Read Sumi Naga 1 PITOR 5 Bible Online

1 PITOR 5 - Sumi Naga bible

1 PITOR 5

¹Ni, nongu gholo kichimi lakhi shino nongu akukuhou gholo kichimiqo shikumto ani, niye Khristo no aghime sholukeu thopimi lakhike eno akimthe jukuvu pephepiyeni akeulo kusaje nikemike. Ino nongu qhuiniju ani,

²Alhou bheriqo khekutolo, tsuyikhomo shilo pikeu ghenguno kumoe ikemu Alhou no nongu pelo shipenishi ketoi puloniqhiyi tipau shilo. Ajume ithulukeu ghengu likhino kumoe ikemu amlo lono qenikeu puloqhiyi pupuzu shilo.

³Nongu pelo tucho-heju peniye qhitsukemi shou ayehkipeu shikevilo, ikemu Alhou bheriqo zulo xupiyekemi shilo.

⁴Kughou Akheu atou ipeghini keno nonguye khilemu ajuidimokeu ajekipipu kutsukuqho ithulu nani.

⁵Titoi nongu lhothemiye kichimi qhoqhulo. Nongu kumtsuno lakhino lakhi lau qekile nike akumtsha kughuvu pepulo, kughengu pipuakeu toi, “Alhou no qhezakemi lakhave cheni, ikemu akumtshami lau kukumgha tsu cheni.”

⁶Tighenguno Alhou kumto uqholo nonguye akuchunimi shilo, tishianguno pano pa do kivi lono osunheqhe nanike.

⁷Omlo ghime kumtsu pa lau qhivetsulo kughengu pano ojukuto chenike.

⁸Tsukhuyi shialo eno kutokupuyilo! Nongu ghumi Tughami ye abongushuno igha iqhoiqi akeshi itsu cheni, tiye khuu khumu tsuqhiluve nike ju cheni.

⁹Nongu kupululo mutotoi shino pa lakhalo, kughengu ayeghiqha kumtsulo nongu thikuzumi akupulumiqoye aghime hipaphi sholu anike.

¹⁰Ado ikhonhei nonguno aghime shive kethiu, Khristo gholo nonguno xukimepe akeu lono lhokta kimthe jukuvulo nongu kuluvekeu Lhou, kukumgha kumtsu akeu Lhou huno pa ampino nongu shikumto, shiqhetsu eno nongu boqha shitsu nani.

¹¹Alhokupuju ghenguno akuka pa lau ache nani! Amen.

¹²Pukhubekulu athikuzuu ipi ino kihichekeu Sila kukuphu lono yesu hipau ikhonhei shi nongu lau ino yepuwulu ani. Ino nongu shikumto eno hakiteghi pitsuanike hino Alhou kukumgha kuchou ke. Hipaulo mutotoi puthugho chelo.

¹³Babilon[3] lo nokusami akukuhou, tighi Alhou no kisheluve keuke, lino petha nongu tsupuwu ani, eno tihutoi inu Mark ghi petha tsupuwu ani.

¹⁴Khristomi kikimiye mumakeu pesu lakhino lakhi lau petha shilo. Khristo laumi shiluvekemi kumtsu shou alokughuno apeniu!