Read Sumi Naga XAKUTHAMI 11 Bible Online

XAKUTHAMI 11 - Sumi Naga bible

XAKUTHAMI 11

¹Tuqhanu Jeftha ye Gilead lo amlo kuloghimi, ghushimi kivimi lakhike. Papu Gilead

²ye pa nipu vechewo anu kutamiqo ghi acheke, ikehu panonguno asatheu khavekeu loye panonguno Jeftha akilo sasumo nikeu shive. Panonguno pa vilo pi, “Noye ningu papu launo amheghi kumu ighi mla nani, kughengu noye tuqhalimi no punukeu nuke.”

³Ikehu Jeftha ye pa thikuzumi launo poveno Tob yeghilo acheuve. Tilehi acheke lono paye timi ame kuhamithekeqo sasu kukusuluno panonguno pa suhomxa pesu checheuve.

⁴Tishi acheke ghuloki lono Amunmino Israilmi sasu aghushi ipeghi.

⁵Tishike lono Gilead lo sakiphemino Tob yeghi lono Jeftha sachile saghi nikeu shino wuve.

⁶Panonguno pa vilo pi, “Ighipuzu ni saphetsulo, ningu Amunmi sasu aghu shinie.”

⁷Ikemu Jeftha no khochile, “Nonguno ighono iju kuchhubeve eno nonguno ipu ki lono ihaphe puwuve. Ikemu nonguye shilusa kelauye itehiye iku ighi anikeshea?”

⁸Panonguno Jeftha vilo pi, “Ninguno olau ighi akeuye opelono ningu sasu wupuzu Amunmi sasu aghushitsu penike eno Gilead lo kuami kumtsu saphetsu penike ghenguno ophu ighi ani.”

⁹Jeftha no panongu vilo pi, “Tsalatsa nonguno isasu akilo idewono Amunmi sasu aghu shikelo AMPEU no tokulu itsu aye, ino nongu yehkipeu shipeni aye wunie.”

¹⁰Panonguno pichile, “Ninguye ti pulo ani. AMPEU no ningu dolo thopi shipeni.”

¹¹Tileno Jeftha no Gilead lo sakiphemi sasu wunikeu pulove, eno timiqono pa pesu panongu shou ayehkipeu shiluvepeke. Jeftha no Mizpa lo AMPEU nhekithe lono pa kupughu kumiji pithilu.

¹²Tileno Jeftha no aghinikishimi hapesu Amun kukau lau hitoi piwupe, “Noye kiu ghenguno ningu sasu kutsala kichighi anikya? Kushiye noye nighakhu le iloghi anikya?”

¹³Amun kukauno Jeftha ghinikishimi vilo khochile, “Khaghi Israilmino Ijip lono ipecheke ghuloki lono panongu no iyeghi Arnon Ghoki lono Jabok Ghoki kuto eno Jordan sukuqha lupuani. Tighenguno itehiye kumu kiyimuto mono tipaqo tsuchilevelo.”

¹⁴Jeftha no pa ghinimi hapesu Amun kukau lau

¹⁵khokichile hipau pesu piwupe: “Israilmino Muab yeghi momu Amun yeghi luvetsu pikeuye kichileu.

¹⁶Ikemu hitoi shipe puani: Israimino Ijip lono ipecheke ghulokilo panonguye asaye yeghiqha vechesu Akuhu Zughi katha ikuno Kades lo ighilu.

¹⁷Tishino panonguno Edom kukau vilo pano yeghi kathasu wulupeni nani mapi ahza khupeniye aghikishimi hapuwuke. Ikemu Edom lo kukauno panongu pelo hechesu wupenike zah tsumove. Ikehu panonguye Muab lo kukau vilo ghi iniju ikemu pa ghi panongu pelono pa yeghi hechesu wupenikeu zah tsumove. Tilehino Israilmi ye Kades lo ngove.

¹⁸Tishi puzu panonguye asaye yeghi hechesu Edom eno Muab yeghi hemxasu wuno Arnon Ghoki tuxau Muab yeghi kipelau wo toluke. Panonguye tile aghazu shilukemu Arnon ye kathamoe, kughengu tiye Muab ghakhuke.

¹⁹Tishino Israilmino aghini kishimiqo hapesu Sihon Amarimi Heshbon lo kukau lau puwu eno pa vilo Israilmi yeghilo ilonike ghenguno pa ghakhu heche wulupeni mapi ahza khuwu.

²⁰Ikemu Sihon no Israilmi pelo tishi penikeu zah tsumove. Ipuzu pawu ghushimi kumtsu sawo Jahaz lo aghazu shino Israilmi lethuve.

