashou nanu: asa ghokunapukeu, achiku-achipu pepukeu momu aphimini chijebobo ukeu pepukepu kumoe.

⁴Ikemu nongu jukiviye nongu lolo kuchou mlo xapulo,iquneyi eno ivunheyi keu pesu khilemu idivemo keu jukivi shipelo, Alhou zuloye hino ighono amekusho chike.

⁵Kughengu khaghi akimthemi totimi khunono Alhou lau panoqo lajupu bechekeno tipaqoye pano kimi qhoqhukeu pesu pano jukivipushi pepucheke.

⁶Sara ye titoikemi lakhike; lino Abraham gholuche eno pa vilo ampiu ipi kucheke. Nonguno achipiu shi cheni eno kiunomu nongu shikumsa chemo aye nonguye itehi li tianuliqoke.

⁷Tihutoi nongu akimiqoye ithikututa shi ghi nongu nipuqo sasu kughunalo, totimiye miqemileyikemi kehu agholauno panoqo sasu xulo, kughengu panoqo ghi nongu gholo Alhou launo akuxupi ithulu kuqhakemike. Hitoi shianguno kiunomu nongu kukhu kighini vekhamo nanike.

⁸Ashekhashi, nongu kumtsu akukumsulo ngo amlo imekeulo lakhishi kuqhakulu shilo; athikuzumi kimiyekile ketoi lakhino lakhi kimiyelo eno lakhino lakhi lau amlo kumtsha eno ivunheyi shilo.

⁹Alhoksa pesu alhoksa lochile kevilo momu ghushokeu pesu ghushokeu lochile kevilo; ikemu tishinike zuqhulo kumghakeu pesu lochilelo, kughengu hikithipulo nongu kuluvekeuye nongu pelo Alhou launo kukumgha ithulupe niyeke.

¹⁰Kuchoyesulo ishi pikeu toi, “Khunono akuxu kupuqhiyi cheni keno eno atsala kivi ithulu nishi cheni keno, Paye alhoksa pinikeu lono pa mili kutsukiyi luvelo eno akimkitsa pinikeu lono pa mutsu miki luvelo.

¹¹Paye alhoksa launo tsughuveno akivipu shilo; Paye alokiqipu phulo eno tipau puzusu wulo.

¹²Kughengu Ampeu no amikuchomi shou jupuku acheni eno panoqo kighini initsu cheni; ikemu Ampeu no alhoksa shichekemi hakhave cheni.”

¹³Nonguno achipiu ghenguno azukini shicheghiaye khuno nongu shipusani kya?

¹⁴Ikemu amikucho shikeu ghenguno nonguye aghime shikepushive namu tiye nongu ghenguno alokivipuke. Tipaqo msaichi akepu kumoe momu amloksa shikepu kumoe.

¹⁵Ikemu nongu mlolo Khristo sukumsa qhilo eno paye Ampeu kepi gihulo. Nongu lolo lajupu akeu lhepiyelopi khualano nongu vilo iniju aye tipau khochile kepushi pulhapuju kutokupuyi pesu alo, tishimu akumtsha lono eno Alhou sumsakeu nongu mlolo xapughi tishilo.

¹⁶Nongu wu kiviksa lokutsu hu mutsumisheyi shipe pualo tishianguno kutamino nongu ghusho keulo, nonguno Khristo papemike ghenguno khunono nowu ghushoghili kivi hu pipusa nikeno pano tsapino panoqo shikukujove nani.

¹⁷Kughengu Alhou pulou shiaghi kepushiaye alhoksapu shikeu ghenguno aghimeshi keu nguno amikucho kumla shikeu lono imeve keu pavike.

¹⁸Kughengu Khristo ghi axine ghenguno ghuthu khavilo kumtsu ghenguno thiveke, amikuchouno amikuchokumomi ghenguno thive, tishianguno Alhou lau ningu saghiniyeke, eno aphimpi lono pa pithive ikemu angu-aghapu kuxulo pa xuputhuve;

¹⁹eno pano angu-aghapu kuxulo akelo paye aghahwuqo khije akughushipe akeno tipaqo lau wupuzu asheshue.

²⁰Aghahwu hipaqoye puzuu Noha no ashukaki shiake ghulokilo Alhou no kutuu ghi khekeu panonguno agholumove kemiqoke. Timi aghulo likhi, panoqo kumtsu kelo mitache likhi azu lono xaluke.

²¹Tipau michipu shighi baptiz shiche keu huno itehiye nongu xalu cheni. Hiye aphilo axine lhoksa akeu qhuvekeu kumoe, ikemu kiviksa lokutsu akiviu shiluke launo Alhou lau ashoqhi shikeuke, tiye Jisu Khristo xuchileputhuve keu vechewonoke.

²²Paye kungughalo wuvae eno Alhou u-ajeu ani eno kungumi kumtsu eno kungughalo ayehkipe jeli eno akuka jeli kumtsu pa qholo anike.