Read Sumi Naga 2 PITOR 2 Bible Online

2 PITOR 2 - Sumi Naga bible

2 PITOR 2

¹Ikemu timiqo gholo kichile tungkupmi ghi ipeghi, ike tihutoi nongu gholo ghi kichile kukutsumi ipeghi nani. Panonguno shikupusapu kuchoukumo kukutsu pesu kusuuno ighi nani eno panoqo xachilelukeu Ampeu milive nani eno pano likhi pano shou shikupusapu zuleno sughi nani.

²Timi kutomono kiptimi totimi dolo mithemo keu papewu nani eno panoqo ghenguno kutamino kuchou Laghi hu pipusa nani.

³Panonguno alamine kelauno akimikitsa pipuzu alla kighishelu nani. Khaghino panoqo shou kugha thabeve kepu shiakeu huye munuveake kumoe eno panoqo kutsavekepu shiakeu huye zuanike kumoe.

⁴Kughengu kungumi axine shivekemiqoye Alhou no khilemu qhichemoe, ikemu inhemokeu milo vesuve cheni eno Kughakutha Tsala kheakelo akuzulo tshupe [2] puave cheni.

⁵Alhou ye mulho yeghiqha ghi qhimoveke ikemu Alhou phimokemi yeghiqha shou azuno yimve keu puwuke. Achipiu tsa pesu pichekeu Noha eno pa gholo mitsuni ishi likhi Alhou no xaluke.

⁶Alhou no Sodom ngo Gomora phughi pesu ayevu kughulhove eno panoqo puhavetsu eno Alhou phimokemi lau kichekipiye shipe puavetsu.

⁷Pano amikuchou Lot xaphelu, lhokusakughamino Lot shikughuju cheke.

⁸Kughengu amikuchou no timiqo gholo xu achekelo timiqono akumla lhoksa shikeu pano ithulu eno chiluno tsalakipetsu pa lolo amlo kughujushi kutakihi qhicheke.

⁹Tishiaye Ampeu no pa lau amlo tsukemi shilukusa sasu kupughu akeu lono xaphe lunikeu ithi ani eno amikucho kumomiqo pesu Kughakuthapu Tsala ghenguno aghimeshi pu anikeu ithi ani,

¹⁰eno tiye akhotoshi khunono pano shiajilo mithekumo ngosukumla lhoksapu shi cheni eno Alhou no ayehkipe tsukeu mithichekemi shou anani. Kichile kukutsumiqoye tsatsayi agho agho shi cheni eno akimthe jukuvu pepukemi pipusa nikeulo musaighu keu kuhae.

¹¹Kungumiye kichileu kukutsumi nguno shishe akumtou eno akughushuu keghi Ampeu zuloye kichile kukutsumi shou thaigha keu tsa pesu pipuku chemoe.

¹²Panonguye atsa pikumla tughashi pithive niye kughape puake toi vethamlano timi shou ghi ngushongko kumla shi cheni. Kiukiumu panonguno ithi kututa shimla keuye panonguno ghekucho cheni. Tughashi toi panongu ghi kutsakungove nani,

¹³eno panonguno alhoksa huthutsukeu jume aghime panongu tsu nani. Atsala kuvu lono panongu shiaji ghapiqi nikeuno pano mlokiqi shi acheni. Panonguye nongu gholo kuchu kusho[3] shikuqha kelo akukujopu eno tichetighepuke eno nongu gholo tishipulaghi panonguye alhoksa laghilo aghakiqipu shi acheni.

¹⁴Panongu ye kusalhalimi shou likhi jupuku acheni, axine shinishi keulo khilemu aghaqivekeu kuhae. Panonguno tomo chhimokemiqo musuluve cheni. Panongu mloye aghukha shinikeulo qophe puani. Panonguye Alhou no musuinivekeulo ani!

¹⁵Panonguye alakumzu qhive puzu alaizu susu wuvae. Panonguye Beor nu Balaam, khuu alhosa kumla lono ala kighishe lukeu kupukeno tipau laghi papewuvae.

¹⁶Ikemu pano hekibide xine shikeu ghenguno pa sakiyike. Pano sachekeu gadahano timi sutsa lono atsa pilupe eno tungkupu ghuzu- nikha lakhake.

¹⁷Timi hipaqoye thovekeu zupuki toike eno pasapaghano khungkusu fupesu chekeu toike; panongu ghenguno akuzukutholo Alhou no a-a lakhi kutope puani.

¹⁸Panonguno mbomzushi aqhekuza tsa pi acheni, eno ngosukumla launo alhoksami gholono pokaipeche keno tipaqohu musu sailove cheni.

¹⁹Panonguno timi tipaqo vilo khaqhikiphe tsa pesu pitsu cheni, ikemu panongu ampiye kusakugha qemiqoke, kughengu kiu kiunomu timi lakhi qhasuluvepe keu huye paye tipau qeu ake.

²⁰Kughengu timino niMpeu eno niXakuluu Jisu Khristo ithikeu kighithi vechewo ayeghilo shikupusaqo launo pokaipeluve kethiu panonguye tipaqo lono itaghi kuptshuluve eno panoqo shou heqaluve aye, timi tipaqoye atughulo kiutoi achekeno tipau nguno ashekha launo alhoksa kuchoulo auvae.

²¹Timi hipaqo pelo amikucho laghi ithiveno akimthe zahkutsu panoqo tsukeu launo panonguno idewoveaye panongu ghenguno amikucho laghi ithipemo keu pavi nicheke.

²²Panonguye kiu shive keno tipauno aholetsa hipau kuchou shivae: “Atsuno pano puqulevekeu chuchile cheni” eno “Awono azu kukuchhu anikepi idewo anibalo ihi cheni.”