²¹Ikemu AMPEU, Israil Lhou no Sihon ngo pawu ghushimi shou tokulu pesuno Israilmi tsuve. Tileno Israilmino Amarimi khunoqo tipau ghakhu lo xu achekeno tipaqo yeghi kumtsu luvetsu.

²²Ike panonguno Amarimi yeghi chhiliu Arnon lono ahuu akeu Jabok kuto, kipelau asaye yeghi lono wo kulolau Jordan kuto pukhaluvetsue.

²³Ike AMPEU Israil Lhou no pawu timi Israilmi ghenguno Amarimi halevetsuke.

²⁴Ike noye tipau luchileve nishi anikeshea? No lhou Khemos no otsukeu yeghiye nono qhilu nani. Ikemu ni Lhou, AMPEU no ningu ghenguno ikhiphe tsukeuye nino kumtsu qhipua nani.

²⁵Noye Muab lo akukau Zipor nu Balak nguno akiviu kepi kumsu anikeshea? Paye Israilmi khu momu kumjonike kuto keo?

²⁶Israilmi no hi ampe 300 kutolo Heshbon Aroer eno hikuma sukumxa lo taun akeqo ipuzu Arnon Ghoki kudau aphughi kumtsu qhasupe xu ighivae. Noye kushiye ampe 300 doloye kiu shi auveno ikhilu chilemono itehino kiu tsa pi anikya?

²⁷Tishimoe, niye khilemu olau kuqu puamoe. Nono isasu aghushikeu no kuqu auvae. AMPEU no xakuthau shipelo. Ishino Israilmi ngo Amunmi dolo pano kughakutha shitsupeniu.”

²⁸Qetishi pi amu Amun kukauno Jeftha no asutsa sughikeu kumu initsumoe.

²⁹Tileno AMPEU ghungu no Jeftha shou ikughi. Paye Gilead ngo Manase kathasu Gilead lo akeu Mizpa lo ide ighino Amun lo wuve.

³⁰Jeftha no AMPEU lau ashoqhi hitoi shi: “Tsalatsa nono Amunmi shou tokulu itsu aye,

³¹ino tokulushino ikilo ide ighike lo timi khuuno isasu kusholu tughiu shinikeno tipau pesu akipti kumllagho kiqi lono otsunie. Ino timi tipau pesu aghakishi kumlla shipesu otsuveni.”

³²Tishi piveno Jeftha ye aghoki kathasu ikuno Amunmi sasu aghushi thuve, eno AMPEU no tokulu pa tsuve.

³³Pano Aroer lono panongu ghiqhi susu Minit Bokhuqha lo aphughi kumtsu kuqhakelo muku kutolo lesusu Abel Keramim kutolo ighino ihulo keu shi ghiqhi pevetsu, Tileno Israilmi no Amunmi shou tokulu shiluve.

³⁴Kughou Jeftha no idechile susu paki Mizpa lo ighikeno pa nga no aulo tur tur lebo pesu ilhe ghi pa sasu kushonike khalacheu ipeghi. Jeftha ye anga ti likhi acheke.

³⁵Kughou pano li ithulukeno amlo ghime launo pa phi suxuveno pi, “O inga! nono imlo hephove tsuae! Kushiye opelono imlo ghimepu shivetsu pekela? Ino AMPEU vilo iqemokeu shoqhi shivae eno niye tipau ikhichilelu kepu shimlavae!”

³⁶Lino pa vilo pi, “Tsalatsa nono AMPEU lau iqemokepu shoqhi shipu aghiaye, noye ilau kiu shinishi anikeno shilo, kughengu AMPEU no oghumi Amunmi lau amkhu luvetsuae.”

³⁷Ikemu lino li pu iniju, “Ighenguno thime hi lakhi shi tsulo. Aqhi kini kutolo ilikhi qhivelo, tishi anguno niye ipamiqo sasu naghuto lo itsu iliwulu eno niye ili tathe lono thiveni chenike ghenguno kumsuqakeu do itsulo.”

³⁸Pano li vilo wulo pive eno aqhi kini ghenguno li puwuve. Ikehu lino lipamiqo sasu naghutolo iqhove ipuzu liye kulaumo eno anga shimono thiveni cheni pikeu lono mloqake.

³⁹Aqhi kini thiu liye li pu lau ide ighi. Pano AMPEU lau tushoqhi pua keu kiqi lono shive, ikehu liye ili tathe shi aphi lono thiveke.

⁴⁰Hipa thiuye hino Israil yeghilo akhuayeh shiveno Israilmi totimiqoye ampe atsutsulo atsala bidi ghenguno Gilead lo wuno Jeftha nga muloke do shicheke.