Read Sumi Naga XAKUTHAMI 10 Bible Online

XAKUTHAMI 10 - Sumi Naga bible

XAKUTHAMI 10

¹Abimelek thiveke thiu panu Tola khuu Dodo tilinu keno pa pelono Israilmi kuqhophe tsupe nike ipeghilu. Paye Isakhar lagha lono ipeghikemi eno Efraim ghasa tokujo Shamir ipikeulo achekemike.

²Paye ampe muku kuthu kutolo Israilmi xakuthau shicheke. Tishino paye thiveno Shamir lo qhove.

³Tola thiu Gilead lono ipeghikeu Jair no xakuthau shilu. Paye ampe kini kutolo Israilmi shou ayehpelu.

⁴Paye anu shighi gadaha shighi shouno iqho iqi keu acheke. Panonguye Gilead yeghilo aphughi shighi lo xu ache eno itehi kutolo aphu tipau je Jair ku chephie.

⁵Jair ye thiveno Kamon lo qhove.

⁶Itaghi Israilmi ye Baal ngo Astarot likhi kumono Siriya, Sidon, Muab, Amun eno Filistiya lhouqo mllau khaveno AMPEU zulo axine shikhave. Panonguno AMPEU pheveno pa mllamove.

⁷Tighenguno AMPEU no Israilmi shou ighono amlo ideveno Filistiyami ngo Amunmi pelono panongu shou qhasuluvepe.

⁸Ampe chighi tache kutolo panonguno Israilmi khunoqo Gilead ghakhu Jordan kipelau Amarimi ghakhulo achekeno tipaqo nedaqoda aghime tsu chepeke.

⁹Amunmino Jordan katha susu ikuno Juda, Benjamin eno Efraim laghaqo sasu aghu shicheke, ikehu Israilmi ye ighono amlo ghime kijelo ngove.

¹⁰Tileno Israilmino AMPEU lau ighakhu pi “Ninguno ozulo axine shivae, kughengu ninguno ningu Lhou pheveno Baal mllau khave.”

¹¹AMPEU no hipau khokichile panongu tsu: “Ijipmi, Amarimi Amunmi, Filistiyami,

¹²Sidonmi, Amalekmi eno Maonmino wovekeu lo nongu neda qoda susu xu ighivae, ikehu nonguno ivilo ighakhue. Niye panongu launo nongu xapheluke kumo keshea?

¹³Ikemu nonguye ipheveno alhou kutau mllauve, tighenguno niye nongu xaphelu tsumae.

¹⁴Wulo eno nonguno kisheluvekeu lhouqo lau ighamuku khuulo. Nonguno aghime shi akelo panongu pelo nongu xaphelu pelo.”

¹⁵Ikemu Israilmino AMPEU vilo pi, “Ninguno ozulo axine shivae. Tighenguno nono nilau kiu shinishi anikeno tipau shilo, ikemu kishima, ishino ningu xaphelutsulo.”

¹⁶Ikehu panonguno tusumi lhouqo ikhipeveno AMPEU mllathuve; eno pa ghi Israilmiqo ghime ghenguno pa mlo imeve.

¹⁷Tipathiu Amun ghushimi aghu shinike ghenguno Gilgal lo aghazu kutoluve, Israilmi ghi kumtsa kumqono Gilead lo Mizpa lo panongu ghazu shilu.

¹⁸Tileno timiqo eno Israil sakiphemino ishi inijukile, “Amunmi sasu aghushinike ghenguno khuuno ni saphe sawunikya? Timi khuuno tishi saphe wulu nikeno pano Gilead lo timi kumtsu sakipheu shiniae.”