Read Sumi Naga XAKUTHAMI 1 Bible Online

XAKUTHAMI 1 - Sumi Naga bible

XAKUTHAMI 1

¹Joshua thive kethiu Israilmino AMPEU vilo iniju, “Ningu shiyehqo gholo khuu paghino wuno Kanan lepaghini kya?”

²AMPEU no khochile, “Juda shiyeh paghino wulu nani. Panongu pelono aghakhu qhasulu penikeu ino tsu ani.”

³Juda timino Simon timiqo vilo pi, “Kotha pesu nitsukeu ghakhu kutolo ni sasu wulo eno ningu kuqhano Kananmi sasu aghushinie. Nonguno ni sasu wu aye ningu ghi nongu kotha tsukeu ghakhu kutolo sasu wutsu nani.” Ikehu Simon shiyeh ngo

⁴Juda shiyeh kuqhano aghushiqa lo wu. AMPEU no Kananmi ngo Perizimi shou tokulu pe panongu tsu eno Bezek ghushiqa lono panonguno 10,000 shou tokulu shilu.

⁵Panonguno Adonibezek phuluno pa sasu aghushithu.

⁶Paye povekemu panonguno hawo pa kughaluveno pauloqu eno pa pukhu loqu miche pevetsu.

⁷Adonibezek no pi, “Kukami pano lhotsuni uloqu ngo apukhu loqu ghatha suwo ino iwu yekube qholo qhipuani. Ino panongu lau mlakeu toi itehi ye Alhou no ilau mlavae.” Panonguno pa sasu Jerusalem lo ighino paye tilano thive.

⁸Juda timino Jerusalem hapheluve. Panongu no tile kuami heqhiveno aphughi lo ami su pitive tsu.

⁹Tishiveke thiu panongu ye qhaikeu ghakhu chhiliu naghuto pukhu philo kughuna achekemi Kananmi sasu aghushi thuve.

¹⁰Panonguno Hebron khikhi Kiriat Arba ipi kuche keno tipau phughi lo kughuna achekemi Kananmi sasu kumjo thuve. Tileno panonguno Sheshai, Ahiman eno Talmai laghaqo theqhiluve.

¹¹Tileno Juda lo timino Debir phughi tipau ghulokilo Kiriath Sefer ipi kuchekeu sasu kumjothuve.

¹²Panongu gholo milakhi Kaleb ipikeu no pi, “Timi khuuno Kiriath Sefer leluni keno pa pelono inga Akhsa sasu kulakupu shipenike ino tsu nani.”

¹³Othniel, Kaleb thikuzuu aitiu nu Kenaz ipikeu no aphughi hu leluve, kuchono Kaleb no pa nga Akhsa pesu kulakupu shipe nike tsuve.

¹⁴Akukula tsala lo Othniel no li pu vilo alu lakhi khulepi li vilo pithi. Lino li wu gadaha lono iqighive eno Kaleb no li vilo kiu lunishi anikela pi iniju.

¹⁵Lino khochile, “Niye azupuki hami lunishi ani. Kughengu nono ayeghi itsukeu ye qhaikeu yeghike.” Tighenguno Kaleb no lashou eno chhiliu azupuki akeu pesu li tsuve.

¹⁶Muse pangu kughuko lagha Kenimi ye Juda lo timi sasu Jerikho lo amsabo phughi ipi chekeu lono chesusu chhiliu qhaikeu Juda ghakhu lo Arad kutolo chewu. Tishino panongu ye tipa alo Amalekmi gholo kughuna kuqhaluve.

¹⁷Juda lo timiqo ye Simon laghami sasu wue eno panongu kuqhano Zefat phughi lo kughuna akemi Kananmi theqhilu. Panonguno aphughi hu qhoi kutsavetsu eno tipau pesuno Horma[1] ipi kukidevetsu.

¹⁸AMPEU no Juda lo timi kuphutsu eno panonguno ato ghakhu tipau pesu panongu wu shiluve. Ikemu panonguye Gaza, Ashkelon momu Ekron eno tipau sumxa pesu akeqoye lemoe.

²⁰Muse no ahza tsupua ketoi Hebron pesu Kaleb tsuve, pano Anak lono iko ighikemi alagha kuthu kutolo hapheve tsuke.

²¹Ikemu Benjamin laghaye Jebusimi Jerusalem lono haphemoe, ikehu Jebusimiye Benjamin lagha sasu kumtsa xu acheuve.

²²Efraim ngo Manase lagha no wupuzu Bethel le, puzuuye a-a tipau pesu Luz ipi ku che. AMPEU no panongu kuphu tsu. Panonguno aphughi lo pukujumi puwu,

²⁴ikelo timi lakhi pocheghi keu ithulu no pa vilo pi, “Aphughilo ilonikeu la nipiyelo eno tishi aye ninguye oghimeno nani.”

²⁵Ikehu pano panongu piye, tileno Efraim ngo Manase laghano ala panongu piye keu timi eno pa bolomi likhi ghuvetsu kethono aphughilo akemi kumtsu heqhi pithi khavetsu.

²⁶Athiu ye paye Hatimi yeghilo wuve eno aphughi lakhi shiluve eno tipau je Luz ipi kuvetsu tiye itehi kutolo tishi ku chephi.

²⁷Manase laghano aphughi BethShean, Taanak, Dor, Ibleam, Megido eno tipau kupunu holo taun akeqo lo kughuna akemi hale tsumo no Kananmi tile aghikeqo ye tishi acheuve.

²⁸Kughou Israilmino akumto shi luvekeno panonguno Kananmi pelo panongu ghenguno mlatsu peniye anguka su, tishimu Kananmiye haphe puwuve moe.

²⁹Efraim lagha ghi Gezer phughi lo Kananmi akeqo haphetsu moe, ike Kananmiye panongu sasu kumtsa tile kughuna ache.

³⁰Zebulun lagha ghi Kitron ngo Nahalal phughi lo kughuna akemi hale tsu moe, ike Kananmiye panongu sasu kumtsa kughuna cheno panongu pelono Zebulun lagha ghenguno mla penikeu shi anguka su.

³¹Asher lagha ghi Ako, Sidon, Ahlab, Akhzib, Helba, Afek eno Rehob phughiqo lo kughuna akemi haletsu moe.

³²Asher lagha ye Kananmi sasu kughuna acheuve, kughengu panonguno haphe moveke.

³³Naftali lagha ghi Beth Shemes ngo Bethanat phughilo kughuna aghikemi haletsu moe. Naftali laghaye tile kughuna akemi Kananmi sasu kumtsa xu acheuve eno panoqo pelo panongu ghenguno mlape nikeu shi anguka su.

³⁴Amarimino Dan laghaqo mujo chile puqho pesu atolo kughuna wuvepeno panongu pelo aqalo iqighi pemove.

³⁵Amarimino Aijalon, Shalbim eno Heres tolo kughuna acheuve ikemu Efraim ngo Manase laghano panongu qhasuluveno panoqo pelo panongu zuqhushi mlape nikeu shive.

³⁶Sela ahuu kudau Edommi ache eno tipau lughi ye Akrabim Kita kuto loke.